തിരുവനന്തപുരം: മുൻ എൽഡിഎഫ് സർക്കാരിന്റെ അവസാനഘട്ടത്തിൽ നടപ്പാക്കിയ പിഎസ്‌സി ചെയർമാനും അംഗങ്ങൾക്കും നൽകിയ വൻ ശമ്പളവർധനവ് പുനഃപരിശോധനയ്ക്ക് വിധേയമാക്കാൻ യുഡിഎഫ് സർക്കാർ നീക്കം ആരംഭിച്ചേക്കുമെന്ന സൂചന. ശമ്പളവർധനവ് പിൻവലിക്കണമെന്ന ആവശ്യം ഉയർന്ന സാഹചര്യത്തിലാണ് ഇതുസംബന്ധിച്ച ചർച്ചകൾ വീണ്ടും സജീവമാകുന്നത്.

ശമ്പളവർധനവ് പ്രഖ്യാപിച്ച സമയത്തുതന്നെ അന്നത്തെ പ്രതിപക്ഷ നേതാവായിരുന്ന വി.ഡി. സതീശൻ കടുത്ത വിമർശനവുമായി രംഗത്തെത്തിയിരുന്നു. രാഷ്ട്രീയ നിയമനത്തിലൂടെ എത്തുന്ന പിഎസ്‌സി അംഗങ്ങൾക്ക് ഇത്രയും വലിയ ശമ്പളവർധനവ് നൽകിയത് ന്യായീകരിക്കാനാകില്ലെന്നും സാമ്പത്തിക പ്രതിസന്ധി നേരിടുന്ന സംസ്ഥാനത്തിന് ഇത് അധിക ബാധ്യത സൃഷ്ടിക്കുമെന്നും അദ്ദേഹം ചൂണ്ടിക്കാട്ടിയിരുന്നു.

തീരുമാനപ്രകാരം പിഎസ്‌സി ചെയർമാന്റെ ശമ്പളം 2.24 ലക്ഷത്തിൽ നിന്ന് 3.87 ലക്ഷമായും അംഗങ്ങളുടെ ശമ്പളം 2.19 ലക്ഷത്തിൽ നിന്ന് 3.08 ലക്ഷമായും ഉയർത്തിയിരുന്നു. ഇതോടെ ചെയർമാന് 1.67 ലക്ഷം രൂപയുടെയും അംഗങ്ങൾക്ക് 89,000 രൂപയുടെയും വർധനവാണ് ഒരൊറ്റ ഘട്ടത്തിൽ ലഭിച്ചത്. സംസ്ഥാന ചരിത്രത്തിൽ അപൂർവമായ ശമ്പളവർധനവായാണ് ഇതിനെ വിലയിരുത്തിയത്.

പിഎസ്‌സി അംഗങ്ങളുടെ എണ്ണവും അന്ന് വിമർശനവിധേയമായിരുന്നു. രാജ്യത്തെ പരമോന്നത റിക്രൂട്ട്മെന്റ് ഏജൻസിയായ യുപിഎസ്‌സിയിൽ ഒമ്പത് അംഗങ്ങൾ മാത്രമുള്ളപ്പോൾ കേരള പിഎസ്‌സിയിൽ 21 അംഗങ്ങളാണുള്ളത്. സമീപ സംസ്ഥാനമായ തമിഴ്നാട്ടിൽ അംഗസംഖ്യ 14 മാത്രമാണെന്നതും വിമർശകർ ചൂണ്ടിക്കാട്ടിയിരുന്നു. ഈ സാഹചര്യത്തിൽ ശമ്പളവർധനവും അംഗസംഖ്യയും സംബന്ധിച്ച് സർക്കാർ എന്ത് നിലപാട് സ്വീകരിക്കുമെന്നതാണ് ഇപ്പോൾ പൊതുസമൂഹവും ഉദ്യോഗാർഥികളും ഉറ്റുനോക്കുന്നത്.