കൊച്ചി: പ്രമുഖ സ്റ്റീൽ നിർമ്മാതാക്കളായ സൂര്യദേവ് ടിഎംടിയുമായി കേരള ബ്ലാസ്റ്റേഴ്‌സ് എഫ്.സി പുതിയ പങ്കാളിത്തം പ്രഖ്യാപിച്ചു. ക്ലബ്ബിൻ്റെ ഔദ്യോഗിക അസോസിയേറ്റ് പാർട്ണറായാണ് സൂര്യദേവ് ടിഎംടി എത്തുന്നത്. നിർമ്മാണ മേഖലയിലെ മുൻനിരക്കാരായ സൂര്യദേവും ഫുട്ബോൾ ആവേശമായ ബ്ലാസ്റ്റേഴ്‌സും തമ്മിലുള്ള തന്ത്രപരമായ സഹകരണമാണിത്.

ഗുണമേന്മയ്ക്കും പുതുമകൾക്കും പ്രാധാന്യം നൽകുന്ന സംയോജിത സ്റ്റീൽ നിർമ്മാണ കമ്പനിയാണ് സൂര്യദേവ് ടിഎംടി. 2006-ൽ പ്രവർത്തനം ആരംഭിച്ച സൂര്യദേവ്, ലോകോത്തര നിലവാരത്തിലുള്ള നിർമ്മാണ രീതികളിലൂടെ സ്റ്റീൽ വ്യവസായത്തിൽ തനതായ വ്യക്തിമുദ്ര പതിപ്പിച്ചിട്ടുണ്ട്. ഈ പങ്കാളിത്തത്തിൻ്റെ ഭാഗമായി ആരാധകർക്കും പ്രാദേശിക സമൂഹത്തിനുമായി വിവിധ പദ്ധതികൾ ഇരു കൂട്ടരും ചേർന്ന് നടപ്പിലാക്കും. ഫുട്ബോളിനെ താഴെത്തട്ടിൽ ശക്തിപ്പെടുത്താനും പിന്തുണയ്ക്കുന്നവരുമായി കൂടുതൽ അടുത്ത് പ്രവർത്തിക്കാനുമാണ് ഈ സഹകരണം ലക്ഷ്യമിടുന്നത്.

സൂര്യദേവ് ടിഎംടിയെ ബ്ലാസ്റ്റേഴ്‌സ് കുടുംബത്തിലേക്ക് സ്വാഗതം ചെയ്യുന്നതിൽ സന്തോഷമുണ്ടെന്ന് കേരള ബ്ലാസ്റ്റേഴ്‌സ് സിഇഒ അഭിക് ചാറ്റർജി പറഞ്ഞു. "ശക്തിയും അടിയുറച്ച നിലപാടുകളും മുൻനിർത്തിയുള്ളതാണ് ഈ പങ്കാളിത്തം. ഇന്ത്യൻ ഫുട്ബോൾ സുപ്രധാനമായ ഒരു ഘട്ടത്തിലൂടെ കടന്നുപോകുമ്പോൾ സൂര്യദേവ് നൽകുന്ന പിന്തുണ വിലപ്പെട്ടതാണ്. ആരാധകർക്കായി മികച്ച പരിപാടികൾ ഒരുക്കാനും കേരളത്തിലെ ഫുട്ബോളിനും സമൂഹത്തിനും ഗുണകരമായ മാറ്റങ്ങൾ കൊണ്ടുവരാനും ഇതിലൂടെ സാധിക്കുമെന്ന് ഞങ്ങൾ കരുതുന്നു," അദ്ദേഹം പറഞ്ഞു.

"ഫുട്ബോൾ ജനങ്ങളെ ഒന്നിപ്പിക്കുന്ന വലിയൊരു കരുത്താണ്. ശക്തമായ അടിത്തറ കെട്ടിപ്പടുക്കുക എന്ന ഞങ്ങളുടെ ലക്ഷ്യവുമായി ഈ പങ്കാളിത്തം ചേർന്നുനിൽക്കുന്നു," എന്ന് സൂര്യദേവ് ടിഎംടി സിഎംഒ നമൻ അഗർവാൾ പറഞ്ഞു. "ജനങ്ങളുമായി ആഴത്തിൽ ബന്ധമുള്ള ക്ലബ്ബാണ് കേരള ബ്ലാസ്റ്റേഴ്‌സ്. ആരാധകരുമായി കൂടുതൽ അടുക്കാനും കായിക മേഖലയ്ക്ക് അപ്പുറം സമൂഹത്തിന് ഗുണകരമായ പദ്ധതികളുടെ ഭാഗമാകാനും ഈ സഹകരണം ഞങ്ങൾക്ക് അവസരം നൽകുന്നു. കേരളത്തിനായി മൂല്യമുള്ള പ്രവർത്തനങ്ങൾ കാഴ്ചവെക്കാൻ ഞങ്ങൾ ആഗ്രഹിക്കുന്നു," എന്നും അദ്ദേഹം വ്യക്തമാക്കി.

ഇരു ബ്രാൻഡുകളെയും ഒന്നിപ്പിക്കാൻ സാധിച്ചതിൽ സന്തോഷമുണ്ടെന്ന് ന്യൂസ്റ്റാർട്ട് വെഞ്ചേഴ്‌സിലെ കാർത്തിക് പറഞ്ഞു. "കേരള ബ്ലാസ്റ്റേഴ്‌സിനെയും സൂര്യദേവ് ടിഎംടിയെയും ഒന്നിപ്പിച്ചത് ഇരു ബ്രാൻഡുകൾക്കുമിടയിലുള്ള ഒരേ ലക്ഷ്യങ്ങളും പരസ്പര വിശ്വാസവുമാണ്. ആരാധകർക്കും സമൂഹത്തിനും പ്രാധാന്യം നൽകിക്കൊണ്ടുള്ള ദീർഘകാല കാഴ്ചപ്പാടാണ് ഇരു കൂട്ടർക്കുമുള്ളത്. ഈ പങ്കാളിത്തത്തിന് വഴിയൊരുക്കാൻ സാധിച്ചതിൽ ഞങ്ങൾക്ക് സന്തോഷമുണ്ട്. ഇതുമായി ബന്ധപ്പെട്ട എല്ലാവർക്കും ഈ സഹകരണം വലിയ ഗുണം ചെയ്യുമെന്ന് ഞങ്ങൾ പ്രതീക്ഷിക്കുന്നു," അദ്ദേഹം കൂട്ടിച്ചേർത്തു.

Photo Courtesy - Google