രാംലല്ലയുടെ പുഞ്ചിരി തൂകുന്ന വിഗ്രഹത്തിന് മുന്നിൽ കൈകൂപ്പി നിൽക്കുന്ന ഓരോ ഭക്തന്റെയും കണ്ണുകളിൽ ഇപ്പോൾ പ്രാർത്ഥനയല്ല, ആഴമേറിയ വേദനയും വഞ്ചിക്കപ്പെട്ടതിന്റെ അമർഷവുമാണ്. കോടിക്കണക്കിന് മനുഷ്യരുടെ ആത്മീയ വികാരത്തിന്റെ പ്രതീകമായ അയോദ്ധ്യ രാമക്ഷേത്രത്തിൽ നടന്നിരിക്കുന്നത് കേവലമൊരു സാമ്പത്തിക തട്ടിപ്പല്ല; മറിച്ച് വിശ്വാസത്തിന്റെ നെടുംതൂണുകളെത്തന്നെ തകർത്തുകളഞ്ഞ ഒരു 'സംഘടിത ക്രൈം സിൻഡിക്കേറ്റ്' ആണ്. വേലി തന്നെ വിളവു തിന്നുന്ന ഈ കാഴ്ച ഭക്തലക്ഷങ്ങളെ അക്ഷരാർത്ഥത്തിൽ ഞെട്ടിച്ചിരിക്കുന്നു.

2,000 കോടിയുടെ നിഴൽ; അഴിഞ്ഞുവീഴുന്ന മുഖമൂടികൾ

​ലഭ്യമാകുന്ന വിവരങ്ങൾ പ്രകാരം ഏതാണ്ട് 2000 കോടി രൂപയുടെ വൻ അഴിമതി ആരോപണമാണ് ക്ഷേത്ര ട്രസ്റ്റിനെതിരെ ഉയർന്നിരിക്കുന്നത്. ഭക്തർ സമർപ്പിച്ച സ്വർണ്ണവും വെള്ളിയും രത്നങ്ങളും മുതൽ കാണിക്കപ്പണവും ഭൂമി ഇടപാടുകളും വരെ ഈ കൊള്ളയുടെ പരിധിയിൽ വരുന്നു.
​ഏറ്റവും ഗൗരവമേറിയ കാര്യം, ഈ വിവാദത്തിന്റെ സംശയനിഴലിൽ നിൽക്കുന്നത് ശ്രീരാമജന്മഭൂമി തീർത്ഥ ക്ഷേത്ര ട്രസ്റ്റിന്റെ മുൻ ജനറൽ സെക്രട്ടറിയും മുതിർന്ന ആർ.എസ്.എസ്-വി.എച്ച്പി നേതാവുമായ ചമ്പത് റായ്, ട്രസ്റ്റ് അംഗമായിരുന്ന അനിൽ മിശ്ര എന്നിവരാണ് എന്നതാണ്. 2024-25 കാലയളവിൽ മാത്രം 327 കോടി രൂപ ഒഴുകിയെത്തിയ ട്രസ്റ്റിൽ, കൺമുന്നിൽ നടന്ന കൊള്ളയെ ഭാരവാഹികൾ അവഗണിക്കുകയായിരുന്നുവോ അതോ അതിന് കൂട്ടുനിൽക്കുകയായിരുന്നുവോ എന്ന ചോദ്യം ബാക്കിയാകുന്നു.

​ഒരു വിപണി വിലയുടെ 17 ഇരട്ടി

ക്ഷേത്രത്തിന് ചുറ്റുമുള്ള ഭൂമി വാങ്ങിയതുമായി ബന്ധപ്പെട്ടും വൻ ക്രമക്കേടുകളാണ് പുറത്തുവരുന്നത്. വിപണി വിലയേക്കാൾ 17 ഇരട്ടി വരെ അധികം നൽകി ഭൂമി വാങ്ങിയെന്നാണ് ആരോപണം. ഈ ഇടപാടുകൾക്ക് മേൽനോട്ടം വഹിച്ച ഗോപാൽ റായ് ഇപ്പോൾ കടുത്ത നിരീക്ഷണത്തിലാണ്.

​ചാവി സൂക്ഷിച്ച വിശ്വസ്തനും തട്ടിയെടുത്ത കോടികളും

​സംഭാവനകൾ എണ്ണിത്തിട്ടപ്പെടുത്തുന്ന സംഘത്തിന്റെ നിയന്ത്രണം ചമ്പത് റായിയുടെ മുൻ ഡ്രൈവറും വിശ്വസ്തനുമായ 'ടിന്നു' എന്ന രാം ശങ്കർ യാദവിനായിരുന്നു. കാണിക്കപ്പെട്ടികളുടെ താക്കോൽ സൂക്ഷിച്ചിരുന്നതും ഇയാളായിരുന്നു. ടിന്നുവിന്റെ വീട്ടിൽ അന്വേഷണ സംഘം നടത്തിയ റെയ്ഡിൽ വൻ സ്വർണ്ണശേഖരമാണ് കണ്ടെടുത്തത്.

​ഇയാൾക്ക് പുറമെ പണം എണ്ണാൻ നിയോഗിക്കപ്പെട്ട രവി മിശ്ര, അനുകൽപ് മിശ്ര, ലവ്‌കുശ് മിശ്ര, അവിനാശ് ശുക്ല, മനീഷ് കുമാർ യാദവ്, ക്യാഷ് കൗണ്ടിംഗ് ജീവനക്കാരൻ സുഭാഷ് ശ്രീവാസ്തവ, രസീതുകളിൽ തിരിമറി നടത്തിയ കരുണേഷ് പാണ്ഡെ എന്നിവരടക്കം എട്ട് പേരാണ് ഇപ്പോൾ ജുഡീഷ്യൽ കസ്റ്റഡിയിലുള്ളത്. ഇവരിൽ നിന്ന് 79 ലക്ഷത്തിലധികം രൂപയും കണ്ടുകെട്ടിയിട്ടുണ്ട്. മഹാകുംഭമേളയുടെ സമയത്ത് ഭക്തർ നൽകിയ വലിയ തുകകൾക്ക് രസീത് പോലും നൽകാതെയാണ് ഈ സംഘം തട്ടിയെടുത്തിരുന്നത്.

​വീഴ്ചകളുടെ കാലഗണന: വിവാദത്തിന്റെ നാൾവഴി

​ക്ഷേത്രത്തിലെ ക്രമക്കേടുകൾ പുറത്തുവന്നത് മുതൽ പ്രതികൾ കസ്റ്റഡിയിലാകുന്നത് വരെയുള്ള പ്രധാന സംഭവങ്ങൾ ഇങ്ങനെയാണ്:

തീയതി-സംഭവം

ജൂൺ 6ക്ഷേത്രത്തിലെ സാമ്പത്തിക ക്രമക്കേടുകൾ സംബന്ധിച്ച വാർത്തകൾ മാധ്യമങ്ങളിലൂടെ പുറത്തുവരുന്നു.
ജൂൺ 7സമാജ്‌വാദി പാർട്ടി നേതാവ് അഖിലേഷ് യാദവ് രംഗത്ത്; ജുഡിഷ്യറി സ്വമേധയാ കേസെടുക്കണമെന്ന് ആവശ്യം.
ജൂൺ 8ഓഡിറ്റ് കൃത്യമാണെന്നും അഴിമതി നടന്നിട്ടില്ലെന്നും ചമ്പത് റായിയുടെ പ്രതിരോധ പ്രസ്താവന.
ജൂൺ 11മുൻ സംഘത്തലവൻ മഹിപാൽ സിംഗിന്റെ വെളിപ്പെടുത്തൽ വീഡിയോ വൈറലാകുന്നു. താൻ മുൻപ് തട്ടിപ്പുകാരെ പിടികൂടി ട്രസ്റ്റിനെ അറിയിച്ചിട്ടും നടപടിയുണ്ടായില്ലെന്ന് വെളിപ്പെടുത്തൽ.
ജൂൺ 14വിവാദം കത്തിയതോടെ ഉത്തർപ്രദേശ് സർക്കാർ മൂന്നംഗ പ്രത്യേക അന്വേഷണസംഘം (SIT) രൂപീകരിക്കുന്നു.
ജൂൺ 16പ്രധാനമന്ത്രി നരേന്ദ്രമോദി വിഷയത്തിൽ നേരിട്ട് ഇടപെടുന്നു; SIT അന്വേഷണം ഊർജ്ജിതമാക്കുന്നു.
ജൂൺ 22എഫ്.ഐ.ആർ (FIR) രജിസ്റ്റർ ചെയ്യാത്തതിനെതിരെ പ്രതിപക്ഷ പാർട്ടികളുടെ കടുത്ത പ്രതിഷേധം.
ജൂൺ 25പ്രതികൾക്കെതിരെ എഫ്.ഐ.ആർ  രജിസ്റ്റർ ചെയ്യുന്നു.
ജൂൺ 26അറസ്റ്റിലായ 8 പ്രതികളെയും ജുഡീഷ്യൽ കസ്റ്റഡിയിൽ റിമാൻഡ് ചെയ്യുന്നു.രാഷ്ട്രീയ പ്രകമ്പനങ്ങളും ട്രസ്റ്റിന്റെ ഭാവിയും
​2027 ഫെബ്രുവരി-മാർച്ച് മാസങ്ങളിൽ ഉത്തർപ്രദേശ് നിയമസഭാ തിരഞ്ഞെടുപ്പ് നടക്കാനിരിക്കെ പുറത്തുവന്ന ഈ വിവാദം ബി.ജെ.പി നേതൃത്വത്തെ കടുത്ത പ്രതിരോധത്തിലാക്കിയിട്ടുണ്ട്. ചമ്പത് റായ് സംഘടനയിലെ മേലാളന്മാർക്ക് വേണ്ടിയാണ് കൊള്ള നടത്തിയതെന്ന ജുനാ അഖാഡ മഹാമണ്ഡലേശ്വർ യതി നർസിംഗാനന്ദിന്റെ കുറ്റപ്പെടുത്തൽ പ്രതിപക്ഷം വലിയ ആയുധമാക്കുന്നു. ചമ്പത് റായിയെ എന്തുകൊണ്ട് അറസ്റ്റ് ചെയ്യുന്നില്ലെന്ന ചോദ്യവും ശക്തമാണ്.

​ലക്‌നൗ ഡിവിഷണൽ കമ്മിഷണർ വിജയ് വിശ്വാസ് പാന്ത്, ഐ.ജി കിരൺ എസ്, ധനവകുപ്പ് സ്പെഷ്യൽ സെക്രട്ടറി നീൽ രത്തൻ എന്നിവരടങ്ങിയ SIT സമർപ്പിച്ച ഇടക്കാല റിപ്പോർട്ടിൽ ട്രസ്റ്റ് പൂർണ്ണമായും പുനഃസംഘടിപ്പിക്കാൻ ശുപാർശ ചെയ്തിട്ടുണ്ട്. നിലവിൽ ക്ഷേത്രഭരണം ജില്ലാ മജിസ്ട്രേട്ട് ശശാങ്ക് ത്രിപാഠി ഏറ്റെടുത്തിരിക്കുകയാണ്. പ്രധാനമന്ത്രി നരേന്ദ്രമോദി നേരിട്ട് സ്ഥിതിഗതികൾ വിലയിരുത്തുന്ന ഈ സാഹചര്യത്തിൽ, വരും ദിവസങ്ങളിൽ കൂടുതൽ കടുത്ത നടപടികളും അറസ്റ്റുകളും ഉണ്ടായേക്കുമെന്നാണ് സൂചന.