തിരുവനന്തപുരം: തെറ്റുകളെ ഭയമില്ലാതെ വിരൽചൂണ്ടി വിമർശിക്കുന്നതിനൊപ്പം തന്നെ, സമൂഹത്തിൽ സംഭവിക്കുന്ന നല്ല കാര്യങ്ങളെ തുറന്ന മനസ്സോടെ അഭിനന്ദിക്കാൻ കൂടി തയ്യാറാകുന്നതാണ് യഥാർത്ഥ മാധ്യമധർമ്മമെന്ന് ഉപരാഷ്ട്രപതി സി.പി.രാധാകൃഷ്ണൻ പറഞ്ഞു. കോട്ടയത്ത് ദീപിക ദിനപത്രത്തിന്റെ 140-ാം വാർഷികാഘോഷങ്ങൾ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കേവലം വാർത്തകൾ റിപ്പോർട്ട് ചെയ്യുന്നതിനപ്പുറം വലിയൊരു സാമൂഹിക ഉത്തരവാദിത്തം മാധ്യമങ്ങൾക്കുണ്ടെന്ന് അദ്ദേഹം ഓർമ്മിപ്പിച്ചു. സമൂഹത്തിൽ പോസിറ്റീവായ മാറ്റങ്ങൾ ഉണ്ടാക്കുന്ന സൃഷ്ടിപരമായ മാധ്യമപ്രവർത്തനം യുവജനങ്ങളിൽ വലിയ ആത്മവിശ്വാസം വളർത്തുമെന്നും, അത് അവരെ രാഷ്ട്രനിർമ്മാണ പ്രക്രിയയിൽ പങ്കാളികളാകാൻ വലിയ രീതിയിൽ പ്രചോദിപ്പിക്കുമെന്നും അദ്ദേഹം കൂട്ടിച്ചേർത്തു. എന്നാൽ ഇന്നത്തെ ഡിജിറ്റൽ യുഗത്തിൽ വ്യാജ വാർത്തകളും, വിശ്വാസ്യതയിലുണ്ടാകുന്ന ഇടിവും, വാണിജ്യപരമായ സമ്മർദ്ദങ്ങളും മാധ്യമരംഗം നേരിടുന്ന വലിയ വെല്ലുവിളികളാണെന്നും ഉപരാഷ്ട്രപതി ചൂണ്ടിക്കാണിച്ചു.
​പ്രൗഢഗംഭീരമായ ചടങ്ങിൽ വേദിയിലുണ്ടായിരുന്ന മുഖ്യപ്രഭാഷകനായ മുഖ്യമന്ത്രി വി.ഡി.സതീശന് ജന്മദിനാശംസകൾ നേർന്നുകൊണ്ടായിരുന്നു ഉപരാഷ്ട്രപതി തന്റെ പ്രസംഗത്തിന് തുടക്കമിട്ടത്. സദസ്സിലുള്ള മുഴുവൻ ആളുകളോടും എഴുന്നേറ്റ് നിന്ന് കൈയടിച്ചുകൊണ്ട് മുഖ്യമന്ത്രിക്ക് ആശംസകൾ നേരാൻ അദ്ദേഹം ആവശ്യപ്പെട്ടത് ചടങ്ങിൽ വേറിട്ടൊരു അനുഭവമായി മാറി. ഗവർണർ രാജേന്ദ്ര വിശ്വനാഥ് ആർലേക്കർ, സ്പീക്കർ തിരുവഞ്ചൂർ രാധാകൃഷ്ണൻ, മന്ത്രി മോൻസ് ജോസഫ്, ഫ്രാൻസിസ് ജോർജ് എം.പി, പശ്ചിമബംഗാൾ മുൻ ഗവർണർ സി.വി.ആനന്ദബോസ് എന്നിവരും കോട്ടയം ആർച്ച് ബിഷപ്പ് മാത്യു മൂലക്കാട്ട്, രാഷ്ട്ര ദീപിക ചെയർമാൻ ഡോ. ഫ്രാൻസിസ് ക്ളീറ്റസ്, മാനേജിംഗ് ഡയറക്ടർ ഫാ. മൈക്കിൾ വെട്ടിക്കാട്ട്, ചീഫ് എഡിറ്റർ ഫാ. ഡോ. ജോർജ് കുടിലിൽ തുടങ്ങി രാഷ്ട്രീയ-സാമൂഹിക-ആത്മീയ രംഗങ്ങളിലെ പ്രമുഖർ ചടങ്ങിൽ ഉടനീളം പങ്കെടുത്തു.

Photo Courtesy - Google