​വാഷിംഗ്ടൺ: ദീർഘകാലമായി നിലനിൽക്കുന്ന തർക്കങ്ങൾ പരിഹരിക്കുന്നതിനായി ഇരുരാജ്യങ്ങളും തമ്മിൽ നടത്തുന്ന ചർച്ചകൾ 'ആശാവഹമായ' സാഹചര്യത്തിൽ, ഇറാനിൽ നിന്നുള്ള എണ്ണ കയറ്റുമതിക്കുമേൽ ഏർപ്പെടുത്തിയിരുന്ന ഉപരോധങ്ങളിൽ ഭാഗിക ഇളവ് വരുത്തി അമേരിക്ക.
​തിങ്കളാഴ്ചയാണ് യുഎസ് ട്രഷറി വകുപ്പ് 60 ദിവസത്തെ ഉപരോധ ഇളവ് (Waiver) പ്രഖ്യാപിച്ചത്. ഇതോടെ ഇറാനിയൻ എണ്ണയുടെ ഉൽപ്പാദനം, വിതരണം, അമേരിക്കയിലേക്കുള്ള വിൽപ്പന എന്നിവയ്ക്കുള്ള വഴി തുറന്നു. പൂർണ്ണമായ സമാധാന ഉടമ്പടി ലക്ഷ്യമിട്ട് സ്വിറ്റ്സർലൻഡിൽ വെച്ച് വാഷിംഗ്ടണും ടെഹ്‌റാനും തമ്മിൽ നടക്കുന്ന ചർച്ചകളെക്കുറിച്ച് മധ്യസ്ഥരും യുഎസ് വൈസ് പ്രസിഡന്റും അനുകൂലമായ റിപ്പോർട്ടുകൾ പുറത്തുവിട്ടതിന് പിന്നാലെയാണ് ഈ നിർണായക നീക്കം.
​ജൂൺ 17-ന് ഇരുരാജ്യങ്ങളും ഒപ്പുവെച്ച 60 ദിവസത്തെ ധാരണാപത്രത്തിലെ (MoU) പ്രധാന വ്യവസ്ഥകളിലൊന്നായിരുന്നു ഈ ഉപരോധ ഇളവ്.അമേരിക്കയും ഇറാനും തമ്മിലുള്ള ചർച്ചകൾ തികച്ചും ഫലപ്രദമാണെന്നും ധാരണാപത്രത്തിലെ പല വ്യവസ്ഥകളും മുന്നോട്ട് പോകുകയാണെന്നും യുഎസ് ട്രഷറി സെക്രട്ടറി സ്കോട്ട് ബെസ്സന്റ് വ്യക്തമാക്കി.
​"ഹോർമുസ് കടലിടുക്കിലൂടെയുള്ള (Strait of Hormuz) സ്വതന്ത്രവും തുറന്നതുമായ ഗതാഗതം ഉറപ്പാക്കാമെന്നും ഇന്റർനാഷണൽ അറ്റോമിക് എനർജി ഏജൻസി (IAEA) ഇൻസ്പെക്ടർമാർക്ക് രാജ്യത്ത് പരിശോധന നടത്താൻ അനുമതി നൽകാമെന്നും ഇറാൻ സമ്മതിച്ചിട്ടുണ്ട്. ഈ ചട്ടക്കൂടിന്റെ ഭാഗമായി, ഇറാനിയൻ എണ്ണയുടെ ഉൽപ്പാദനത്തിനും വിതരണത്തിനും വിൽപ്പനയ്ക്കും അനുമതി നൽകുന്ന താൽക്കാലിക 60 ദിവസത്തെ പൊതു ലൈസൻസ് ട്രഷറി വകുപ്പ് പുറപ്പെടുവിച്ചിട്ടുണ്ടെന്ന് 
യുഎസ് ട്രഷറി സെക്രട്ടറി
സ്കോട്ട് ബെസ്സന്റ്പറഞ്ഞു.വരുന്ന ഓഗസ്റ്റ് 21 വരെയാണ് ഈ താൽക്കാലിക ലൈസൻസിന്റെ കാലാവധി. ഇറാനിൽ നിന്നുള്ള ക്രൂഡ് ഓയിൽ, പെട്രോകെമിക്കൽ ഉൽപ്പന്നങ്ങൾ, മറ്റ് പെട്രോളിയം ഉൽപ്പന്നങ്ങൾ എന്നിവ ഇതിന്റെ പരിധിയിൽ വരും.
​ഇറാനിയൻ എണ്ണ അമേരിക്കയിലേക്ക് ഇറക്കുമതി ചെയ്യാൻ ഇത് അനുമതി നൽകുന്നുണ്ടെങ്കിലും, നിലവിൽ യുഎസ് ഉപരോധം നേരിടുന്ന ഉത്തര കൊറിയ, ക്യൂബ അല്ലെങ്കിൽ റഷ്യൻ അധിനിവേശ യുക്രെയ്ൻ പ്രദേശങ്ങൾ എന്നിവയുമായി ബന്ധപ്പെട്ട ഇടപാടുകൾക്ക് ഈ ഇളവ് ബാധകമായിരിക്കില്ല. ഉപരോധ ഇളവ് സംബന്ധിച്ച് ഇറാൻ ഔദ്യോഗിക വക്താക്കൾ ഇതുവരെ പ്രതികരണങ്ങളൊന്നും ലഭ്യമാക്കിയിട്ടില്ല.അമേരിക്ക ഉപരോധത്തിൽ ഇളവ് വരുത്തിയെന്ന വാർത്ത പുറത്തുവന്നതോടെ ആഗോള വിപണിയിൽ അസംസ്‌കൃത എണ്ണവിലയിൽ വൻ ഇടിവ് രേഖപ്പെടുത്തി. ബ്രെന്റ് ക്രൂഡ് വില 3.5 ശതമാനത്തിലധികം ഇടിഞ്ഞ് ബാരലിന് 77.7 ഡോളറായി താഴ്ന്നു. വിപണിയിൽ ഇറാനിയൻ എണ്ണയുടെ ലഭ്യത വർദ്ധിക്കുമെന്ന പ്രതീക്ഷയാണ് വിലയിടിവിന് കാരണമായത്