ന്യൂഡൽഹി: മുസ്ലിം പള്ളികളിൽ സ്ത്രീ പ്രവേശനത്തിന് യാതൊരുവിധ വിലക്കുകളുമില്ലെന്ന് അഖിലേന്ത്യാ മുസ്ലിം വ്യക്തി നിയമ ബോർഡ് സുപ്രീംകോടതിയെ അറിയിച്ചു. ശബരിമല യുവതീപ്രവേശന വിഷയത്തിനൊപ്പം, വിവിധ മതവിഭാഗങ്ങളിലെ സ്ത്രീകളുടെ അവകാശങ്ങളും ആചാരങ്ങളും ചോദ്യം ചെയ്തുകൊണ്ടുള്ള ഹർജികൾ പരിഗണിക്കവെയാണ് ഒൻപതംഗ ഭരണഘടനാ ബെഞ്ച് മുമ്പാകെ ബോർഡ് നിലപാട് വ്യക്തമാക്കിയത്.
​പള്ളികളിൽ വരുന്നതിൽ നിന്ന് സ്ത്രീകളെ തടയരുതെന്ന് പ്രവാചകൻ തന്നെ വ്യക്തമാക്കിയിട്ടുള്ള കാര്യമാണെന്ന് ബോർഡിന് വേണ്ടി ഹാജരായ അഭിഭാഷകൻ എം.ആർ. ഷംസാദ് കോടതിയെ അറിയിച്ചു. സ്ത്രീകൾക്ക് പള്ളിയിൽ വന്ന് പ്രാർത്ഥിക്കണമെന്നുണ്ടെങ്കിൽ അതിന് അനുവാദമുണ്ട്. എന്നാൽ പുരുഷന്മാരെപ്പോലെ സ്ത്രീകൾക്ക് പ്രാർത്ഥനാ കൂട്ടായ്മകളുടെ (ജമാഅത്ത്) ഭാഗമാകണമെന്നത് നിർബന്ധമില്ലെന്നും, അവർക്ക് വീട്ടിലിരുന്ന് പ്രാർത്ഥിക്കാവുന്നതാണെന്നും ബോർഡ് കൂട്ടിചേർത്തു.
​കോടതിയുടെ നിരീക്ഷണങ്ങൾ
​വാദം കേൾക്കുന്നതിനിടെ ബെഞ്ചിലെ ജസ്റ്റിസ് അഹ്സാനുദ്ദിൻ അമാനുള്ള ചില സുപ്രധാന ചോദ്യങ്ങൾ ഉയർത്തി. "എല്ലാവരും പള്ളിയിലേക്ക് പോയാൽ കുട്ടികളെ ആരു നോക്കുമെന്നതാണോ സ്ത്രീകൾ വീട്ടിൽ പ്രാർത്ഥിച്ചാൽ മതിയെന്ന നിലപാടിന് പിന്നിലെ കാരണം?" എന്ന് അദ്ദേഹം ചോദിച്ചു.
​കൂടാതെ, വിശ്വാസപരമായ കാര്യങ്ങളിൽ കോടതികൾ ഇടപെടരുതെന്ന ശശി തരൂർ എം.പിയുടെ നിലപാട് അഭിഭാഷകർ ചൂണ്ടിക്കാട്ടിയപ്പോൾ, അത് അദ്ദേഹത്തിന്റെ വ്യക്തിപരമായ അഭിപ്രായമായി മാത്രമേ കാണാൻ കഴിയൂ എന്ന് ചീഫ് ജസ്റ്റിസ് സൂര്യകാന്ത് വ്യക്തമാക്കി.
​'വാട്സാപ്പ് യൂണിവേഴ്സിറ്റി' വിവരങ്ങൾ വേണ്ട
​വിവരങ്ങളുടെ ഉറവിടം നോക്കാതെ അവ സ്വീകരിക്കണമെന്ന് ചില അഭിഭാഷകർ വാദിച്ചപ്പോൾ, വാട്സാപ്പ് യൂണിവേഴ്സിറ്റിയിൽ നിന്നുള്ള വിവരങ്ങൾ തെളിവായി സ്വീകരിക്കാൻ കഴിയില്ലെന്ന് ജസ്റ്റിസ് ബി.വി. നാഗരത്ന കർശനമായി പറഞ്ഞു. ഒൻപതംഗ ബെഞ്ചിലെ ഏക വനിതാ ജഡ്ജിയാണ് ഇവർ.
​ദാവൂദി ബോറ സമുദായത്തിലെ ചേലാകർമ്മം ഉൾപ്പെടെയുള്ള വിഷയങ്ങളും ഈ ബെഞ്ചിന്റെ പരിഗണനയിലുണ്ട്. കേസിൽ ഏപ്രിൽ 28-ന് വാദം തുടരും.