കൊല്ലം തേവലക്കര ബോയ്സ് ഹൈസ്കൂളിൽ ഷോക്കേറ്റ് മരിച്ച എട്ടാം ക്ലാസ് വിദ്യാർത്ഥി മിഥുന്റെ അമ്മ കൊച്ചിയിലെത്തി. മിഥുൻ മരിക്കുമ്പോൾ തുർക്കിയിലായിരുന്ന സുജ ഇൻഡിഗോ വിമാനത്തിലാണ് ഇന്നു രാവിലെ കൊച്ചിയിലെത്തിയത്. വൈകാരികമായ രംഗങ്ങൾക്കാണ് നെടുമ്പാശേരി വിമാനത്താവളം സാക്ഷ്യംവഹിച്ചത്. ഇളയമകനെ കണ്ടതോടെ അവനെ ചേർത്തുപിടിച്ച് സുജ പൊട്ടിക്കരഞ്ഞു.
സുജയെ കൂട്ടിക്കൊണ്ടുപോകാനായി ബന്ധുക്കൾ വിമാനത്താവളത്തിലെത്തിയിരുന്നു. അൻവർ സാദത്ത് എംഎൽഎ ഉൾപ്പെടെയുള്ള രാഷ്ട്രീയ പ്രവർത്തകരും വിമാനത്താവളത്തിലെത്തിയിരുന്നു. തുടർന്ന് സുജയെ ബന്ധുക്കൾ വീട്ടിലേക്ക് കൊണ്ടുപോയി.
ഇന്ന് വൈകിട്ട് അഞ്ചുമണിക്കാണ് മിഥുന്റെ സംസ്കാരം.ശാസ്താംകോട്ട താലൂക്ക് ആശുപത്രിയിൽ നിന്നും 10 മണിയോടെ സ്കൂളിൽ എത്തിക്കുന്ന മിഥുന്റെ മൃതദേഹം 12 മണിവരെ സ്കൂളിൽ പൊതുദർശനത്തിന് വെക്കും. സഹപാഠികളും അധ്യാപകരും പ്രദേശവാസികളും മിഥുനെ അവസാനമായി ഒരുനോക്ക് കാണാൻ ഇവിടേക്ക് എത്തും. തുടർന്ന് മൃതദേഹം ശാസ്താംകോട്ട വിളന്തറയിലെ വീട്ടിലേക്കു കൊണ്ടുപോകും.
