സർക്കാരിന് ലഭിച്ച് മന്ത്രിസഭ ചർച്ച ചെയ്യുന്നതിന് മുമ്പ് മുനമ്പം കമ്മിഷൻ റിപ്പോർട്ടിലെ ശുപാർശകളുടെ ഉള്ളടക്കം കമ്മിഷൻ പുറത്ത് വിട്ടതിനെ സംബന്ധിച്ച പരാതി ഉചിത നടപടി സ്വീകരിക്കുവാൻ നിർദ്ദേശിച്ച് മുഖ്യമന്ത്രിയുടെ ഓഫീസ്.ഹൈക്കോടതി അഭിഭാഷകനും പൊതു പ്രവർത്തകനുമായ അഡ്വ. കുളത്തൂർ ജയ്‌സിങ് നൽകിയ പരാതിയിൻ മേലാണ് ഇത് സംബന്ധിച്ച നിർദ്ദേശം മുഖ്യമന്ത്രിയുടെ ഓഫീസിൽ നിന്ന് ഉണ്ടായിരിക്കുന്നത്.'സർക്കാർ നിയോഗിക്കുന്ന കമ്മിഷന്റെ റിപ്പോർട്ടുകൾ രഹസ്യ സ്വഭാവം ഉള്ളതാണ്. കമ്മിഷൻ റിപ്പോർട്ടുകളുടെ ശുപാർശകൾ സർക്കാറിന് സമർപ്പിച്ച് മന്ത്രിസഭ ചർച്ച ചെയ്യുന്നതിന് മുമ്പ് കമ്മിഷൻ പുറത്ത് വെളിപ്പെടുത്തുവാൻ പാടില്ല. കമ്മിഷൻ റിപ്പോർട്ടുകൾ നിയമസഭയുടെ മേശപ്പുറത്ത് വച്ചതിന് ശേഷമേ പൊതു രേഖയായി മാറുന്നുള്ളൂ.എന്നാൽ മുനമ്പം കമ്മിഷൻ റിപ്പോർട്ടിലെ ശുപാർശകളുടെ പ്രശസ്ത ഉള്ളടക്കം കഴിഞ്ഞ ദിവസം വെളിപ്പെടുത്തിയത് മാനദണ്ഡങ്ങൾക്ക് വിരുദ്ധമാണ്. അതിനാൽ ഇക്കാര്യത്തിൽ കമ്മിഷന് എതിരെ നടപടി വേണമെന്നാണ് അഡ്വ. കുളത്തൂർ ജയ്‌സിങ് മുഖ്യമന്ത്രിക്ക് നൽകിയ പരാതിയിൽ ആവശ്യപ്പെടുന്നത്. കമ്മിഷൻ റിപ്പോർട്ടുകൾ സമർപ്പിക്കുന്നത് സംബന്ധിച്ച വിവരങ്ങൾ മാത്രമേ കമ്മിഷന് പുറത്ത് വിടുവാൻ അധികാരമുള്ളൂ. എന്നാൽ സർക്കാറിന് ലഭിക്കുന്നതിന് മുമ്പ് കമ്മിഷൻ ശുപാർശകളുടെ പ്രശസ്ത ഉള്ളടക്കം പുറത്ത് വന്നതിലൂടെ അനാവശ്യ ആശങ്കകൾക്ക് വഴിയൊരുക്കിയെന്നും പരാതിയിൽ പറയുന്നു.
