​ദോഹ: ഖത്തറിന്റെ ഊർജ്ജ ഉൽപ്പാദനവുമായി ബന്ധപ്പെടുത്തി പ്രമുഖ അന്താരാഷ്ട്ര മാധ്യമമായ 'വാഷിംഗ്ടൺ പോസ്റ്റ്' പ്രസിദ്ധീകരിച്ച റിപ്പോർട്ടിലെ ആരോപണങ്ങൾ പൂർണ്ണമായും തള്ളി ഖത്തർ ഇന്റർനാഷണൽ മീഡിയ ഓഫീസ്. യുഎസും ഇറാനും തമ്മിലുള്ള സമാധാന ചർച്ചകളിൽ ഖത്തർ നടത്തുന്ന മധ്യസ്ഥ ശ്രമങ്ങളെ അട്ടിമറിക്കാനും, ഖത്തറും അമേരിക്കയും തമ്മിലുള്ള തന്ത്രപ്രധാനമായ പങ്കാളിത്തത്തിന് വിള്ളലുണ്ടാക്കാനും ലക്ഷ്യമിട്ടുള്ള ബോധപൂർവ്വമായ പ്രചാരണമാണിതെന്ന് ഖത്തർ ഔദ്യോഗിക പ്രസ്താവനയിൽ വ്യക്തമാക്കി.
​ജൂൺ 12-ന് വാഷിംഗ്ടൺ പോസ്റ്റ് പുറത്തുവിട്ട റിപ്പോർട്ടിൽ, ഖത്തറിന്റെ ഊർജ്ജ ഉൽപ്പാദന തീരുമാനങ്ങൾ ഇറാന്റെ താൽപ്പര്യങ്ങൾക്ക് അനുസൃതമായാണ് നടപ്പാക്കിയതെന്ന തരത്തിൽ ഉന്നയിച്ച വാദങ്ങൾ പൂർണ്ണമായും അടിസ്ഥാനരഹിതമാണെന്ന് ഓഫീസ് അറിയിച്ചു.തങ്ങൾക്കെതിരെ ഇറാൻ്റെ മിസൈൽ ആക്രമണങ്ങൾ ഉണ്ടായ സമയത്തുതന്നെയാണ് ഖത്തർ ഇത്തരം തീരുമാനങ്ങൾ എടുത്തതെന്നത് ആരോപണങ്ങളുടെ പൊള്ളത്തരം വ്യക്തമാക്കുന്നുവെന്ന് പ്രസ്താവന ചൂണ്ടിക്കാട്ടുന്നു. മേഖലയിൽ സമാധാനം വരുന്നത് തടയാൻ ആഗ്രഹിക്കുന്ന ചില ശക്തികൾ നൽകിയ തെറ്റായ വിവരങ്ങളുടെ അടിസ്ഥാനത്തിലാണ് പത്രം ഈ റിപ്പോർട്ട് തയ്യാറാക്കിയിരിക്കുന്നത്. യഥാർത്ഥ വസ്തുതകളും വിവരങ്ങളും ബോധ്യപ്പെടുത്തിയിട്ടും പത്രം തങ്ങളുടെ തെറ്റായ ആഖ്യാനം തിരുത്താൻ തയ്യാറായില്ലെന്നും മീഡിയ ഓഫീസ് കുറ്റപ്പെടുത്തി.യുദ്ധസാഹചര്യത്തിൽ റാസ് ലഫാൻ ലിക്വിഫൈഡ് നാച്ചുറൽ ഗ്യാസ് (LNG) പ്ലാന്റിലെ നാശനഷ്ടങ്ങൾ ഖത്തർ പെരുപ്പിച്ചു കാണിച്ചുവെന്നോ, പ്ലാന്റ് അടച്ചുപൂട്ടാൻ വ്യാജമായ കാരണങ്ങൾ ഉണ്ടാക്കിയെന്നോ ഉള്ള നിഗമനങ്ങൾ തികച്ചും തെറ്റാണ്.
​"സൈനിക നീക്കങ്ങൾ ആരംഭിച്ചയുടൻ തന്നെ, ജീവനക്കാരുടെ സുരക്ഷയ്ക്ക് ഭീഷണിയുള്ളതിനാലാണ് എൽഎൻജി കരാറുകളിൽ 'ഫോഴ്സ് മജ്യൂർ' (Force Majeure - അപ്രതീക്ഷിത കാരണങ്ങളാൽ കരാർ നടപ്പാക്കാൻ കഴിയാത്ത അവസ്ഥ) പ്രഖ്യാപിച്ചതെന്ന് ഖത്തർ വ്യക്തമാക്കിയതാണ്. ഖത്തർ സായുധ സേന നടത്തിയ സുരക്ഷാ വിലയിരുത്തലിന്റെ അടിസ്ഥാനത്തിലായിരുന്നു ഈ തീരുമാനം. വാണിജ്യപരമായ ലാഭത്തേക്കാൾ തങ്ങളുടെ പൗരന്മാരുടെയും താമസക്കാരുടെയും ജീവനാണ് ഖത്തർ മുൻഗണന നൽകുന്നതെന്ന് 
ഇന്റർനാഷണൽ മീഡിയ ഓഫീസ് പ്രസ്താവനയിൽ പറഞ്ഞു.വാണിജ്യ കാര്യങ്ങളിൽ രാഷ്ട്രീയത്തിന് അതീതമായി സുതാര്യത പുലർത്തുന്ന സ്ഥാപനമാണ് 'ഖത്തർ എനർജി'. അവർ ബോധപൂർവ്വം തെറ്റായ വിവരങ്ങൾ നൽകിയെന്ന തരത്തിലുള്ള പ്രചാരണങ്ങൾ അങ്ങേയറ്റം ഖേദകരമാണ്.
​വാഷിംഗ്ടൺ പോസ്റ്റിനെപ്പോലെയുള്ള ഒരു പ്രമുഖ മാധ്യമസ്ഥാപനം ഇത്തരം വ്യാജപ്രചാരണങ്ങൾക്ക് വേദിയൊരുക്കിയത് നിർഭാഗ്യകരമാണെന്നും, ആഗോളതലത്തിൽ വലിയ സ്വാധീനമുള്ള വിഷയങ്ങൾ കൈകാര്യം ചെയ്യുമ്പോൾ ഉയർന്ന മാധ്യമധർമ്മം പുലർത്താൻ പത്രം ബാധ്യസ്ഥരാണെന്നും പ്രസ്താവനയിൽ ഓർമ്മിപ്പിച്ചു.