​ദോഹ: അറിവിന്റെയും അക്ഷരങ്ങളുടെയും ഉത്സവമായ 35-ാമത് ദോഹ അന്താരാഷ്ട്ര പുസ്തകമേള (DIBF) വെറുമൊരു പുസ്തക പ്രദർശനം എന്നതിനപ്പുറം സന്ദർശകർക്ക് പുത്തൻ ഹോബികളും സർഗ്ഗാത്മകതയും സമ്മാനിക്കുന്ന വേദിയായി മാറുന്നു. ദോഹ എക്സിബിഷൻ ആൻഡ് കൺവെൻഷൻ സെന്ററിൽ (DECC)  നടക്കുന്ന മേളഇന്ന് അവസാനിക്കും.
അറബിക് കാലിഗ്രാഫിയുടെ മനോഹാരിതയും 'പെയിന്റ്-ബൈ-നമ്പേഴ്സ്' കിറ്റുകളുടെ വൈവിധ്യവുമാണ് ഇത്തവണ പുസ്തകപ്രേമികളെ ആകർഷിക്കുന്ന പ്രധാന ഘടകങ്ങൾ.
​പുസ്തകങ്ങൾ തേടിയെത്തുന്നവർക്ക് തങ്ങളുടെ ഉള്ളിലെ കലാകാരനെ തൊട്ടുണർത്താനുള്ള സുവർണ്ണാവസരമാണ് മേളയിലെ വിവിധ സ്റ്റാളുകൾ ഒരുക്കിയിരിക്കുന്നത്.മേളയിലെ ഏറ്റവും ശ്രദ്ധേയമായ സാന്നിധ്യങ്ങളിലൊന്ന് അൽ വക്ര ഓൾഡ് സൂഖിൽ പ്രവർത്തിക്കുന്ന 'രഷാ ആൻഡ് ഹെബർ ഫോർ അറബിക് കാലിഗ്രാഫി' (Resha and Hebr) എന്ന സ്റ്റാളാണ്. കഴിഞ്ഞ ആറ് വർഷമായി പുസ്തകമേളയിൽ സജീവ സാന്നിധ്യമായ നാജി അൽസായിഗ് (Nagi Alsaygh) എന്ന ഖത്തരി സ്വദേശിയുടേതാണ് ഈ സംരംഭം.സ്വർണ്ണപ്പണിക്കാരൻ എന്നർത്ഥം വരുന്ന 'അൽസായിഗ്' കുടുംബപ്പേര് ദോഹയിൽ വളരെ പ്രശസ്തമാണ്. തന്റെ പിതാവ് ഉമർ പതിറ്റാണ്ടുകളായി ദോഹയിൽ നടത്തിയിരുന്ന സ്വർണ്ണവ്യാപാരത്തിൽ നിന്നും വ്യത്യസ്തമായി, ഖത്തരി പൈതൃകം സംരക്ഷിക്കാൻ നാജി തിരഞ്ഞെടുത്തത് അറബിക് കാലിഗ്രാഫിയുടെ ലോകമാണ്.സ്കൂൾ കാലഘട്ടത്തിൽ കാലിഗ്രാഫിയോട് തോന്നിയ ഇഷ്ടം, അമേരിക്കയിലെ ഉപരിപഠനത്തിനും കോർപ്പറേറ്റ് കരിയറിനും ശേഷം വിരമിച്ചപ്പോഴാണ് മകളുടെ പ്രോത്സാഹനത്തോടെ അദ്ദേഹം വീണ്ടെടുത്തത്. നിലവിൽ യുവാക്കൾക്കിടയിൽ കാലിഗ്രാഫിയോട് വലിയ താല്പര്യം കണ്ടുവരുന്നതായി അദ്ദേഹം സാക്ഷ്യപ്പെടുത്തുന്നു.
​നാജിയുടെ സ്റ്റാളിൽ എത്തുന്നവർക്ക് തങ്ങളുടെ പേരെഴുതിയ ബുക്ക്മാർക്കുകളും ചെറിയ കാലിഗ്രാഫി സമ്മാനങ്ങളും സ്വന്തമാക്കാം. കൂടാതെ കാലിഗ്രാഫിക്കുള്ള പേനകൾ, നിബുകൾ, മഷികൾ, ആകർഷകമായ തൂവൽ പേനകൾ (Feather dip pens) എന്നിവയുടെ വലിയ ശേഖരവും ഇവിടെയുണ്ട്.കുട്ടികളുടെ വിനോദമായി മാത്രം കണ്ടിരുന്ന 'പെയിന്റ് ബൈ നമ്പേഴ്സ്' (Paint by numbers) കിറ്റുകൾക്ക് ഇത്തവണ മുതിർന്നവർക്കിടയിലും വൻ സ്വീകാര്യതയാണ് ലഭിക്കുന്നത്. മൊറോക്കോയിൽ നിന്നുള്ള 'സെസാൻ പബ്ലിഷിംഗ്' (Cezanne Publishing) സ്റ്റാളാണ് ഇതിൽ മുന്നിൽ.
​"ആറ് വയസ്സുള്ള കുട്ടികൾ മുതൽ പ്രായമായവർ വരെ ഞങ്ങളുടെ സ്റ്റാളിലെ സ്ഥിരം ഉപഭോക്താക്കളാണ്. വാൻഗോഗ് (Van Gogh), മോനെ (Monet) തുടങ്ങിയ ലോകപ്രശസ്ത ചിത്രകാരന്മാരുടെ വിഖ്യാത പെയിന്റിംഗുകൾ നമ്പറുകൾ നോക്കി സ്വന്തമായി വരച്ചെടുക്കാവുന്ന കിറ്റുകൾക്ക് യുവാക്കൾക്കിടയിൽ വലിയ ഡിമാൻഡുണ്ടെന്ന് സെസാൻ പബ്ലിഷിംഗ്ജനറൽ മാനേജർസൌമിയ എൽ-മെക്നാസിപറഞ്ഞു.വായനയും അറിവും പങ്കുവെക്കുന്നതിനൊപ്പം, പുതിയൊരു കലാസംസ്കാരത്തെയും ഹോബികളെയും ജനങ്ങളിലേക്ക് എത്തിക്കാൻ ഇത്തവണത്തെ ദോഹ അന്താരാഷ്ട്ര പുസ്തകമേളയ്ക്ക് സാധിക്കുന്നുണ്ടെന്ന് സംഘാടകർ വ്യക്തമാക്കുന്നു.