2026 ജൂലൈ 24-ന് ഐസിബിഎഫ് കഞ്ജാണി ഹാളിൽ നടന്ന പരിപാടിയിൽ ദോഹയിലെ വിവിധ ലേബർ ക്യാമ്പുകളിൽ നിന്നുള്ള നിരവധി  തൊഴിലാളികൾ പങ്കെടുത്തു . വേനൽക്കാലത്തെ കടുത്ത ചൂടിനിടയിലും ഇന്ത്യൻ പ്രവാസി സമൂഹത്തിന്റെ ആരോഗ്യവും സുരക്ഷയും ക്ഷേമവും ഉറപ്പാക്കാനുള്ള ഐ.സി.ബി.എഫിന്റെ പ്രതിബദ്ധത ഒരിക്കൽക്കൂടി തെളിയിക്കുന്നതായിരുന്നു ഈ സംരംഭം.

ഇന്ത്യൻ എംബസിയിലെ അറ്റാഷെ ശ്രീ ചന്ദൻ കുമാർ ശ്രീവാസ്തവ ചടങ്ങിൽ മുഖ്യാതിഥിയായി പങ്കെടുത്തു. തന്റെ പ്രസംഗത്തിൽ, സമൂഹസേവന രംഗത്ത് ഐസിബിഎഫ് നേതൃത്വം കാഴ്ചവെക്കുന്ന അർപ്പണബോധത്തെ അദ്ദേഹം പ്രശംസിക്കുകയും, ഐസിബിഎഫിന്റെ ക്ഷേമ പ്രവർത്തനങ്ങൾക്ക് ഇന്ത്യൻ എംബസിയുടെ തുടർ പിന്തുണ ഉറപ്പുനൽകുകയും ചെയ്തു.

ഹീറ്റ് സ്ട്രെസ് സംബന്ധിച്ച ബോധവൽക്കരണം ഇന്നത്തെ കാലഘട്ടത്തിന്റെ അനിവാര്യതയാണെന്ന് അദ്ദേഹം ചൂണ്ടിക്കാട്ടി. കടുത്ത വേനൽച്ചൂടിൽ ജോലി ചെയ്യുന്ന തൊഴിലാളികൾ ആരോഗ്യകാര്യങ്ങളിൽ പ്രത്യേകം ശ്രദ്ധ പുലർത്തണമെന്നും, ആവശ്യത്തിന് വെള്ളം കുടിച്ച് ശരീരത്തിൽ ജലാംശം നിലനിർത്തണമെന്നും, ജോലി സ്ഥലങ്ങളിൽ ആവശ്യമായ എല്ലാ സുരക്ഷാ മുൻകരുതലുകളും സ്വീകരിക്കണമെന്നും അദ്ദേഹം നിർദേശിച്ചു. അവരുടെ കുടുംബങ്ങളും പ്രിയപ്പെട്ടവരും അവരുടെ സുരക്ഷിതമായ തിരിച്ചുവരവിനായി കാത്തിരിക്കുകയാണെന്ന കാര്യം മറക്കരുതെന്നും അദ്ദേഹം ഓർമ്മിപ്പിച്ചു.

ഐ.സി.ബി.എഫ് പ്രസിഡന്റ് ശ്രീ ഷാനവാസ് ബാവ തന്റെ അധ്യക്ഷ പ്രസംഗത്തിൽ, ഇന്ത്യൻ പ്രവാസി സമൂഹത്തിന്റെ ക്ഷേമത്തിനും പരാതികൾ പരിഹരിക്കുന്നതിനും കോൺസുലർ സേവനങ്ങൾ ഉൾപ്പെടെ ഇന്ത്യൻ എംബസി നൽകി വരുന്ന തുടർച്ചയായ പിന്തുണയ്ക്ക് നന്ദി രേഖപ്പെടുത്തി. കൂടാതെ, ഈ ബോധവൽക്കരണ പരിപാടിയുടെ സഹ സംഘാടകരായ തെലങ്കാന ഗൾഫ് സമിതി (TGS) ഖത്തറിനും അദ്ദേഹം പ്രത്യേകം നന്ദി അറിയിച്ചു.

ബിൽഡിംഗ് ആൻഡ് വുഡ് വർക്കേഴ്സ് ഇന്റർനാഷണൽ (BWI)-ലെ ഒക്ക്യുപേഷണൽ സേഫ്റ്റി ആൻഡ് ഹെൽത്ത് (OSH) കോ-ഓർഡിനേറ്ററായ ശ്രീ ബിമൽ സുബേദി സാങ്കേതിക ബോധവൽക്കരണ ക്ലാസ് നയിച്ചു. ജോലി സ്ഥലങ്ങളിലും താമസ ക്യാമ്പുകളിലും മതിയായ അളവിൽ വെള്ളം കുടിക്കേണ്ടതിന്റെ പ്രാധാന്യവും ആരോഗ്യകരമായ ശീലങ്ങൾ പാലിക്കേണ്ടതിന്റെ ആവശ്യകതയും അദ്ദേഹം വിശദീകരിച്ചു.

ഉയർന്ന താപനിലയോ കഠിനമായ ശാരീരിക അധ്വാനമോ മൂലം ശരീരത്തിന് സ്വാഭാവികമായി തണുക്കാൻ കഴിയാതെ വരുമ്പോഴാണ് ഹീറ്റ് സ്ട്രെസ് ഉണ്ടാകുന്നതെന്ന് അദ്ദേഹം വ്യക്തമാക്കി. ആവശ്യത്തിന് വെള്ളം കുടിക്കുക, തണലുള്ള സ്ഥലങ്ങളിൽ ഇടവേളകൾ എടുക്കുക, ഇളം നിറത്തിലുള്ള വസ്ത്രങ്ങൾ ധരിക്കുക, തലകറക്കം, അമിതമായ വിയർപ്പ്, ക്ഷീണം, നിർജലീകരണം തുടങ്ങിയ പ്രാരംഭ ലക്ഷണങ്ങൾ തിരിച്ചറിയുക എന്നിവയുടെ പ്രാധാന്യം അദ്ദേഹം ഊന്നിപ്പറഞ്ഞു. സമയബന്ധിതമായ മുൻകരുതലുകൾ സ്വീകരിച്ചാൽ ഗുരുതരമായ ചൂട് സംബന്ധമായ ആരോഗ്യപ്രശ്നങ്ങൾ ഫലപ്രദമായി തടയാനാകുമെന്നും അദ്ദേഹം കൂട്ടിച്ചേർത്തു.

ടി.ജി.എസ് പ്രസിഡന്റ് ശ്രീ മധുകർ മൈദം ചടങ്ങിനെ അഭിസംബോധന ചെയ്ത് പരിപാടിയുടെ സഹസംഘാടകരാകാൻ അവസരം നൽകിയ ഐസിബിഎഫിന് നന്ദി രേഖപ്പെടുത്തി. ഐ.സി.ബി.എഫ് അഡ്വൈസറി കൗൺസിൽ ചെയർമാൻ ശ്രീ കെ. എസ്. പ്രസാദ്, ലേബർ വിഭാഗം മേധാവി ശ്രീ ശങ്കർ ഗൗഡ് എന്നിവർ ആശംസകൾ അർപ്പിച്ചു. ജനറൽ സെക്രട്ടറി ശ്രീ ദീപക് ഷെട്ടി സ്വാഗത പ്രസംഗം നടത്തി. സെക്രട്ടറി ശ്രീ ജാഫർ തയിൽ നന്ദിപ്രസംഗം നിർവഹിച്ചു. പരിപാടിയുടെ ഏകോപനം മാനേജിംഗ് കമ്മിറ്റി അംഗങ്ങളായ ശ്രീ ഇർഫാൻ അൻസാരി, ശ്രീ മണി ഭാരതി, ശ്രീമതി മിനി സിബി, ശ്രീ അമർവീർ സിംഗ്, ശ്രീമതി നീലാംബരി എസ്. എന്നിവർ നിർവഹിച്ചു.

ഹീറ്റ് സ്ട്രെസ് സംബന്ധിച്ച അവബോധം വർധിപ്പിക്കുന്നതിനും പ്രവാസി തൊഴിലാളികളുടെ ആരോഗ്യവും സുരക്ഷയും ഉറപ്പാക്കുന്നതിനുമായി ഇത്തരത്തിലുള്ള ബോധവൽക്കരണ പരിപാടികൾ തുടർന്നും സംഘടിപ്പിക്കുമെന്ന് ഐസിബിഎഫ് ഭാരവാഹികൾ അറിയിച്ചു.