ആലപ്പുഴ: ഇറിഡിയം ലോഹവ്യാപാരത്തിലൂടെ വൻലാഭമെന്ന വാഗ്ദാനം നൽകി നടത്തിയ തട്ടിപ്പിൽ മുതിർന്ന പോലീസ് ഉദ്യോഗസ്ഥർ ഉൾപ്പെടെ നിരവധി പേർ ഇരകളായെന്ന് റിപ്പോർട്ട്. റിസർവ് പോലീസിന്റെ ചുമതലയുള്ള ഒരു ഡിവൈ.എസ്.പി.-യിൽ നിന്ന് 25 ലക്ഷം രൂപയാണ് സംഘം കൈക്കലാക്കിയതെന്നാണ് വിവരം. യോഗങ്ങളിലേക്കു ക്ഷണിച്ച് കോടികളുടെ നേട്ടമാണ് തട്ടിപ്പുസംഘം ഉറപ്പുനൽകിയിരുന്നത്. എന്നാൽ, നൽകിയ തുക പോലും തിരിച്ചുകിട്ടാത്ത അവസ്ഥയിലാണ് ഉദ്യോഗസ്ഥൻ.

വനിതാ എസ്.ഐ.യുടെ ബാങ്ക് ഉദ്യോഗസ്ഥനായ ഭർത്താവിൽ നിന്ന് 10 ലക്ഷം രൂപ തട്ടിയെടുത്തതായും റിപ്പോർട്ടുണ്ട്. പണം തിരികെ ചോദിച്ചപ്പോൾ നിക്ഷേപം പത്തിരട്ടിയായി നൽകാമെന്നായിരുന്നു തട്ടിപ്പുകാരുടെ മറുപടി. കുമരകത്ത് സംഘടിപ്പിച്ച യോഗങ്ങളിൽ പങ്കെടുത്ത തമിഴ്നാട് സ്വദേശികൾക്ക് പൊലീസ് കാവൽ ഏർപ്പെടുത്തിയതും സംഭവത്തിന് കൂടുതൽ ഗൗരവം നൽകുന്നു.

തട്ടിപ്പിന്റെ കേരളത്തിലെ മുഖ്യ കണ്ണിയെന്നു കരുതുന്ന ആലപ്പുഴ വീയപുരം സ്വദേശി സജി ഔസേഫിന്റെ നേതൃത്വത്തിലാണ് പണം ശേഖരിച്ചത്. ഒരു ഉന്നത പൊലീസ് ഉദ്യോഗസ്ഥന് ഐഫോൺ സമ്മാനമായി നൽകിയെന്ന ആരോപണവും ഉയർന്നിട്ടുണ്ട്. പരാതികൾ ഉണ്ടായിട്ടും കാര്യമായ നടപടി ഉണ്ടാകാത്തത് ഉന്നതതല ഇടപെടലാണെന്ന സംശയങ്ങൾക്ക് ഇടയാക്കുന്നു.

ഇടുക്കിയിലെ ഒരു പഞ്ചായത്ത് പ്രസിഡന്റും ഭാര്യയും 10 കോടി രൂപ വീതം ലഭിക്കുമെന്ന ഉറപ്പിൽ 39 ലക്ഷം രൂപ നിക്ഷേപിച്ചു. കൊട്ടാരക്കര, കോട്ടയം, കൊച്ചി എന്നിവിടങ്ങളിലെ വിമുക്തഭടന്മാരിൽ നിന്നും 20 ലക്ഷം രൂപ വീതവും സംഘം കൈപ്പറ്റിയിട്ടുണ്ട്. പണം നൽകിയവരെ ഉപയോഗിച്ച് അവരുടെ ബന്ധുക്കളെയും പരിചയക്കാരെയും തട്ടിപ്പിൽ ഉൾപ്പെടുത്തുന്ന ശൈലിയാണ് സംഘത്തിന്റെ മുഖ്യ ആയുധം; സജി ഔസേഫിന്റെ ബന്ധുവായ ഒരു സ്ത്രീ പോലും ഇതിൽ നിന്ന് രക്ഷപ്പെട്ടില്ലെന്നതാണ് പുറത്തുവരുന്ന വിവരം.