കർണാടകം: ബലാത്സംഗത്തിനിരയായി കൊല്ലപ്പെട്ട നിരവധി സ്ത്രീകളുടെ മൃതദേഹങ്ങൾ ധർമ്മസ്ഥല ക്ഷേത്ര പരിസരത്ത് രഹസ്യമായി കുഴിച്ചുമൂടിയിട്ടുണ്ടെന്ന വെളിപ്പെടുത്തലാണ് അടുത്ത കാലത്ത് വിവാദമായത്. അതേപറ്റി അന്വേഷിക്കാൻ സിദ്ധരാമയ്യ ഗവണ്മെന്റ് എസ്‌ ഐ ടി യെ നിയോഗിക്കുകയും ചെയ്തിരുന്നു. അതിന്റെ അന്വേഷണത്തിനിടയിലാണ് പതിനാല് വർഷം മുമ്പ് ധർമ്മസ്ഥലയിൽ നടന്ന സൗജന്യ കൊലക്കേസ് വീണ്ടും ഉയർന്നുവന്നത്. ആ കൊലക്കേസും വിവാദമുയർത്തിയ വെളിപ്പെടുത്തലും തമ്മിൽ ചില ബന്ധങ്ങളുണ്ട്. അതാണ് ധർമ്മസ്ഥലയിൽ ഇപ്പോഴും പുകയുന്നത്.  സുപ്രീംകോടതി സൗജന്യ കേസിൽ പുതിയ SIT അന്വേഷണം നടത്താൻ ഉത്തരവിട്ടതിന്റെ പ്രധാന കാരണം മുൻ അന്വേഷണങ്ങളിലെ ഗുരുതര വീഴ്ചകളാണ്.
2012 ഒക്ടോബർ 9-ന് 17 വയസ്സുള്ള സൗജന്യ കോളേജിൽ പോയി മടങ്ങിയെത്തിയില്ല. അടുത്ത ദിവസം ധർമ്മസ്ഥലയ്ക്ക് സമീപം മന്നസങ്ക പ്രദേശത്ത് മൃതദേഹം കണ്ടെത്തി. ആദ്യം ബെൽത്തങ്ങാടി പൊലീസ് അന്വേഷിച്ച കേസ് പിന്നീട് CIDയും CBIയും അന്വേഷിച്ച്  സന്തോഷ് റാവു എന്നയാളെ പ്രതിയാക്കി. ഇയാൾ മാനസിക പ്രശ്നങ്ങളുള്ള വ്യക്തിയാണെന്ന് പിന്നീട് വെളിപ്പെട്ടു. 2023 ജൂൺ 16-ന് CBI പ്രത്യേക കോടതി തെളിവുകളുടെ അഭാവത്തിൽ അയാളെ കുറ്റവിമുക്തനാക്കി.
സുപ്രീംകോടതി വീണ്ടും അന്വേഷണം ആവശ്യപ്പെട്ടത് എന്തുകൊണ്ട്?
1. പ്രതിക്കെതിരെ നിർണായക തെളിവുകൾ കണ്ടെത്തിയില്ല.
വിചാരണക്കോടതി തന്നെ പ്രതിയെ കുറ്റവുമായി ബന്ധിപ്പിക്കുന്ന മതിയായ തെളിവുകളില്ലെന്ന് കണ്ടെത്തി. പ്രതിയുടെ വസ്ത്രങ്ങളിൽ രക്തമോ വീര്യമോ കണ്ടെത്തിയില്ല; നഖങ്ങളിൽനിന്നും പ്രതിയുമായി ബന്ധിപ്പിക്കാവുന്ന തെളിവുകൾ ലഭിച്ചില്ല.
2. പ്രധാന ഫോറൻസിക് തെളിവുകൾ ശരിയായി സംരക്ഷിച്ചില്ല/പരിശോധിച്ചില്ല
സൗജന്യയുടെ യോനീസ്രവം ഉൾപ്പെടെയുള്ള തെളിവുകളുടെ കൈകാര്യം ചെയ്യലിലും പരിശോധനയിലും ഗുരുതര വീഴ്ചകളുണ്ടായതായി കോടതി രേഖകൾ ചൂണ്ടിക്കാട്ടുന്നു. മൃതദേഹത്തിൽനിന്ന് കണ്ടെത്തിയ വസ്ത്രങ്ങളുമായി ബന്ധപ്പെട്ട ചില തെളിവുകളും ശരിയായി ശേഖരിച്ചില്ല.
3. പ്രധാന CCTVയും മറ്റ് തെളിവുകളും ശേഖരിച്ചില്ല
സമീപത്തെ മെഡിക്കൽ സ്ഥാപനത്തിലെ CCTV ദൃശ്യങ്ങൾ ശേഖരിക്കാത്തതും മൊബൈൽ ഫോൺ വിവരങ്ങൾ തുടരന്വേഷണ ഉദ്യോഗസ്ഥർക്ക് ശരിയായി കൈമാറാത്തതും കോടതി ശ്രദ്ധിച്ചു.
4. ചില പ്രധാന സാക്ഷികളെ ചോദ്യം ചെയ്തില്ല.
അന്വേഷണത്തിൽ പ്രസക്തമായേക്കാവുന്ന ചില സാക്ഷികളെ ശരിയായി പരിശോധിച്ചില്ലെന്നതും സുപ്രീംകോടതി നിരീക്ഷിച്ചു . ഒരു പ്രധാന സാക്ഷിയായിരുന്ന രവി പൂജാരി പിന്നീട് കൊല്ലപ്പെട്ടതും കേസിലെ അന്വേഷണ വീഴ്ചകളുടെ പശ്ചാത്തലത്തിൽ ശ്രദ്ധേയമായി.
5. പുതിയ DNA സാധ്യത സുപ്രീംകോടതി കണ്ടെത്തി
ഏറ്റവും പ്രധാനപ്പെട്ട കാര്യം ഇതാണ്. DNA വിദഗ്ധന്റെ മൊഴിപ്രകാരം സൗജന്യയുടെ ചുരിദാറിൽ കണ്ടെത്തിയ മുടി സന്തോഷ് റാവുവിന്റെ തായിരുന്നില്ല.  സംശയിക്കപ്പെടുന്ന വ്യക്തികളെ തിരിച്ചറിഞ്ഞാൽ അവരുമായി DNA താരതമ്യം ചെയ്യാൻ ഇപ്പോഴും സാധ്യതയുണ്ടെന്ന് കോടതി വിലയിരുത്തി.
6.
2026 ഏപ്രിലിൽ സുപ്രീംകോടതി നിർദേശിച്ചതിനെ തുടർന്ന് നേരത്തെ അന്വേഷണത്തിൽ ശരിയായി പരിശോധിക്കപ്പെട്ടിട്ടില്ലെന്ന് ചൂണ്ടിക്കാട്ടപ്പെട്ട എട്ട് സാധ്യതയുള്ള സാക്ഷികളെ സർക്കാർ കണ്ടെത്തി. ഇതോടെ, വർഷങ്ങൾ കഴിഞ്ഞിട്ടും ചില അന്വേഷണ സൂചനകൾ ലഭ്യമാണെങ്കിൽ അവ മുൻ അന്വേഷണ ഏജൻസികൾ എന്തുകൊണ്ട് പിന്തുടർന്നില്ല എന്ന ചോദ്യം സുപ്രീംകോടതി ഉന്നയിച്ചു.
അതുകൊണ്ടാണ് സുപ്രീംകോടതിയുടെ നിർണായക നിരീക്ഷണം.
മുൻ അന്വേഷണത്തിന്റെ രീതിയെക്കുറിച്ച് കോടതി “shocks the very conscience of the court” എന്ന ശക്തമായ നിരീക്ഷണം നടത്തി. യഥാർത്ഥ പ്രതികൾ അന്വേഷണത്തെ സ്വാധീനിച്ചിരിക്കാനുള്ള സാധ്യത തള്ളിക്കളയാനാവില്ലെന്നും കോടതി പറഞ്ഞു.
അതുകൊണ്ട് മുൻ അന്വേഷണത്തിന്റെ തുടർച്ചയായി ചെറിയൊരു അന്വേഷണം നടത്താനല്ല, “de novo” — അടിസ്ഥാനത്തിൽ നിന്ന് പുതിയ അന്വേഷണം നടത്താനാണ് സുപ്രീംകോടതി ഉത്തരവിട്ടത്.
പുതിയ SIT-യിൽ ബെൽത്തങ്ങാടി പൊലീസ്, CID, CBI എന്നിവയുടെ മുൻ അന്വേഷണത്തിൽ പങ്കെടുത്ത ഉദ്യോഗസ്ഥരെ ഉൾപ്പെടുത്തരുതെന്നും, മൂന്ന് മാസത്തിനകം അന്വേഷണം പൂർത്തിയാക്കി റിപ്പോർട്ട് നൽകണമെന്നും കോടതി നിർദേശിച്ചു. നേരത്തെ കുറ്റവിമുക്തനായ സന്തോഷ് റാവുവിനെ അതേ കുറ്റത്തിന് വീണ്ടും വിചാരണ ചെയ്യാൻ ഉത്തരവിട്ടിട്ടില്ല.
14 വർഷം കഴിഞ്ഞിട്ടും യഥാർത്ഥ കുറ്റവാളിയെ കണ്ടെത്താനായില്ല; നേരത്തെ അന്വേഷണങ്ങളിൽ നിർണായക തെളിവുകൾ ശേഖരിക്കുകയും പരിശോധിക്കുകയും ചെയ്യുന്നതിൽ ഗുരുതര വീഴ്ചകളുണ്ടായി; ഇപ്പോഴും DNAയും പുതിയ സാക്ഷികളും വഴി അന്വേഷണം മുന്നോട്ടുകൊണ്ടുപോകാൻ സാധ്യതയുണ്ടെന്ന് സുപ്രീംകോടതി കണ്ടു. അതാണ് പുതിയ SIT അന്വേഷണത്തിന് പ്രധാന കാരണം.

Photo Courtesy - Google