തലശേരിയിൽ ഗർഭിണിയായ യുവതിയെ കൂട്ടബലാത്സംഗത്തിനിരയാക്കിയ സംഭവത്തിൽ മൂന്നുപേർ പിടിയിൽ. പിടിയിലായവരിൽ രണ്ടുപേർ അന്യസംസ്ഥാന തൊഴിലാളികളാണ്. മുഴപ്പിലങ്ങാട്‌ മഠത്തിനടുത്ത ശ്രീജ ഹൗസിൽ പ്രജിത്ത്‌ (30), ബിഹാർ സ്വദേശികളായ ദുർഗാപുരിലെ ആസിഫ്‌ (19), പ്രാൻപുർ കതിഹാറിലെ സഹബുൾ (24) എന്നിവരെയാണ്‌ പൊലീസ് കസ്റ്റഡിയിലെടുത്തത്. 33 കാരിയായ യുവതിയാണ് തലശേരി റെയിൽവെസ്‌റ്റേഷൻ പരിസരത്ത്‌ കൂട്ടബലാത്സംഗത്തിന് ഇരയായത്. യുവതിയെ എരഞ്ഞോളി മഹിളമന്ദിരത്തിലേക്ക്‌ മാറ്റി.
ഏപ്രിൽ 26ന് രാത്രി ഏഴു മണിയോടെയാണ്‌ സംഭവം. റയിൽവെ സ്റ്റേഷൻ പരിസരത്തുവെച്ച് യുവതിയെ സംഘം ചേർന്ന്‌ ആക്രമിക്കുകയായിരുന്നു. തലശേരി റെയിൽവെ സ്‌റ്റേഷനിൽ നിന്ന് പുതിയ ബസ്‌സ്‌റ്റാന്റിലേക്കുള്ള എളുപ്പ വഴിയിലെ റെയിൽവെ മേൽപാലത്തിനടുത്ത്‌ വെച്ചായിരുന്നു ആദ്യത്തെ പീഡനം. പിന്നീട്‌ ബലമായി മേലൂട്ട്‌മേൽപാലം ഭാഗത്തേക്ക്‌ കൊണ്ടുപോയും പീഡനത്തിനിരയാക്കി.
അവശനിലയിലായ യുവതി കോഴിക്കോട്‌ മെഡിക്കൽ കോളേജ്‌ ആശുപത്രിയിൽ ചികിത്സതേടി. യുവതി തനിക്ക്‌ നേരിട്ട ദുരനുഭവം ഡോക്‌ടർമാരെ അറിയിച്ചതിനെ തുടർന്ന്‌ മെഡിക്കൽ കോളേജ്‌ അധികൃതരാണ്‌ പൊലീസിന്‌ വിവരം നൽകിയത്‌. സമീപത്തെ സിസിടിവി ദൃശ്യങ്ങളടക്കം പരിശോധിച്ചാണ്‌ മൂന്നുപേരെ കസ്റ്റഡിയിലെടുത്തത്. ഇതിൽ രണ്ടുപേർക്ക്‌ നേരിട്ട്‌ ബന്ധമുള്ളതായി തലശേരി എഎസ്‌പി എഎസ്‌പി പിബി കിരൺ പറഞ്ഞു.
