ജമ്മു കശ്മീരില് ഭീകരസംഘടനയായ ലഷ്കറെ തൊയ്ബയുടെ കമാന്ഡറെ ഇന്ത്യൻ സൈന്യം കൊലപ്പെടുത്തി. അല്ത്താഫ് ലല്ലി എന്ന ഭീകരനാണ് കൊല്ലപ്പെട്ടത്. ലഷ്കറെ തൊയ്ബയുടെ മുതിർന്ന കമാൻഡറാണ് അല്ത്താഫ് ലല്ലി. കശ്മീരിലെ ബന്ദിപോരയിൽ നടന്ന ഏറ്റുമുട്ടലിലാണ് അല്ത്താഫ് ലല്ലിയെ സൈന്യം കൊലപ്പെടുത്തിയത്.
പഹല്ഗാം ഭീകരാക്രമണത്തില് പങ്കാളികളായ ഭീകരരെ കണ്ടെത്താനുള്ള ശ്രമങ്ങള്ക്കിടെയാണ് ഭീകരരുമായി ഏറ്റുമുട്ടലുണ്ടായത്. ബന്ദിപോരയിലെ കുല്നാര് ബസിപോര മേഖലയില് ഭീകരരുടെ സാന്നിധ്യമുണ്ടെന്ന് കണ്ടെത്തിയതിനെ തുടര്ന്ന് സൈന്യം ഇവിടം വളയുകയായിരുന്നു. മേഖലയില് ഇപ്പോഴും ഏറ്റുമുട്ടല് തുടരുകയാണെന്നാണ് റിപ്പോര്ട്ട്.
അതിനിടെ, പഹല്ഗാം ആക്രമണത്തില് പങ്കെടുത്ത കശ്മീരികളായ രണ്ട് ലഷ്കര് ഭീകരരുടെ വീടുകള് പ്രാദേശിക ഭരണകൂടം തകര്ത്തു. ആക്രമണത്തില് പങ്കെടുത്ത ആസിഫ് ഷെയ്ഖ്, ആദില് ഹുസൈന് എന്നിവരുടെ വീടുകളാണ് തകര്ത്തത്. പഹല്ഗാം ആക്രമണത്തിന് പിന്നാലെ ഇവരുടെ കുടുംബങ്ങള് വീടൊഴിഞ്ഞ് പോയിരുന്നു. പഹല്ഗാം ആക്രമണത്തില് പങ്കെടുത്ത തദ്ദേശീയരായ ഭീകരര്ക്കെതിരേ പ്രദേശവാസികളില്നിന്ന് കടുത്ത എതിര്പ്പുകളുയര്ന്നിരുന്നു. ഇതിനുപിന്നാലെയാണ് ഇവരുടെ വീടുകള് തകര്ത്തത്.
