തിരുവനന്തപുരം: സംസ്ഥാനത്ത് ഇനി സർക്കാരിന്റെ അറിവോ അനുമതിയോ ഇല്ലാതെ ബാറുകൾക്ക് ലൈസൻസ് അനുവദിക്കില്ലെന്ന് മുഖ്യമന്ത്രി വി.ഡി. സതീശൻ. എക്സൈസ് കമ്മിഷണർക്കും ഡെപ്യൂട്ടി കമ്മിഷണർക്കും സ്വന്തം നിലയിൽ ബാർ ലൈസൻസ് നൽകാൻ അധികാരം നൽകുന്ന നിലവിലെ രീതി മാറ്റുമെന്നും അദ്ദേഹം വ്യക്തമാക്കി. സർക്കാരിന്റെ പുതിയ മദ്യനയം ഉടൻ പ്രഖ്യാപിക്കുമെന്നും അതിന്റെ അടിസ്ഥാനത്തിലായിരിക്കും ഇനി ബാർ ലൈസൻസുകൾ അനുവദിക്കുകയെന്നും മുഖ്യമന്ത്രി പറഞ്ഞു.
മുൻ സർക്കാരിന്റെ കാലത്താണ് എക്സൈസ് മന്ത്രിയുടെ അറിവില്ലാതെ ഉദ്യോഗസ്ഥർക്ക് ബാർ ലൈസൻസ് അനുവദിക്കാൻ കഴിയുന്ന സാഹചര്യം സൃഷ്ടിച്ചതെന്ന് മുഖ്യമന്ത്രി ആരോപിച്ചു. ഈ രീതി ഇപ്പോഴും തുടരുന്നുണ്ടെന്നും ഇത് മാറ്റേണ്ടത് അനിവാര്യമാണെന്നും അദ്ദേഹം ചൂണ്ടിക്കാട്ടി.
ഒരു ബാറിന് ലൈസൻസ് നൽകുന്ന കാര്യം സർക്കാരും മന്ത്രിയും അറിയേണ്ടതുണ്ട്. ഉന്നത ഉദ്യോഗസ്ഥർക്ക് മാത്രം ഇക്കാര്യത്തിൽ തീരുമാനമെടുക്കാൻ കഴിയുന്നത് നിയന്ത്രണമില്ലാത്ത അവസ്ഥയിലേക്ക് നയിക്കുമെന്നും മുഖ്യമന്ത്രി അഭിപ്രായപ്പെട്ടു.
സംസ്ഥാനത്തെ മദ്യവിൽപ്പനയും ബാർ ലൈസൻസ് അനുവദിക്കലും സർക്കാരിന്റെ നയപരമായ നിയന്ത്രണത്തിലായിരിക്കണം. പുതിയ മദ്യനയം നിലവിൽ വരുന്നതോടെ അതിലെ വ്യവസ്ഥകൾ പാലിച്ചായിരിക്കും ബാറുകൾക്ക് അനുമതി നൽകുകയെന്നും മുഖ്യമന്ത്രി വ്യക്തമാക്കി.
