ദോഹ: 2027-ൽ ഖത്തർ വേദിയാകുന്ന ഫിബ (FIBA) ബാസ്കറ്റ്ബോൾ ലോകകപ്പിന്റെ ഔദ്യോഗിക ചിഹ്നമായ (Mascot) ‘സുഹൈൽ’ സംഘാടക സമിതി പുറത്തിറക്കി. 2027 ഓഗസ്റ്റ് 27 മുതൽ സെപ്റ്റംബർ 12 വരെ ദോഹയിൽ നടക്കുന്ന ടൂർണമെന്റിൽ ലോകമെമ്പാടുമുള്ള 32 രാജ്യങ്ങൾ മാറ്റുരയ്ക്കും.
ഗൾഫ് മേഖലയിൽ തിളങ്ങിനിൽക്കുന്ന ‘സുഹൈൽ’ (Canopus) നക്ഷത്രത്തിൽ നിന്നാണ് ഈ കഥാപാത്രത്തിന് പ്രചോദനം ഉൾക്കൊണ്ടത്. നൂറ്റാണ്ടുകളായി മരുഭൂമിയിലും കടലിലും യാത്ര ചെയ്യുന്നവർ വഴി അറിയാൻ ആശ്രയിച്ചിരുന്ന സുഹൈൽ നക്ഷത്രം ഖത്തറിന്റെ സമ്പന്നമായ പാരമ്പര്യത്തിന്റെയും സംസ്‌കാരത്തിന്റെയും പ്രതീകമാണ്.
വേനൽച്ചൂട് കുറഞ്ഞ് കൂടുതൽ സുഖകരമായ കാലാവസ്ഥ പ്രഖ്യാപിച്ചുകൊണ്ട് ആകാശത്ത് സുഹൈൽ ഉദിച്ചുയരുന്ന സമയത്താണ് ലോകകപ്പ് പോരാട്ടങ്ങൾ നടക്കുന്നത് എന്നത് ഈ ചിഹ്നത്തിന്റെ പ്രത്യേകത വർദ്ധിപ്പിക്കുന്നു.
ഖത്തറിന്റെ സാംസ്കാരിക തനിമയും പാരമ്പര്യവും ലോകത്തിന് മുന്നിൽ അവതരിപ്പിക്കുന്നതിനാണ് സുഹൈലിനെ ഔദ്യോഗിക ചിഹ്നമായി തിരഞ്ഞെടുത്തതെന്ന് ലോക്കൽ ഓർഗനൈസിംഗ് കമ്മിറ്റിയുടെ കമ്മ്യൂണിക്കേഷൻസ് വിഭാഗം എക്സിക്യൂട്ടീവ് ഡയറക്ടർ അബ്ദുള്ള അലി അൽ മൗലവി പറഞ്ഞു. വരാനിരിക്കുന്ന ദിവസങ്ങളിൽ കായികപ്രേമികളിൽ ആവേശം നിറയ്ക്കാനും പുതിയ തലമുറയെ ബാസ്കറ്റ്ബോളിലേക്ക് ആകർഷിക്കാനും സുഹൈലിന് സാധിക്കുമെന്നും അദ്ദേഹം കൂട്ടിച്ചേർത്തു.
