കേരളത്തിന്റെ വികസനരേഖയും രാഷ്ട്രീയ വെല്ലുവിളികളും ചർച്ച ചെയ്തുകൊണ്ട് മുഖ്യമന്ത്രി പിണറായി വിജയൻ സംസാരിക്കുന്നു. പാർട്ടിയിലെ അച്ചടക്കത്തെക്കുറിച്ചും പ്രതിപക്ഷത്തിന്റെ രാഷ്ട്രീയ പാപ്പരത്തത്തെക്കുറിച്ചും അദ്ദേഹം തന്റെ നിലപാടുകൾ വ്യക്തമാക്കുന്നു.
ചോദ്യം: കേരളം വീണ്ടും ഒരു എൽ.ഡി.എഫ് ഭരണത്തിലേക്ക് നീങ്ങുമെന്ന് അങ്ങ് ഉറപ്പിച്ചു പറയാനുള്ള രാഷ്ട്രീയ സാഹചര്യം എന്താണ്?
മുഖ്യമന്ത്രി: കേരളത്തിലെ ജനങ്ങൾ വികസനം ആഗ്രഹിക്കുന്നവരാണ്. ആ ആഗ്രഹങ്ങൾ യാഥാർത്ഥ്യമാക്കാൻ ഈ സർക്കാരിന് കഴിഞ്ഞു. കഴിഞ്ഞ രണ്ട് വട്ടവും ജനങ്ങൾ നൽകിയ അംഗീകാരം ഈ വികസന പ്രവർത്തനങ്ങൾക്കുള്ളതായിരുന്നു. നാടിന്റെ നന്മയ്ക്കായി എൽ.ഡി.എഫ് സർക്കാർ നടപ്പിലാക്കിയ പദ്ധതികൾ ജനങ്ങൾ നേരിട്ട് അനുഭവിക്കുന്നതാണ്. അതുകൊണ്ടുതന്നെ മൂന്നാം തവണയും അവർ എൽ.ഡി.എഫിനെ തന്നെ തിരഞ്ഞെടുക്കും.
ചോദ്യം: മുഖ്യമന്ത്രി സ്ഥാനത്തേക്ക് അങ്ങ് തന്നെ വരണമെന്ന ജനവികാരത്തെ പാർട്ടി എങ്ങനെ കാണുന്നു?
മുഖ്യമന്ത്രി: അത്തരം സ്നേഹപ്രകടനങ്ങൾക്ക് നന്ദിയുണ്ട്. പക്ഷേ, കമ്മ്യൂണിസ്റ്റ് പാർട്ടിയിൽ തീരുമാനങ്ങൾ വ്യക്തികേന്ദ്രീകൃതമല്ല. പാർട്ടി ഒരു കൂട്ടായ തീരുമാനമെടുക്കും, ആ തീരുമാനത്തിന് വിധേയനായി പ്രവർത്തിക്കുക എന്നതാണ് എന്റെ രീതി. എക്കാലത്തും അങ്ങനെ തന്നെയാണ് പ്രവർത്തിച്ചിട്ടുള്ളതും.
ചോദ്യം: പ്രതിപക്ഷത്തിന്റെ പ്രവർത്തനങ്ങളിൽ അങ്ങ് ഒട്ടും തൃപ്തനല്ല എന്ന് തോന്നുന്നു. എന്താണ് അവർക്ക് സംഭവിക്കുന്നത്?
മുഖ്യമന്ത്രി:
ജനാധിപത്യത്തിൽ ഭരണപക്ഷത്തിനൊപ്പം തന്നെ ഉത്തരവാദിത്തമുള്ള വിഭാഗമാണ് പ്രതിപക്ഷം. എന്നാൽ നിർഭാഗ്യവശാൽ, ഇന്ന് കേരളത്തിലുള്ളത് വെറും ബഹളം വെക്കാൻ മാത്രമറിയുന്ന ഒരു കൂട്ടമാണ്. സഭയിൽ സർക്കാരിനെ ക്രിയാത്മകമായി നേരിടാൻ അവർക്ക് കഴിയുന്നില്ല. ക്ത്യമായ ആരോപണങ്ങൾ ഉന്നയിക്കാൻ പോലും ഭയപ്പെടുന്ന, നിസ്സഹായരായ ഒരു പ്രതിപക്ഷത്തെയാണ് നാം കാണുന്നത്. ഇത് ജനാധിപത്യത്തിന് ഗുണകരമല്ല.
ചോദ്യം: കേന്ദ്ര സർക്കാരുമായി അങ്ങേയ്ക്ക് രഹസ്യ ധാരണയുണ്ടെന്ന കോൺഗ്രസ് ആരോപണത്തെ എങ്ങനെ നേരിടുന്നു?
മുഖ്യമന്ത്രി: അതൊക്കെ വെറും രാഷ്ട്രീയ പ്രസ്താവനകൾ മാത്രമാണ്. ഒരു സംസ്ഥാനത്തിന്റെ മുഖ്യമന്ത്രി എന്ന നിലയിൽ പ്രധാനമന്ത്രിയെ കാണുന്നതും നിവേദനങ്ങൾ നൽകുന്നതും ഭരണപരമായ കാര്യമാണ്. അതിനെ 'അന്തർധാര' എന്ന് വിളിക്കുന്നത് രാഷ്ട്രീയ പാപ്പരത്തമാണ്. കേന്ദ്രത്തിന്റെ കേരളത്തോടുള്ള അവഗണനയെ ഏറ്റവും ശക്തമായി എതിർത്തത് ഈ സർക്കാരാണ്. ചിരിച്ചുകൊണ്ടുള്ള ഫോട്ടോകൾ കൊണ്ട് വസ്തുതകൾ മാറുന്നില്ല.
ചോദ്യം: ആലപ്പുഴയിലെയും കണ്ണൂരിലെയും പ്രമുഖ നേതാക്കളുടെ വിട്ടുപോക്ക് പാർട്ടിക്കുള്ളിലെ വിള്ളലല്ലേ സൂചിപ്പിക്കുന്നത്?
മുഖ്യമന്ത്രി: ഇത് പാർട്ടിയുടെ വിള്ളലല്ല, മറിച്ച് ചില വ്യക്തികൾക്ക് വന്ന മൂല്യച്യൂതിയാണ്. പാർലമെന്ററി വ്യാമോഹം ചിലരെ വല്ലാതെ പിടികൂടിയിരിക്കുന്നു. പ്രായപരിധി നിശ്ചയിച്ചത് പാർട്ടിയുടെ പൊതുനയമാണ്. അത് എല്ലാവർക്കും ബാധകമാണ്. സ്ഥാനമാനങ്ങൾ ലഭിക്കാത്തപ്പോൾ ശത്രുപക്ഷത്ത് പോയി മത്സരിക്കുന്നത് ഒരു കമ്മ്യൂണിസ്റ്റിന് ചേർന്നതല്ല. ആലപ്പുഴയിലെയും കണ്ണൂരിലെയും പാർട്ടി കോട്ടകൾ ഇത്തരം ഒറ്റപ്പെട്ട സംഭവങ്ങൾ കൊണ്ട് തകരില്ല.
ചോദ്യം: മന്ത്രി റിയാസിനെതിരെ വ്യക്തിപരമായ അധിക്ഷേപങ്ങൾ ഉയരുന്നത് അങ്ങയെ വേദനിപ്പിക്കാറുണ്ടോ?
മുഖ്യമന്ത്രി: വേദനിപ്പിക്കുകയല്ല, മറിച്ച് അത്തരം ഹീനമായ നീക്കങ്ങളോട് പുച്ഛമാണ് തോന്നാറുള്ളത്. ഞങ്ങളെ വ്യക്തിപരമായി ഇകഴ്ത്തിക്കാട്ടാൻ ശ്രമിക്കുന്നവർക്ക് ജനങ്ങൾ മറുപടി നൽകും. ജനങ്ങളുടെ മനസ്സിലാണ് ഞങ്ങളുടെ സ്ഥാനം.
ചോദ്യം: നിരന്തരമായ ആരോപണങ്ങളും സമ്മർദ്ദങ്ങളും എങ്ങനെയാണ് അങ്ങ് അതിജീവിക്കുന്നത്?
മുഖ്യമന്ത്രി: മനസ്സിൽ കുറ്റബോധമില്ലാത്തവർക്ക് ഒന്നിനെയും ഭയപ്പെടേണ്ടതില്ല. ഞാൻ ചെയ്യുന്നത് ശരിയാണെന്ന ബോധ്യം എനിക്കുണ്ട്. അതുകൊണ്ട് ആരോപണങ്ങളെക്കുറിച്ച് ആലോചിച്ച് ഞാൻ സമയം കളയാറില്ല. കുടുംബം നൽകുന്ന പിന്തുണയും വലിയ കരുത്താണ്.
ചോദ്യം: വരാനിരിക്കുന്ന തിരഞ്ഞെടുപ്പ് ഫലം എന്തായിരിക്കും?
മുഖ്യമന്ത്രി: എൽ.ഡി.എഫ് ചരിത്ര വിജയം നേടും. കഴിഞ്ഞ തവണത്തേക്കാൾ വലിയ ഭൂരിപക്ഷത്തോടെ ജനങ്ങൾ വികസനത്തുടർച്ചയ്ക്ക് വോട്ട് ചെയ്യും.
