ഏപ്രിൽ 1 മുതൽ ഇന്ത്യയിലെ നികുതിദായകർക്ക് വലിയ ഇളവുകൾ വരുന്നു. പുതിയ നികുതി നിയമങ്ങൾ നടപ്പാക്കാൻ നോക്കിയ കേന്ദ്രസർക്കാർ, ശമ്പളക്കാർക്കും ബിസിനസുകാർക്കും തുല്യമായി ആനുകൂല്യങ്ങൾ നൽകുന്നതാണ് പുതിയ നയത്തിലെ പ്രധാന സവിശേഷത.

ശമ്പളക്കാർക്കുള്ള ഏറ്റവും വലിയ ഇളവ്

മാസ ശമ്പളക്കാർക്ക് ആശ്വാസമേകുന്ന വാർത്തയാണ് ആദായനികുതി പരിധി വർദ്ധിപ്പിച്ചത്. പുതിയ വ്യവസ്ഥ അനുസരിച്ച്, 12 ലക്ഷം രൂപവരെ സമ്പാദിക്കുന്നവർക്ക്  ഇനി നികുതി ബാധ്യതയില്ല. കൂടാതെ, 75,000 രൂപയുടെ സ്റ്റാൻഡേർഡ് ഡിഡക്ഷൻ ഉൾപ്പെടുത്തുമ്പോൾ, 12.75 ലക്ഷം രൂപവരെ വരുന്ന വരുമാനത്തിന്  നികുതിയിൽ നിന്ന് ഒഴിവാകാം. ഇതുവരെ ഏഴ് ലക്ഷം രൂപ വരുമാനം ഉള്ളവർക്കു മാത്രമേ ഈ ആനുകൂല്യം ലഭിച്ചിരുന്നുള്ളൂ. പുതിയ ബില്ലിന്റെ ഭാഗമായി, നികുതി വർഷം (Tax Year) എന്ന ഒറ്റ പ്രയോഗം കൊണ്ടുവരുകയും പഴയ സാമ്പത്തിക വർഷം, അസസ്‌മെന്റ് വർഷം തുടങ്ങിയ ആശയക്കുഴപ്പങ്ങൾ നീക്കം ചെയ്യുകയും ചെയ്തു.

വീദേശത്തേക്ക് പണം അയയ്ക്കുന്നവർക്ക് ആശ്വാസം

വിദേശത്തേക്ക് പണം അയയ്ക്കുമ്പോൾ നിലവിൽ 7 ലക്ഷം രൂപയ്ക്കുമുകളിലാണ് നികുതി ബാധകമായിരുന്നത്. എന്നാൽ ഏപ്രിൽ 1 മുതൽ 10 ലക്ഷം രൂപ വരെ വിദേശത്തേക്ക് അയയ്ക്കുമ്പോൾ നികുതി ബാധ്യതയില്ല. വിദേശപഠനം നടത്തുന്ന വിദ്യാർത്ഥികൾക്കും അവരുടെ രക്ഷിതാക്കൾക്കും ഇതിൻറെ നേരിയ ആശ്വാസം ലഭിക്കും. വിദ്യാഭ്യാസ വായ്പയിലൂടെ ലഭിക്കുന്ന തുക വിദേശത്ത് ചെലവാക്കുമ്പോൾ നികുതി പൂർണമായും ഒഴിവാക്കി.

ബിസിനസുകാർക്കും സംരംഭകർക്കും ആശ്വാസനടപടികൾ

വാർഷിക വിൽപന 50 ലക്ഷം രൂപയ്ക്കു മുകളിലാണ് എന്നെണ്ണിയാൽ, നേരത്തേ 0.1% ടി.സി.എസ് നികുതി ഈടാക്കിയിരുന്നു. ഈ നികുതി ഇനിയില്ല. അതുപോലെ, ടി.സി.എസ് അടയ്ക്കാൻ വൈകിയാൽ 7 വർഷം വരെ തടവുശിക്ഷ കിട്ടുമെന്ന നിയമവ്യവസ്ഥ ഇല്ലാതാക്കുകയാണ് പുതിയ നികുതി പരിഷ്കരണങ്ങൾ.

ലോട്ടറി, കുതിരപ്പന്തയം, പസിൽ ഗെയിമുകൾ – കുറച്ചു കൂടുതൽ ഭാഗ്യം:

വർഷത്തിൽ 10,000 രൂപയേക്കാൾ കൂടുതലായി ലോട്ടറിയടിക്കുന്നവർക്ക് നിലവിൽ നികുതി ബാധകമായിരുന്നു. ഇനി മുതൽ, ഒരാൾക്ക് 8000 രൂപ വീതം വർഷത്തിൽ മൂന്നുതവണ ലോട്ടറിയടിച്ചാലും നികുതി നൽകേണ്ടതില്ല.

നികുതി നിർദ്ദേശങ്ങൾ – ധനമന്ത്രി പുലർത്തിയ തന്ത്രം

കേന്ദ്ര ധനമന്ത്രാലയം ആവിഷ്കരിച്ച പുതിയ നികുതി വ്യവസ്ഥകൾ വളരെ സൂക്ഷ്മമായി ഒരുക്കപ്പെട്ടതാണ്. നികുതിദായകർക്ക് ആശ്വാസം നൽകുമ്പോഴും, വിപണിയിൽ കൂടുതൽ പണമൊഴുക്ക് ഉറപ്പാക്കുകയും സർക്കാർ നികുതി വരുമാനം സ്ഥിരമായി നിലനിർത്തുകയും ചെയ്യുന്ന രീതിയാണ് സ്വീകരിച്ചത്. പുതിയ നിയമങ്ങൾ ഏപ്രിൽ 1 മുതൽ പ്രാബല്യത്തിലാവുമ്പോൾ, നികുതി ഭാരം കുറയ്ക്കാൻ ആഗ്രഹിക്കുന്നവർക്കും, സാമ്പത്തിക നിയന്ത്രണങ്ങളെ കുറിച്ച് ആശയക്കുഴപ്പമുള്ളവർക്കും ഏറെ ഗുണം ചെയ്യും.