ദോഹ: ഖത്തറിലെ റാസ് ലഫാൻ വ്യവസായ നഗരത്തിന് നേരെ ബുധനാഴ്ച ഇറാൻ നടത്തിയ മിസൈൽ ആക്രമണത്തെ ദേശീയ മനുഷ്യാവകാശ സമിതി (NHRC) ശക്തമായ ഭാഷയിൽ അപലപിച്ചു. സിവിലിയൻ വ്യവസായ കേന്ദ്രത്തെ ലക്ഷ്യം വെച്ചുണ്ടായ ഈ ആക്രമണം വലിയ നാശനഷ്ടങ്ങൾക്കും തീപിടുത്തത്തിനും കാരണമായതായി സമിതി പ്രസ്താവനയിൽ അറിയിച്ചു.ഐക്യരാഷ്ട്രസഭയുടെ ചാർട്ടറുകൾക്കും സുരക്ഷാ സമിതിയുടെ 2817-ാം നമ്പർ പ്രമേയത്തിനും വിരുദ്ധമാണ് ഈ ആക്രമണമെന്ന് NHRC ചൂണ്ടിക്കാട്ടി. സിവിലിയൻ അടിസ്ഥാന സൗകര്യങ്ങളെയും വ്യവസായ കേന്ദ്രങ്ങളെയും ലക്ഷ്യം വെക്കുന്നത് അന്താരാഷ്ട്ര മാനുഷിക നിയമങ്ങളുടെ നഗ്നമായ ലംഘനമാണ്.ജീവിക്കാനുള്ള അവകാശം, ആരോഗ്യം, സുരക്ഷ, സഞ്ചാരസ്വാതന്ത്ര്യം എന്നിവയെ ഈ നീക്കം തടസ്സപ്പെടുത്തുന്നു. ലോകമെമ്പാടുമുള്ള വികസന പ്രവർത്തനങ്ങളെയും പരിസ്ഥിതിയെയും ഇത് ദോഷകരമായി ബാധിക്കും.ഇത്തരം ആക്രമണങ്ങൾ ഉടനടി അവസാനിപ്പിക്കണമെന്നും കുറ്റക്കാർക്കെതിരെ ശക്തമായ നടപടി സ്വീകരിക്കണമെന്നും അന്താരാഷ്ട്ര സമൂഹത്തോട് സമിതി ആവശ്യപ്പെട്ടു.ആക്രമണത്തിന് പിന്നാലെ ജനങ്ങളുടെ സുരക്ഷ ഉറപ്പാക്കാനും നാശനഷ്ടങ്ങൾ കുറയ്ക്കാനും ആഭ്യന്തര മന്ത്രാലയവും പ്രതിരോധ മന്ത്രാലയവും സ്വീകരിച്ച ദ്രുതഗതിയിലുള്ള നടപടികളെ NHRC അഭിനന്ദിച്ചു.
