​ദോഹ: ഖത്തറിന്റെ തീരങ്ങളിൽ അപൂർവയിനം ഹൗക്‌സ്ബിൽ കടലാമകളുടെ (Hawksbill sea turtle) പ്രജനനകാലം വിജയകരമായി പൂർത്തിയായതായി പരിസ്ഥിതി, കാലാവസ്ഥാ വ്യതിയാന മന്ത്രാലയം (MoECC) അറിയിച്ചു. ഏപ്രിൽ ഒന്ന് മുതൽ ഓഗസ്റ്റ് ഒന്നു വരെ നീണ്ടുനിന്ന സീസണിൽ വിരിഞ്ഞിറങ്ങിയ ആയിരക്കണക്കിന് ആമക്കുഞ്ഞുങ്ങളെ സുരക്ഷിതമായി അവയുടെ സ്വാഭാവിക സമുദ്രവാസകേന്ദ്രത്തിലേക്ക് തിരികെ അയച്ചു.
​രാജ്യത്തെ ജൈവവൈവിധ്യം സംരക്ഷിക്കുന്നതിനും വംശനാശഭീഷണി നേരിടുന്ന ജീവിവർഗങ്ങളെ നിലനിർത്തുന്നതിനും മന്ത്രാലയം നടത്തിവരുന്ന നിരന്തര ശ്രമങ്ങളുടെ ഭാഗമായാണ് പദ്ധതി പൂർത്തിയാക്കിയത്.
​സീസണിലുടനീളം ആമകൾക്ക് തടസ്സമില്ലാതെ മുട്ടയിടാനും അവ സംരക്ഷിക്കാനുമായി പ്രത്യേക ഫീൽഡ് പ്രോഗ്രാമുകളും രാത്രികാല തീരദേശ പട്രോളിംഗും മന്ത്രാലയം സംഘടിപ്പിച്ചിരുന്നു. അൽ ഹുവൈല, അൽ ജസാസിയ, അൽ മറൂണ, അൽ ഗാരിയ, അൽ മുഫൈർ തുടങ്ങി രാജ്യത്തെ പ്രധാന വടക്കൻ തീരങ്ങളിലായിരുന്നു പ്രധാനമായും നിരീക്ഷണ പ്രവർത്തനങ്ങൾ നടന്നിരുന്നത്.
​ 2003-ൽ
​ഖത്തർ എനർജി, ഖത്തർ യൂണിവേഴ്സിറ്റിയിലെ എൻവയോൺമെന്റൽ സയൻസ് സെന്റർ എന്നിവയുമായി സഹകരിച്ച് 2003-ലാണ് ഹൗക്‌സ്ബിൽ സീ ടർട്ടിൽ പ്രൊട്ടക്ഷൻ പ്രോജക്റ്റിന് തുടക്കമിട്ടത്. ഖത്തറിന്റെ പരിസ്ഥിതി സംരക്ഷണ ചരിത്രത്തിലെ തന്നെ ഏറ്റവും പ്രധാനപ്പെട്ട ഉദ്യമങ്ങളിലൊന്നാണിത്
​കഴിഞ്ഞ 5 വർഷത്തിനിടെ മാത്രം 60,000-ത്തിലധികം കടലാമക്കുഞ്ഞുങ്ങളെയാണ് ഖത്തർ സമുദ്രത്തിലേക്ക് അയച്ചത്.
​വംശനാശഭീഷണി നേരിടുന്ന ഈ ജീവിവർഗത്തിന്റെ എണ്ണം വർധിപ്പിക്കുന്നതിനും അവ നേരിടുന്ന അപകടസാധ്യതകൾ കുറയ്ക്കുന്നതിനും പദ്ധതി വലിയ പങ്കുവഹിച്ചു.
​സമുദ്ര ആവാസവ്യവസ്ഥയുടെ സമഗ്രമായ സംരക്ഷണത്തിനും പരിസ്ഥിതി സന്തുലനം നിലനിർത്തുന്നതിനും പ്രകൃതിസ്നേഹികളിൽ അവബോധം വളർത്താനും പദ്ധതിക്ക് സാധിച്ചു.
​സാധാരണയായി ഏപ്രിൽ ആരംഭം മുതൽ ജൂൺ അവസാനം വരെയാണ് ഹൗക്‌സ്ബിൽ ആമകൾ മുട്ടയിടാനായി ഖത്തറിന്റെ വടക്കൻ തീരങ്ങളായ ഫുവൈരിത്, റാസ് ലഫാൻ, അൽ മറൂണ, അൽ ഗാരിയ, അൽ ഹുവൈല, അൽ ജസാസിയ, അൽ മഫ്ജർ തുടങ്ങിയ ഇടങ്ങളിലും ഉമ്മു തൈസ്, റാസ് രാക്കൻ, ശ്റാവോ, ഹലൂൽ എന്നീ ദ്വീപുകളിലുമെത്തുന്നത്. മുട്ടയിട്ട് ഏകദേശം രണ്ടു മാസത്തിനുള്ളിൽ വിരിഞ്ഞിറങ്ങുന്ന കുഞ്ഞുങ്ങൾ സ്വയം കടലിലേക്ക് നീന്തുന്നതോടെയാണ് ഈസംരക്ഷണദൗത്യത്തിന്റെ പ്രധാന ഘട്ടം പൂർത്തിയാകുന്നത്.