തിരുവനന്തപുരം: സംസ്ഥാനത്ത് റോഡ് സുരക്ഷ ഉറപ്പാക്കുന്നതിനും ഗതാഗത നിയമലംഘനങ്ങൾ കുറയ്ക്കുന്നതിനുമായി പുതിയ കർശന നിർദ്ദേശങ്ങളുമായി മോട്ടോർ വാഹന വകുപ്പ്. 2026 ജനുവരി 1 മുതൽ പ്രാബല്യത്തിൽ വന്ന പുതിയ മോട്ടോർ വാഹന നിയമപ്രകാരം, നിയമം ലംഘിക്കുന്നവർക്കെതിരെ ലൈസൻസ് റദ്ദാക്കുന്നത് ഉൾപ്പെടെയുള്ള നടപടികളുണ്ടാകും.
പ്രധാന മാറ്റങ്ങളും കർശന നിയന്ത്രണങ്ങളും:
മോട്ടോർ വാഹന വകുപ്പ് പുറത്തിറക്കിയ പുതിയ മാർഗനിർദ്ദേശങ്ങളിലെ പ്രധാന പോയിന്റുകൾ താഴെ പറയുന്നവയാണ്:
ലൈസൻസ് റദ്ദാക്കൽ: ഒരു വർഷത്തിനിടെ അഞ്ച് ചലാനുകൾ (Challans) ലഭിക്കുന്ന ഡ്രൈവർമാരുടെ ഡ്രൈവിംഗ് ലൈസൻസ് റദ്ദാക്കും.
പിഴ അടയ്ക്കാൻ സമയപരിധി: ട്രാഫിക് പിഴകൾ അടയ്ക്കുന്നതിന് 45 ദിവസത്തെ സാവകാശം മാത്രമാണ് നൽകുക. ഇതിനുശേഷവും പിഴ അടയ്ക്കാത്തവർക്കെതിരെ കടുത്ത നിയമനടപടിക സ്വീകരിക്കും.
ബ്ലാക്ക് ലിസ്റ്റ് ചെയ്യും: പിഴ കുടിശ്ശികയുള്ള വാഹനങ്ങളെ 'ബ്ലാക്ക് ലിസ്റ്റിൽ' ഉൾപ്പെടുത്തും. ഇത്തരം വാഹനങ്ങൾക്ക് ഉടമസ്ഥാവകാശ കൈമാറ്റം (Transfer of Ownership), ഫിറ്റ്‌നസ് സർട്ടിഫിക്കറ്റ് (Fitness Certificate) തുടങ്ങിയ സേവനങ്ങൾ തടയും.
വാഹനങ്ങൾ പിടിച്ചെടുക്കാം: പിഴ അടയ്ക്കാതെ നിരത്തിലിറങ്ങുന്ന വാഹനങ്ങൾ തടഞ്ഞു വെക്കാൻ ഉദ്യോഗസ്ഥർക്ക് പൂർണ്ണ അധികാരമുണ്ടായിരിക്കും.
ഉത്തരവാദിത്തം ഉടമയ്ക്ക്: വാഹനവുമായി ബന്ധപ്പെട്ട എല്ലാ നിയമനടപടികളും RC ഉടമയ്‌ക്കെതിരെ ആയിരിക്കും. മറ്റൊരാളാണ് വാഹനം ഓടിച്ചതെന്ന് തെളിയിക്കേണ്ട ബാധ്യത വാഹന ഉടമയ്ക്കായിരിക്കും.
