തിരുവനന്തപുരം:കേരളത്തിലെ രാഷ്ട്രീയ ചരടുവലികളിൽ നിർണ്ണായകമായ സമുദായ സംഘടനകൾ കോൺഗ്രസിനെതിരെ പരസ്യമായി വാളെടുക്കുമ്പോഴും, പാർട്ടി അമരക്കാരന്റെ നിസ്സംഗത കോൺഗ്രസ് രാഷ്ട്രീയത്തിൽ വലിയ പൊട്ടിത്തെറികൾക്ക് വഴിമാറുന്നു. പാർട്ടിയുടെ നട്ടെല്ലായ വോട്ട് ബാങ്കുകളിൽ വിള്ളൽ വീഴ്ത്തുന്ന തരത്തിൽ സമുദായ നേതാക്കൾ കടന്നാക്രമണം നടത്തുമ്പോൾ, പ്രതിരോധത്തിന്റെ മുൻനിരയിൽ നിൽക്കേണ്ട കെപിസിസി പ്രസിഡന്റ് എവിടെയെന്ന ചോദ്യം അണികൾക്കിടയിൽ നിന്ന് തെരുവുകളിലേക്ക് പടരുകയാണ്. വിവാദങ്ങൾ കത്തിപ്പടരുമ്പോഴും അധ്യക്ഷന്റെ ഭാഗത്തുനിന്നുണ്ടാകുന്ന 'മൗനവ്രതം' പാർട്ടിയെ രാഷ്ട്രീയമായി തളർത്തുകയാണെന്ന ആക്ഷേപം ശക്തമാണ്.
താഴെത്തട്ടിലുള്ള നേതാക്കളും അണികളും സമുദായ സംഘടനകളുടെ വിമർശനങ്ങൾക്ക് മറുപടി പറയാൻ പാടുപെടുകയും അപമാനിതരാവുകയും ചെയ്യുമ്പോൾ, സുരക്ഷിതമായ മൗനത്തിൽ ഒളിച്ചിരിക്കുന്ന നേതൃശൈലി അംഗീകരിക്കാനാവില്ലെന്ന് ഒരുവിഭാഗം നേതാക്കൾ തുറന്നടിക്കുന്നു. പടക്കളത്തിൽ പടയാളികൾ നിരായുധരായി പൊരുതുമ്പോൾ പടത്തലവൻ പടത്തിന് പുറത്ത് കാഴ്ചക്കാരനായി നിൽക്കുന്നത് പാർട്ടിയുടെ ആത്മവീര്യം പൂർണ്ണമായും തകർത്തിരിക്കുകയാണ്. അണികൾക്ക് ദിശാബോധം നൽകാനോ സമുദായ സംഘടനകളുമായി രാഷ്ട്രീയമായ ചർച്ചകൾ നടത്താനോ തയ്യാറാകാത്ത കെപിസിസി അധ്യക്ഷന്റെ നിസ്സംഗത പാർട്ടിയെ ഒരു വലിയ തകർച്ചയിലേക്കാണ് നയിക്കുന്നത്.
അടിത്തറ ഇളകുന്നത് കണ്ടിട്ടും അനക്കമില്ലാത്ത അധ്യക്ഷന്റെ നിലപാട് കോൺഗ്രസിനെ സ്നേഹിക്കുന്ന സാധാരണ പ്രവർത്തകരിൽ വലിയ നിരാശയാണ് പടർത്തുന്നത്. സമുദായ സംഘടനകൾ ഉയർത്തുന്ന വെല്ലുവിളികളെ നേരിടാൻ കെൽപ്പില്ലാത്ത നേതൃത്വം എന്തിന് തുടരുന്നു എന്ന ചോദ്യം പാർട്ടി വേദികളിൽ ഉയർന്നു കഴിഞ്ഞു. നിർണ്ണായകമായ രാഷ്ട്രീയ സന്ധികളിൽ നായകനില്ലാതെ ഉഴറുന്ന ഒരു പ്രസ്ഥാനമായി കോൺഗ്രസ് മാറുമ്പോൾ, അണികളുടെ ഏക സ്വരം ഇതാണ്: "ഞങ്ങൾക്ക് വേണ്ടത് യുദ്ധക്കളത്തിൽ മുന്നിൽ നിന്ന് നയിക്കുന്ന നായകനെയാണ്, മൗനത്തിൽ ഒളിക്കുന്ന കാഴ്ചക്കാരനെയല്ല".
