അമേരിക്കൻ സൈനിക വിമാനങ്ങൾക്ക് തങ്ങളുടെ വ്യോമപരിധി ഉപയോഗിക്കാൻ നിയന്ത്രണം ഏർപ്പെടുത്തി സ്വിറ്റ്സർലൻഡ്.  പശ്ചിമേഷ്യയിലെ യുദ്ധം രൂക്ഷമാകുന്ന സാഹചര്യത്തിലാണ് സ്വിറ്റ്സർലൻഡ് അമേരിക്കൻ യുദ്ധവിമാനങ്ങൾക്ക് വിലക്കേർപ്പെടുത്തിയത്. സായുധ സംഘർഷങ്ങളിൽ നിഷ്പക്ഷത പാലിക്കുന്ന രാജ്യത്തിന്റെ പാരമ്പര്യം ചൂണ്ടിക്കാട്ടിയാണ് ഈ തീരുമാനം.

അമേരിക്കൻ നിരീക്ഷണ വിമാനങ്ങൾ രാജ്യത്തിന് മുകളിലൂടെ പറക്കാൻ നൽകിയ രണ്ട് അപേക്ഷകൾ ഞായറാഴ്ച തള്ളിക്കളഞ്ഞെന്ന് സ്വിസ് ഭരണകൂടം വ്യക്തമാക്കി. എന്നാൽ മൂന്ന് മറ്റു വിമാനങ്ങൾക്ക് അനുമതി നൽകി. ഇതിൽ രണ്ട് ഗതാഗത വിമാനങ്ങളും ഒരു പരിപാലന (മെൻറനൻസ്) വിമാനവും ഉൾപ്പെടുന്നു.

“യു.എസ്. സൈനിക വിമാനങ്ങളുടെ നിരവധി ഓവർഫ്ലൈറ്റ് അപേക്ഷകൾ ഇന്ന് സ്വിസ് ഫെഡറൽ കൗൺസിൽ പരിഗണിച്ചു. ഇറാനിലെ യുദ്ധവുമായി ബന്ധപ്പെട്ട രണ്ട് അപേക്ഷകൾ നിരസിച്ചപ്പോൾ, ഒരു മെൻറനൻസ് വിമാനത്തിനും രണ്ട് ഗതാഗത വിമാനങ്ങൾക്കും അനുമതി നൽകിയിട്ടുണ്ട്,” സർക്കാർ പ്രസ്താവനയിൽ പറഞ്ഞു. അമേരിക്ക–ഇസ്രയേൽ സഖ്യവും ഇറാനും തമ്മിലുള്ള യുദ്ധത്തിൽ രാജ്യത്തിന്റെ നിഷ്പക്ഷതാ നിയമം ബാധകമാണെന്നും സ്വിറ്റ്സർലാൻഡ് വ്യക്തമാക്കി.

“2026 ഫെബ്രുവരി 28 മുതൽ മധ്യപൂർവേഷ്യയിൽ ശക്തമായ പോരാട്ടം നടക്കുന്നു. അമേരിക്കയും ഇസ്രയേലും ഒരുവശത്തും ഇറാൻ മറുവശത്തുമായി യുദ്ധം തുടരുകയാണ്. ഈ സാഹചര്യത്തിൽ സ്വിറ്റ്സർലാൻഡിന്റെ നിഷ്പക്ഷതാ നിയമം ബാധകമാണ്. അതിനാൽ അമേരിക്കൻ സൈനികവും സർക്കാർ വിമാനങ്ങളും രാജ്യത്തിന് മുകളിലൂടെ പറക്കാൻ നിരവധി അപേക്ഷകൾ ലഭിച്ചിരുന്നു,” സർക്കാർ കൂട്ടിച്ചേർത്തു. സ്വിറ്റ്സർലാൻഡിന്റെ നിഷ്പക്ഷതാ നിയമം പ്രകാരം രാജ്യങ്ങൾ തമ്മിലുള്ള യുദ്ധങ്ങളിൽ പങ്കാളിയാകരുതെന്നും സൈനിക സഖ്യങ്ങളിൽ അംഗമാകരുതെന്നും വ്യക്തമാക്കുന്നു.

അമേരിക്ക–ഇറാൻ യുദ്ധം മൂന്നാം ആഴ്ചയിലേക്ക് കടക്കുമ്പോൾ സമാധാന ചർച്ചകൾ ഇരുവിഭാഗവും തള്ളിക്കളഞ്ഞിരിക്കുകയാണ്. ഖാർഗ് ദ്വീപിൽ നടത്തിയ ആക്രമണത്തിന് ശേഷം ഇറാൻ “പൂർണമായി തകർന്നുവെന്ന്” ട്രംപ് അവകാശപ്പെട്ടപ്പോൾ, അമേരിക്കക്കെതിരെ പ്രതികാരം ഉണ്ടാകുമെന്ന് ടെഹ്റാൻ മുന്നറിയിപ്പ് നൽകി. 

ഫെബ്രുവരി 28 ന് അമേരിക്കയും ഇസ്രയേലും ഇറാനിൽ ആക്രമണം ആരംഭിച്ചതോടെയാണ് ഈ യുദ്ധം തുടങ്ങിയത്. ഇതുവരെ 2000-ലധികം പേർ കൊല്ലപ്പെട്ടതായി റിപ്പോർട്ടുണ്ട്. കൊല്ലപ്പെട്ടവരിൽ കൂടുതലും ഇറാനിലാണ്. കൂടാതെ, എണ്ണവിതരണത്തിൽ വലിയ തടസ്സം ഉണ്ടായി. ഇതോടെ ആഗോള വിപണിയിൽ എണ്ണവിലയും കുത്തനെ ഉയർന്നിട്ടുണ്ട്.