തിരുവനന്തപുരം: സംസ്ഥാനത്ത് വീര്യം കുറഞ്ഞ മദ്യം വിപണിയിലിറക്കുന്ന കാര്യത്തിൽ അന്തിമ തീരുമാനം യു.ഡി.എഫ് മുന്നണി ചർച്ച ചെയ്തതിന് ശേഷം മാത്രമേ കൈക്കൊള്ളുകയുള്ളൂവെന്ന് എക്സൈസ് മന്ത്രി എം. ലിജു വാർത്താസമ്മേളനത്തിൽ അറിയിച്ചു. സംസ്ഥാന ബഡ്ജറ്റിൽ വീര്യം കുറഞ്ഞ മദ്യത്തിനായി കുറഞ്ഞ നികുതി ഘടന പ്രഖ്യാപിച്ചു എന്നതുമാത്രമാണ് ഇപ്പോൾ സംഭവിച്ചിട്ടുള്ളത്. അതിനർത്ഥം ഇത്തരം മദ്യം വിൽക്കാൻ തീരുമാനിച്ചു എന്നല്ലെന്നും മന്ത്രി വ്യക്തമാക്കി.
​പുതിയ മദ്യനയം പ്രഖ്യാപിക്കുന്നതിന് മുൻപായി വീര്യം കുറഞ്ഞ മദ്യം വിൽക്കാൻ അനുമതി തേടി ആരെങ്കിലും അപേക്ഷ നൽകിയാൽ അത് പൂർണ്ണമായും നിരസിക്കും. ഏത് തരത്തിലുള്ള മദ്യം വിൽക്കണമെങ്കിലും എക്സൈസ് കമ്മിഷണർക്ക് കൃത്യമായ അപേക്ഷ നൽകി ബ്രാൻഡ് രജിസ്റ്റർ ചെയ്യേണ്ടതുണ്ട്. ബഡ്ജറ്റിൽ വീര്യം കുറഞ്ഞ മദ്യത്തിന് നികുതി നിശ്ചയിച്ചതിൽ തനിക്ക് വിയോജിപ്പില്ല. എന്നാൽ ബഡ്ജറ്റിൽ എത്ര നികുതി ഏർപ്പെടുത്തണമെന്ന് തീരുമാനിക്കുന്നത് മന്ത്രിമാരോട് ചോദിച്ചിട്ടല്ലല്ലോ എന്നും മന്ത്രി കൂട്ടിച്ചേർത്തു.
​അന്തിമവാക്ക് മദ്യനയം; ലക്ഷ്യം ഉപഭോഗം കുറയ്ക്കൽ
​മദ്യവില്പനയുമായി ബന്ധപ്പെട്ട എല്ലാ കാര്യങ്ങളിലും അന്തിമവാക്ക് സംസ്ഥാനത്തിന്റെ മദ്യനയമാണ്. ഘട്ടംഘട്ടമായി മദ്യത്തിന്റെ ഉപഭോഗം കുറച്ചുകൊണ്ടുവരിക എന്നതാണ് സർക്കാരിന്റെ പ്രഖ്യാപിത നയം. വരാനിരിക്കുന്ന നിയമസഭാ സമ്മേളനത്തിന് ശേഷം എക്സൈസ് വകുപ്പ് പുതിയ മദ്യനയത്തിന്റെ പ്രാരംഭ പ്രവർത്തനങ്ങളിലേക്ക് കടക്കും. സംസ്ഥാനത്തിന് അനുയോജ്യമായ, പുരോഗമനപരമായ ഒരു മദ്യനയത്തിനാവും സർക്കാർ രൂപം നൽകുക. വിഷയത്തിൽ മുതിർന്ന കോൺഗ്രസ് നേതാവ് വി.എം. സുധീരൻ ഉന്നയിച്ച വിമർശനങ്ങളെക്കുറിച്ചുള്ള ചോദ്യത്തിന്, സുധീരൻ സ്വന്തം അഭിപ്രായം പറഞ്ഞതിൽ യാതൊരു തെറ്റുമില്ലെന്നായിരുന്നു മന്ത്രിയുടെ പ്രതികരണം.

​ജവാൻ ഉത്പാദനം നിലച്ചതിൽ ഗുരുതര വീഴ്ച; കർശന നടപടി

​സംസ്ഥാനത്ത് ജനപ്രിയ ബ്രാൻഡായ 'ജവാൻ' മദ്യത്തിന്റെ ഉത്പാദനം നിലച്ചത് ഗുരുതരമായ വീഴ്ചയാണെന്ന് എക്സൈസ് മന്ത്രി ചൂണ്ടിക്കാട്ടി. യു.ഡി.എഫ് സർക്കാർ അധികാരത്തിലെത്തുന്നതിന് മുൻപ് തന്നെ ജവാന്റെ 750 എം.എൽ. കുപ്പികളുടെ ഉത്പാദനം നിലച്ചിരുന്നു. കുപ്പികളുടെയും ലേബലുകളുടെയും ക്ഷാമമാണ് ഇതിന് കാരണമായി പറയുന്നത്. എന്നാൽ, ഈ പ്രതിസന്ധിയെക്കുറിച്ച് എക്സൈസ് വകുപ്പിനെ യഥാസമയം അറിയിക്കുന്നതിൽ ബന്ധപ്പെട്ടവർ പരാജയപ്പെട്ടു.
​ഭാവിയിൽ ഇത്തരം ഉത്പാദന പ്രതിസന്ധികൾ ഉണ്ടാകാതിരിക്കാൻ ആവശ്യമായ കർശന നടപടികൾ സ്വീകരിക്കും. ഉത്പാദനം നിലച്ചതു വഴി സർക്കാരിനുണ്ടായ റവന്യൂ നഷ്ടം കൃത്യമായി കണക്കാക്കാനും, ഈ വീഴ്ചയ്ക്ക് ഉത്തരവാദികളായ ഉദ്യോഗസ്ഥരെ കണ്ടെത്താനും നികുതി വകുപ്പ് സെക്രട്ടറിയെ ചുമതലപ്പെടുത്തിയിട്ടുണ്ട്. അന്വേഷണ റിപ്പോർട്ട് ലഭിച്ചാലുടൻ കുറ്റക്കാർക്കെതിരെ കർശനമായ നടപടികൾ സ്വീകരിക്കുമെന്നും മന്ത്രി ലിജു  ഉറപ്പുനൽകി.