​ദോഹ: പ്രമുഖ ഫോട്ടോഗ്രാഫി മേളയായ 'തസ്വീർ ഫോട്ടോ ഫെസ്റ്റിവൽ ഖത്തർ' സംഘടിപ്പിക്കുന്ന 'ഫ്രെയിം ആൻഡ് ഫോക്കസ്' പ്രദർശനത്തിന്റെ രണ്ടാം പതിപ്പ് സെപ്റ്റംബർ 5 മുതൽ ഒക്ടോബർ 5 വരെ ദോഹയിലെ അൽ ഹോഷ് ഗാലറിയിൽ നടക്കും. തസ്വീറിന്റെ 14 ആഴ്ച നീണ്ടുനിന്ന അഡ്വാൻസ്ഡ് ഫോട്ടോഗ്രാഫി കോഴ്സിലൂടെ രൂപപ്പെടുത്തിയ മികച്ച ചിത്രങ്ങളാണ് എക്സിബിഷനിൽ പ്രദർശിപ്പിക്കുന്നത്.
​ഖത്തറിൽ നിന്നും മറ്റ് പ്രാദേശിക രാജ്യങ്ങളിൽ നിന്നുമുള്ള പന്ത്രണ്ടിലധികം ഫോട്ടോഗ്രാഫർമാരുടെ ഡോക്യുമെന്ററി, പോർട്രെയ്റ്റ്, ആശയപരമായ (conceptual) ചിത്രങ്ങൾ പ്രദർശനത്തിലുണ്ടാകും. വ്യക്തിത്വം, ഓർമ്മകൾ, പാരമ്പര്യം, കുടിയേറ്റം, അതിജീവനത്തിന്റെ കഥകൾ തുടങ്ങിയ വിഷയങ്ങളാണ് കലാകാരന്മാർ തങ്ങളുടെ ചിത്രങ്ങളിലൂടെ പ്രമേയമാക്കിയിരിക്കുന്നത്.
​തസ്വീർ, ഖത്തർ പ്രെപ്പറേറ്ററി സ്കൂൾ (QPS), ദി വി ഫൗണ്ടേഷൻ (VII Foundation), അൽ ഹോഷ് ഗാലറി എന്നിവർ സംയുക്തമായാണ് ഈ പരിപാടി സംഘടിപ്പിക്കുന്നത്. ലോക പ്രശസ്തരായ 11 ഫോട്ടോ ജേണലിസ്റ്റുകൾ, ക്യൂറേറ്റർമാർ, ഫിലിം മേക്കേഴ്സ് എന്നിവരുടെ നേരിട്ടുള്ള ശിക്ഷണത്തിലാണ് കോഴ്സിലെ പങ്കാളികൾ ഈ ചിത്രങ്ങൾ പകർത്തിയത്.
​പ്രാദേശിക ഫോട്ടോഗ്രാഫി പ്രതിഭകളെ വളർത്തിയെടുക്കുകയും ഖത്തറിലെ സർഗ്ഗാത്മക മേഖല ശക്തിപ്പെടുത്തുകയുമാണ് തസ്വീറിന്റെ പ്രധാന ലക്ഷ്യമെന്ന് ഡയറക്ടർ ഖലീഫ അൽ ഉബൈദ്ലി പറഞ്ഞു. രാജ്യാന്തര വിദഗ്ധരുടെ മാർഗ്ഗനിർദ്ദേശം പുതിയ തലമുറയിലെ ഫോട്ടോഗ്രാഫർമാർക്ക് വലിയ അനുഭവസമ്പത്താണ് നൽകുന്നതെന്നും അദ്ദേഹം കൂട്ടിച്ചേർത്തു.
​പ്രദർശനത്തോടൊപ്പം 'ഫ്രെയിം ആൻഡ് ഫോക്കസ്' അഡ്വാൻസ്ഡ് ഫോട്ടോഗ്രാഫി കോഴ്സിന്റെ മൂന്നാം പതിപ്പിലേക്കുള്ള അപേക്ഷകളും ക്ഷണിക്കും.