തിരുവനന്തപുരം: ശബരിമല യുവതി പ്രവേശനവുമായി ബന്ധപ്പെട്ട വിഷയത്തിൽ സംസ്ഥാന സർക്കാർ മുൻ നിലപാട് മാറ്റാൻ ഒരുങ്ങുന്നു. യുവതീപ്രവേശനത്തെ പിന്തുണച്ച നിലപാട് തിരുത്തി, ആചാരസംരക്ഷണം ഉറപ്പാക്കണമെന്ന ആവശ്യം സുപ്രീംകോടതിയിൽ ഉന്നയിക്കാനാണ് സർക്കാർ തീരുമാനം. ഇതുസംബന്ധിച്ച നിലപാട് സർക്കാർ നാളെ കോടതിയെ അറിയിക്കും.

2018 സെപ്റ്റംബർ 28-ന് സുപ്രീംകോടതി യുവതികൾക്ക് ശബരിമലയിൽ പ്രവേശനം അനുവദിച്ച വിധി പുറപ്പെടുവിച്ചിരുന്നു. തുടർന്ന് സമർപ്പിക്കപ്പെട്ട പുനപരിശോധന ഹർജികൾ പരിഗണിക്കുമ്പോൾ സംസ്ഥാന സർക്കാർ ആദ്യം ആ വിധിയെ പിന്തുണച്ചിരുന്നു. നവോത്ഥാന സമിതിയും വനിതാ മതിൽ ഉൾപ്പെടെയുള്ള പരിപാടികളിലൂടെ യുവതീപ്രവേശനത്തെ അനുകൂലിച്ച നിലപാടാണ് അന്ന് സർക്കാർ സ്വീകരിച്ചത്.

എന്നാൽ തെരഞ്ഞെടുപ്പ് അടുത്തിരിക്കുന്ന സാഹചര്യത്തിൽ വിശ്വാസികളുടെ വികാരം പരിഗണിച്ചാണ് സർക്കാർ ഇപ്പോൾ നിലപാട് തിരുത്തുന്നതെന്ന സൂചനകളുണ്ട്. ഇതിനുമുമ്പ് തിരുവിതാംകൂർ ദേവസ്വം ബോർഡ് ആചാരസംരക്ഷണത്തെ പിന്തുണച്ച് നിലപാട് മാറ്റിയിരുന്നു.

ഇതിനിടെ, ശബരിമല കേസിലെ ഹർജിക്കാരായ ഇന്ത്യൻ യങ്ങ് ലോയേഴ്സ് അസോസിയേഷൻ സുപ്രീംകോടതിയിൽ അവരുടെ വാദങ്ങൾ സമർപ്പിച്ചു. യുവതികൾക്ക് പ്രവേശനം അനുവദിച്ച വിധി നിലനിർത്തണമെന്ന് സംഘടന ആവശ്യപ്പെട്ടു. സ്ത്രീകളുടെ മാന്യത്തെയും സമത്വത്തെയും ബാധിക്കുന്ന വിഷയമാണിതെന്നും ആർത്തവത്തിന്റെ പേരിൽ സ്ത്രീകളെ മാറ്റിനിർത്തുന്നത് അംഗീകരിക്കാനാകില്ലെന്നും അവർ ചൂണ്ടിക്കാട്ടി.

കൂടാതെ, ശബരിമലയെ പ്രത്യേക വിഭാഗമായി കാണാൻ കഴിയില്ലെന്നും പൊതുതാൽപര്യ ഹർജിയിലൂടെ മതാചാരങ്ങളെ ചോദ്യം ചെയ്യുന്നത് നിയമപരമായി സാധുവാണെന്നും സംഘടന സുപ്രീംകോടതിയെ അറിയിച്ചു.