തിരുവനന്തപുരം: രാജ്യത്ത് 2011-ന് ശേഷമുള്ള ജനസംഖ്യാ കണക്കെടുപ്പിന്റെ (സെൻസസ്) ആദ്യ ഘട്ടത്തിന് സംസ്ഥാനത്ത് ഇന്ന് തുടക്കമായി. ജൂലൈ 30 വരെ നീളുന്ന ഈ ഒന്നാം ഘട്ടത്തിൽ വീടുകളുടെ വിവരങ്ങൾ ശേഖരിക്കുന്ന പാർപ്പിട സെൻസസാണ് നടക്കുന്നത്. രണ്ടാം ഘട്ട ജനസംഖ്യാ കണക്കെടുപ്പ് അടുത്ത വർഷം ഫെബ്രുവരിയിൽ നടക്കും.
​ഇന്നുമുതൽ നിങ്ങളുടെ വീടുകളിലെത്തുന്ന സെൻസസ് ഉദ്യോഗസ്ഥർ (എന്യൂമറേറ്റർമാർ) സ്മാർട്ട്‌ഫോൺ ആപ്പ് വഴിയാണ് വിവരങ്ങൾ ശേഖരിക്കുക. വീടിന്റെ അവസ്ഥ, കുടിവെള്ളം, കക്കൂസ് സൗകര്യം, കൈവശമുള്ള വാഹനങ്ങൾ, മൊബൈൽ നമ്പർ തുടങ്ങി 34 പ്രധാന ചോദ്യങ്ങൾക്കാണ് പൊതുജനങ്ങൾ മറുപടി നൽകേണ്ടത്.
​സ്കൂളുകൾ പ്രതിസന്ധിയിലേക്ക്; അധ്യാപകർക്ക് കടുത്ത ജോലിഭാരം
​സെൻസസ് നടപടികൾ ആരംഭിച്ചതോടെ സ്കൂളുകളുടെ പ്രവർത്തനം താളംതെറ്റുമെന്ന ആശങ്കയിലാണ് വിദ്യാഭ്യാസ മേഖല. സർക്കാർ സ്കൂളുകളിലെ പകുതിയോളം അധ്യാപകർക്കും, ഹയർ സെക്കൻഡറി വിഭാഗത്തിലെ 80 ശതമാനത്തോളം അധ്യാപകർക്കുമാണ് സെൻസസ് ഡ്യൂട്ടി നൽകിയിട്ടുള്ളത്.
​ഒരു മാസത്തിനുള്ളിൽ ഒരാൾ 600 വീടുകൾ വീതം സന്ദർശിക്കണമെന്നാണ് നിർദ്ദേശം. സ്കൂൾ സമയത്തിന് മുൻപോ ശേഷമോ വേണം വിവരശേഖരണം നടത്താനെന്ന് അധികൃതർ പറയുമ്പോഴും, വലിയ ജോലിഭാരം കാരണം ഇത് പ്രായോഗികമല്ലെന്നാണ് അധ്യാപക സംഘടനകളുടെ വിമർശനം. കുട്ടികളുടെ പഠനത്തെ ഇത് ദോഷകരമായി ബാധിക്കുമെന്ന ആശങ്കയും ശക്തമാണ്.
​ തെറ്റായ വിവരങ്ങൾ നൽകിയാൽ ശിക്ഷ
സെൻസസ് ഉദ്യോഗസ്ഥരുമായി പൊതുജനങ്ങൾ പൂർണ്ണമായി സഹകരിക്കേണ്ടതാണ്. ചോദിക്കുന്ന ചോദ്യങ്ങൾക്ക് സത്യസന്ധമായ മറുപടി നൽകണം. മനഃപൂർവം തെറ്റായ വിവരങ്ങൾ നൽകുകയോ, വിവരങ്ങൾ നൽകാൻ വിസമ്മതിക്കുകയോ, സെൻസസ് പ്രവർത്തനങ്ങൾക്ക് തടസ്സം സൃഷ്ടിക്കുകയോ ചെയ്താൽ നിയമപരമായ ശിക്ഷാ നടപടികൾ നേരിടേണ്ടി വരും.
​നിങ്ങൾ ഉത്തരം നൽകേണ്ട പ്രധാന ചോദ്യങ്ങൾ ഒറ്റനോട്ടത്തിൽ:
​വീടിന്റെ ഘടന: കെട്ടിട നമ്പർ, തറ, ചുമര്, മേൽക്കൂര എന്നിവ നിർമ്മിക്കാൻ ഉപയോഗിച്ച മെറ്റീരിയൽ, വീടിന്റെ നിലവിലെ അവസ്ഥ, താമസിക്കുന്നവരുടെ എണ്ണം, ഗൃഹനാഥന്റെ പേര്, വിഭാഗം (എസ്‌സി/എസ്ടി/മറ്റുള്ളവ).
​സൗകര്യങ്ങൾ: കുടിവെള്ളത്തിന്റെ ഉറവിടം, വെളിച്ചം, ടോയ്‌ലറ്റ് സൗകര്യവും അതിന്റെ തരവും, മലിനജല ഓടകളുടെ ലഭ്യത, അടുക്കള, എൽ.പി.ജി/പി.എൻ.ജി കണക്ഷൻ, പാചക ഇന്ധനം.
​ഉപകരണങ്ങളും വാഹനങ്ങളും: റേഡിയോ, ടിവി, ഇന്റർനെറ്റ്, ലാപ്‌ടോപ്പ്/കമ്പ്യൂട്ടർ, ഫോൺ/സ്മാർട്ട്ഫോൺ, സൈക്കിൾ, സ്കൂട്ടർ/ബൈക്ക്, കാർ/ജീപ്പ്, വീട്ടിൽ ഉപയോഗിക്കുന്ന പ്രധാന ധാന്യങ്ങൾ, മൊബൈൽ നമ്പർ.