കേരള സംസ്ഥാന ലോട്ടറി വകുപ്പിന്റെ തിരുവോണം ബംപർ ലോട്ടറി നറുക്കെടുപ്പ് മാറ്റിവച്ചു. നാളെ നടക്കേണ്ടിയിരുന്ന നറുക്കെടുപ്പ് ഒക്ടോബർ നാലിലേക്കാണ് മാറ്റിവച്ചത്. ജിഎസ്ടിയിൽ വന്ന മാറ്റവും ടിക്കറ്റ് വിൽപ്പന കുറഞ്ഞതുമാണ് നറുക്കെടുപ്പ് മാറ്റിവെക്കാനുള്ള കാരണങ്ങൾ. കനത്ത മഴയെ തുടർന്നാണ് ടിക്കറ്റ് വിൽപ്പനയിൽ ഇടിവ് രേഖപ്പെടുത്തിയത്. ഏജന്റുമാരുടെ അഭ്യർഥന കൂടി പരിഗണിച്ചാണ് നറുക്കെടുപ്പ് മാറ്റിയതെന്ന് ലോട്ടറി വകുപ്പ് പ്രസ്താവനയിൽ അറിയിച്ചു.
അച്ചടിച്ച 75 ലക്ഷം ടിക്കറ്റുകളും ഏജൻസികൾക്ക് വിറ്റുകഴിഞ്ഞുവെന്ന് ഭാഗ്യക്കുറി വകുപ്പ് അറിയിച്ചിരുന്നു. ഇതുവരെ ഏറ്റവും കൂടുതൽ ടിക്കറ്റ് വിറ്റത് പാലക്കാടാണ് - 14,07,100 എണ്ണം. തൃശൂരിൽ 9,37,400 ടിക്കറ്റുകളും തിരുവനന്തപുരത്ത് 8,75,900 ടിക്കറ്റുകളും വിറ്റുകഴിഞ്ഞു.
25 കോടി രൂപയാണ് ഓണം ബംപർ ഒന്നാം സമ്മാനം. രണ്ടാം സമ്മാനമായി ഒരു കോടി രൂപ വീതം 20 പേർക്കും മൂന്നാം സമ്മാനമായി 50 ലക്ഷം വീതം 20 പേർക്കും നാലാം സമ്മാനമായി അഞ്ചുലക്ഷം വീതം 10 പരമ്പരകൾക്കും അഞ്ചാം സമ്മാനമായി രണ്ടു ലക്ഷം വീതം 10 പരമ്പരകൾക്കും ലഭിക്കും. കൂടാതെ 5000, 2000, 1000, 500 രൂപയുടെ നിരവധി സമ്മാനങ്ങളും നൽകും.
