ന്യൂഡൽഹി/ദോഹ :ആർട്ടിഫിഷ്യൽ ഇന്റലിജൻസ് മനുഷ്യരാശിയുടെ പുരോഗതിക്കായി എങ്ങനെ പ്രയോജനപ്പെടുത്താം എന്ന ലക്ഷ്യത്തോടെ സംഘടിപ്പിച്ച 'എഐ ഇംപാക്ട് സമ്മിറ്റ് 2026' ശ്രദ്ധേയമായി. നൂറിലധികം രാജ്യങ്ങളിൽ നിന്നുള്ള പ്രതിനിധികളും നൂതന സംരംഭകരും പങ്കെടുത്ത ഉച്ചകോടിയിൽ, സാങ്കേതികവിദ്യ ആത്യന്തികമായി മനുഷ്യക്ഷേമത്തിന് വേണ്ടിയാകണമെന്ന (Human-Centric AI) ഉറച്ച നിലപാടാണ് ഇന്ത്യ മുന്നോട്ടുവെച്ചത്.എഐയുടെ വളർച്ചയെ നിയന്ത്രിക്കാനും ഉത്തരവാദിത്തം ഉറപ്പാക്കാനും ഇന്ത്യ MANAV എന്ന അഞ്ചു തത്വങ്ങളടങ്ങിയ ചട്ടക്കൂട് അവതരിപ്പിച്ചു:
​M (Ethical Systems) ധാർമ്മിക മൂല്യങ്ങളിൽ അധിഷ്ഠിതമായ സംവിധാനങ്ങൾ,
​A (Responsible Governance) സുതാര്യവും ശക്തവുമായ ഭരണം,
​N (National Sovereignty) ഡാറ്റാ പരമാധികാരം ഉറപ്പാക്കൽ,
​A (Accessibility & Inclusion) എല്ലാവരിലേക്കും സാങ്കേതികവിദ്യ എത്തിക്കുക,
​V (Validity & Legality): നിയമസാധുതയും കൃത്യതയും ഉറപ്പുവരുത്തുകഎന്നിവയാണ് ഇന്ത്യ അവതരിപ്പിച്ച MANAV എന്ന അഞ്ചു തത്വങ്ങളടങ്ങിയ ചട്ടക്കൂട്.ഇന്ത്യയിലെ സാധാരണക്കാരുടെ ജീവിതത്തിൽ എഐ വരുത്തിയ മാറ്റങ്ങൾ ഉച്ചകോടിയിൽ ചർച്ചയായി. അമുൽ (AMUL) പുറത്തിറക്കിയ 'സരളാബെൻ' എന്ന എഐ അസിസ്റ്റന്റ് 36 ലക്ഷം ക്ഷീരകർഷകർക്ക് അവരുടെ സ്വന്തം ഭാഷയിൽ സേവനം നൽകുന്നതും, കർഷകർക്കായി കാലാവസ്ഥാ-വിപണി വിവരങ്ങൾ നൽകുന്ന 'ഭാരത് വിസ്താർ' പ്ലാറ്റ്‌ഫോമും ലോകശ്രദ്ധ നേടി.ഡീപ് ഫെയ്ക്കുകൾ, തെറ്റായ വിവരങ്ങൾ എന്നിവ ജനാധിപത്യ സമൂഹങ്ങൾക്ക് ഭീഷണിയാണെന്ന് ഉച്ചകോടി വിലയിരുത്തി. ഭക്ഷണപദാർത്ഥങ്ങളിലെ ലേബലുകൾ പോലെ ഡിജിറ്റൽ ഉള്ളടക്കങ്ങളിലും അവയുടെ ഉറവിടം വ്യക്തമാക്കുന്ന വാട്ടർമാർക്കിംഗും ആധികാരികതയും നിർബന്ധമാക്കണമെന്ന് ഇന്ത്യ ആഗോള സമൂഹത്തോട് അഭ്യർത്ഥിച്ചു.ലോകത്തിലെ ഏറ്റവും വലിയ യുവതലമുറയും സാങ്കേതിക നൈപുണ്യവുമുള്ള രാജ്യമായ ഇന്ത്യ, എഐ മേഖലയിൽ വൻ നിക്ഷേപമാണ് നടത്തുന്നത്. ആയിരക്കണക്കിന് ജിപിയു (GPU) യൂണിറ്റുകൾ വിന്യസിച്ചും 'നാഷണൽ എഐ റിപ്പോസിറ്ററി' സ്ഥാപിച്ചും സ്റ്റാർട്ടപ്പുകൾക്ക് കുറഞ്ഞ ചിലവിൽ ഗവേഷണ സൗകര്യങ്ങൾ ഇന്ത്യ ഒരുക്കുന്നുണ്ട്. 'ഇന്ത്യയിൽ രൂപകൽപ്പന ചെയ്യൂ, ലോകത്തിനായി സമർപ്പിക്കൂ'എന്ന ആഹ്വാനത്തോടെയാണ് ഉച്ചകോടി സമാപിച്ചത്.