ദോഹ:സാങ്കേതിക പ്രൊഫഷനുകൾ (Technical Professions) നിയന്ത്രിക്കുന്നത് സംബന്ധിച്ച് സർക്കാർ കൈമാറിയ കരട് നിയമം ശൂറാ കൗൺസിൽ പരിശോധിച്ചു. വിശദമായ പഠനത്തിനും റിപ്പോർട്ടിനുമായി ഈ ബിൽ വിദ്യഭ്യാസ, സാംസ്കാരിക, കായിക, മാധ്യമകാര്യ സമിതിക്ക് കൈമാറി.
ഖത്തറി സമൂഹത്തിൽ ഉന്നത മൂല്യങ്ങളും ധാർമ്മികതയും പ്രോത്സാഹിപ്പിക്കുന്നതിനുള്ള ദേശീയ ചട്ടക്കൂട് (National Framework) നടപ്പാക്കുന്ന കാര്യവും യോഗം വിലയിരുത്തി. ദേശീയ ഐഡന്റിറ്റിയും മൂല്യങ്ങളും സംരക്ഷിക്കാൻ ശൂറാ കൗൺസിൽ നടത്തുന്ന നിരന്തര ശ്രമങ്ങളുടെ തുടർച്ചയാണിത്. കൗൺസിൽ സർക്കാരിന് സമർപ്പിച്ച നിർദ്ദേശങ്ങളുടെ അടിസ്ഥാനത്തിലാണ് ഈ ദേശീയ ചട്ടക്കൂടിന് രൂപം നൽകിയത്.
ദേശീയ ചട്ടക്കൂടിന്റെ നടത്തിപ്പ് സർക്കാരുമായി ചേർന്ന് സമയാസമയങ്ങളിൽ വിലയിരുത്തേണ്ടതിന്റെ പ്രാധാന്യം യോഗത്തിൽ ചൂണ്ടിക്കാണിക്കപ്പെട്ടു. തനത് മൂല്യങ്ങൾ ദൃഢമാക്കാനും ദേശീയ അസ്തിത്വം നിലനിർത്താനും സഹായിക്കുന്ന തരത്തിൽ ആശയങ്ങളെ പ്രായോഗിക നടപടികളാക്കി മാറ്റുക എന്നതാണ് ഇതിലൂടെ ലക്ഷ്യമിടുന്നത്.
