കൊച്ചി: കൊച്ചി ശാസ്ത്ര സാങ്കേതിക സർവകലാശാലയിൽ (കുസാറ്റ്) യുവജന ക്ഷേമ വകുപ്പിൻ്റെ നേതൃത്വത്തിൽ നടക്കുന്ന ദി സൗണ്ട് ഓഫ് മ്യൂസിക് എന്ന ത്രിദിന സംഗീത ശില്പശാല പ്രശസ്ത സംഗീത സംവിധായകൻ രാഹുൽ രാജ് ഉദ്ഘാടനം ചെയ്തു. ക്യാമ്പസ്സിൽ അക്കാദമിക് സംസ്കാരം രൂപപ്പെടുത്തുന്നതിൽ സംഗീതം പ്രധാനമാണെന്നും, സാമൂഹ്യ ബൗദ്ധീക വികാസത്തിന്റെ ശാസ്ത്രീയ രീതിയാണെന്നും രാഹുൽ രാജ് പറഞ്ഞു. സർവകലാശാലയിലെ ഹിന്ദി വിഭാഗത്തിന്റെ ഓഡിറ്റോറിയത്തിൽ നടന്ന ചടങ്ങിൽ യുവജനക്ഷേമ വകുപ്പ് ഡയറക്ടർ ഡോ. പി.കെ. ബേബി, ശില്പശാല ഡയറക്ടർ സജ്ന സുധീർ, ഡോ. അമ്പാട്ട് വിജയകുമാർ, ചാരു ഹരിഹരൻ എന്നിവർ സംസാരിച്ചു. തുടർന്ന് സംസ്ഥാന അവാർഡ് ജേതാവും സംഗീത സംവിധായകനുമായ ബേണി, പ്രശസ്ത സംഗീതജ്ഞയും മൃദംഗ വാദകയുമായ ചാരു ഹരിഹരൻ എന്നിവർ വിവിധ സെഷനുകൾക്ക് നേതൃത്വം നൽകി. സംഗീതത്തിൻ്റെ വിവിധ തലങ്ങളായ വോക്കൽ, ഇൻസ്ട്രുമെൻറ്റൽ, ക്ലാസ്സിക്കൽ തുടങ്ങിയവയ്ക്ക് പുറമേ പാട്ട് റെക്കോർഡിങ്ങുമായി ബന്ധപ്പെട്ട സാങ്കേതിക പരിശീലനം ഉൾപ്പെടെ വിവിധ വിഷയങ്ങളിൽ മൈ സ്റ്റുഡിയോ സി.ഇ. ഒ യും കംപോസറുമായ ഹരിശങ്കർ വി, തിരുവനന്തപുരം വിമൻസ് കോളേജ് സംഗീത വിഭാഗം അധ്യാപകരും സംഗീതജ്ഞരുമായ ഡോ. ധനലക്ഷ്മി, സജ്ന സുധീർ, വയലിനിസ്റ്റ് വിവേക്, മൃദംഗ വാദകൻ ബെല്ലിക്കോത്ത് രാജീവ് ഗോപാൽ തുടങ്ങിയവർ വിവിധ സെഷനുകൾക്ക് നേതൃത്വം നൽകും. ശില്പശാല ഞായറാഴ്ച സമാപിക്കും.
Photo Courtesy - Google
