ന്യൂയോർക്ക്: ലോകം ഉറ്റുനോക്കുന്ന ഫിഫ ലോകകപ്പ് ഫൈനലിന്റെ ആദ്യ പകുതിയിൽ അർജന്റീനയും സ്‌പെയിനും ഗോൾ കണ്ടെത്താനാകാതെ പിരിഞ്ഞു. പന്തടക്കത്തിലും പാസിങ് മികവിലും സ്പെയിൻ മേൽക്കൈ നേടിയെങ്കിലും അർജന്റീനയുടെ ഉറച്ച പ്രതിരോധം അവരുടെ മുന്നേറ്റങ്ങളെ പലതവണ തടഞ്ഞു.

കളി തുടങ്ങി അഞ്ചാം മിനിറ്റിൽ തന്നെ ലമീൻ യമാൽ നടത്തിയ അപകടകരമായ മുന്നേറ്റം അർജന്റീനയെ സമ്മർദത്തിലാക്കി. എന്നാൽ ഗോൾമുഖത്തേക്കുള്ള ഷോട്ട് എമിലിയാനോ മാർട്ടിനെസ് മനോഹരമായി രക്ഷപ്പെടുത്തി. തൊട്ടുപിന്നാലെ വന്ന മറ്റൊരു സ്പാനിഷ് ശ്രമവും മാർട്ടിനെസ് തടഞ്ഞതോടെ അർജന്റീന വലിയ തിരിച്ചടി ഒഴിവാക്കി.

വലതുവിങ്ങിലൂടെ യമാൽ തുടർച്ചയായി ആക്രമണം നയിച്ചപ്പോൾ, മധ്യനിരയിൽ സ്പെയിൻ പന്ത് നിയന്ത്രിച്ച് കളിയുടെ താളം കൈവശംവച്ചു. അതേസമയം, ശാരീരിക മികവ് മുൻനിർത്തിയ അർജന്റീന, സ്പാനിഷ് താരങ്ങൾക്ക് സ്വതന്ത്രമായി നീങ്ങാൻ അവസരം നൽകാതെയാണ് മത്സരം മുന്നോട്ടുകൊണ്ടുപോയത്.

ലയണൽ മെസ്സിയെ തുടക്കം മുതൽ തന്നെ കർശനമായി നിരീക്ഷിച്ച സ്പാനിഷ് പ്രതിരോധം, ആദ്യ 20 മിനിറ്റിൽ അദ്ദേഹത്തെ കളിയിൽ നിന്ന് ഏറെക്കുറെ അകറ്റിനിർത്തി. ഈ സമയത്തിനിടെ മെസ്സിക്ക് വെറും രണ്ട് തവണ മാത്രമാണ് പന്ത് ലഭിച്ചത്.

സ്‌പെയിൻ നിരന്തരം അവസാന മൂന്നിലേക്കെത്തിയെങ്കിലും നിർണായക ഫിനിഷിങ് ഇല്ലാതിരുന്നത് അവർക്ക് തിരിച്ചടിയായി. മറുവശത്ത്, അർജന്റീന പ്രതിരോധത്തിൽ ഉറച്ചുനിന്നെങ്കിലും ആക്രമണത്തിൽ കാര്യമായ ഭീഷണി ഉയർത്താൻ കഴിഞ്ഞില്ല.

ഇതിനിടെ, 2014, 2022, 2026 ലോകകപ്പ് ഫൈനലുകളിൽ ആദ്യ ഇലവനിൽ ഇറങ്ങുന്ന ആദ്യ ഫുട്ബോൾ താരമെന്ന അപൂർവ റെക്കോർഡും ലയണൽ മെസ്സി സ്വന്തം പേരിലാക്കി. ആദ്യ പകുതി അവസാനിക്കുമ്പോൾ ഇരു ടീമുകളും ഗോൾരഹിത സമനിലയിലാണ്.