തിരുവനന്തപുരം: കോഴിക്കോട് നാദാപുരത്ത് നിന്ന് 46 വർഷം മുമ്പ് ഖത്തറിലേക്ക് പറന്ന ജി.പി. കുഞ്ഞബ്ദുള്ളയെഴുതിയ പാട്ടാണ് ഇപ്പോൾ തദ്ദേശ തിരഞ്ഞെടുപ്പിന്റെ മുന്നണിയിൽ  ഹിറ്റായി മാറിയത്. വെറും മൂന്നാംക്ലാസുവരെ മാത്രം പഠിച്ച ആളാണ് കുഞ്ഞബ്ദുള്ള.
​'സ്വർണം കട്ടവനാരപ്പാ, സഖാക്കളാണേ അയ്യപ്പാ...' എന്ന പാരഡിഗാനം ഇപ്പോൾ മിക്ക രാഷ്ട്രീയ പ്രവർത്തകരുടെയും നാവിൻതുമ്പിൽ ശ്രുതിയാണ്. യു.ഡി.എഫ് വിജയത്തിന്റെ കേരളത്തിലെ ആണിക്കല്ലായി വിലസിയ ഈ പാരഡി ഗാനം, എന്നാൽ ഒരു രാഷ്ട്രീയ പാർട്ടിക്കും വേണ്ടി എഴുതിയതല്ല.

​പാട്ട് പിറന്ന വഴി

​യൂത്ത് കോൺഗ്രസുകാർക്കും പിന്നീട് യൂത്ത് ലീഗുകാർക്കുമെല്ലാം അയച്ചെങ്കിലും ഈ ഗാനം ആരും ആദ്യഘട്ടത്തിൽ പരിഗണിച്ചില്ല. പിന്നീട്, കുഞ്ഞബ്ദുള്ളയുടെ സുഹൃത്തായ കോഴിക്കോട്ടുള്ള ഹനീഫ മുടിക്കോടനാണ് ഇതിന് സംഗീതം നൽകി പാട്ടാക്കിയത്. തുടർന്ന് ഡാനിഷ് കൂട്ടിലങ്ങാടി ഇത് ആലപിക്കുകയും ഗാനം ഹിറ്റാവുകയും ചെയ്തു.

​പള്ളിക്കെട്ട് ശബരിമലയ്ക്ക് കല്ലുംമുള്ളും കാലിക്ക് മെത്തെ... എന്ന പ്രശസ്തമായ ഭക്തിഗാനത്തിന്റെ ഈണത്തിലാണ് ഈ പാരഡി ഗാനം എഴുതിയത്. തിരഞ്ഞെടുപ്പുവേളയിൽ യു.ഡി.എഫും എൻ.ഡി.എയും സംസ്ഥാന വ്യാപകമായി ഈ ഗാനം ഏറ്റെടുത്തിരുന്നു.
​
ഹിറ്റായ പാരഡി വരികൾ

​ഹിറ്റായ പാരഡിയുടെ പ്രധാന വരികൾ ഇങ്ങനെയാണ്:

​പോറ്റിയേ കേറ്റിയേ
സ്വർണം ചെമ്പായ് മാറ്റിയേ
സ്വർണപ്പാളികൾ മാറിയേ
ശാസ്താവിൻ ധനം ഊറ്റിയേ
സ്വർണം കട്ടവനാരപ്പാ
സഖാക്കളാണേ അയ്യപ്പാ....

​പാട്ടെഴുത്തിന്റെ പിന്നാമ്പുറം: 

​ഖത്തറിൽ നിന്ന്  സംസാരിച്ച ജി.പി. കുഞ്ഞബ്ദുള്ള തന്റെ പാട്ടെഴുത്തിന്റെ കാരണം വിശദീകരിച്ചു.
​"മൂന്നാംക്ലാസ് വരെ മാത്രം പഠിച്ച ആളാണ് ഞാൻ. വിദ്യാഭ്യാസം വെച്ച് നാട്ടിൽ നിന്നു രക്ഷപ്പെടാനാവില്ലെന്നു കരുതി ഖത്തറിലേക്കെത്തി. അപ്പോഴും വീടും നാടും മനസ്സിൽ ഒരു പച്ചപ്പായിരുന്നു. അയ്യപ്പൻ മനുഷ്യരുടെയെല്ലാം ദൈവമാണ്, ജാതിയും മതവുമില്ല. ആ അയ്യപ്പന്റെ കട്ടിളപ്പാളിവരെ അടിച്ചുമാറ്റിയതറിഞ്ഞപ്പോൾ ഒരു പാട്ടെഴുതാൻ തോന്നി. കേരളം ഹൃദയത്തിൽ സൂക്ഷിക്കുന്ന ഈണത്തിലാണ് എഴുതിയത്," അദ്ദേഹം പറഞ്ഞു.
​കുടുംബപരമായി കോൺഗ്രസുകാരനാണ് താനെന്നും അദ്ദേഹം വെളിപ്പെടുത്തി. നിലവിൽ അറുനൂറോളം പാട്ടുകൾ കുഞ്ഞബ്ദുള്ള എഴുതിയിട്ടുണ്ട്. ഭാര്യ സുലൈഖ. രണ്ടു പെൺകുട്ടികളും ഒരാണുമടക്കം മൂന്നു മക്കളാണ് ഇദ്ദേഹത്തിന്.