ന്യൂഡൽഹി: അഭിഭാഷകരുടെ എൻറോൾമെന്റ് സമയത്ത് ഓപ്ഷണൽ ഫീസുകൾ ഈടാക്കുന്നതിൽ നിന്ന് സംസ്ഥാന ബാർ കൗൺസിലുകളെ വിലക്കി സുപ്രീം കോടതി. ഇത് സംബന്ധിച്ച് 2024-ലെ വിധിയിൽ വീണ്ടും വ്യക്തത വരുത്തിക്കൊണ്ടാണ് സുപ്രീം കോടതിയുടെ പുതിയ നിർദ്ദേശം.
മുൻ ഉത്തരവ് പാലിക്കാത്തതിനെതിരെ സമർപ്പിച്ച കോടതിയലക്ഷ്യ ഹർജി പരിഗണിക്കവെയാണ് കോടതി ഈ സുപ്രധാന ഉത്തരവ് പുറപ്പെടുവിച്ചത്. എൻറോൾമെന്റ് ഫീസ് ഘടനയുമായി ബന്ധപ്പെട്ട 2024-ലെ വിധി കർശനമായി പാലിക്കാൻ ബാർ കൗൺസിൽ ഓഫ് ഇന്ത്യ (BCI) നേരത്തെ എല്ലാ സംസ്ഥാന ബാർ കൗൺസിലുകൾക്കും നിർദ്ദേശം നൽകിയിരുന്നു.

കർണാടക സ്റ്റേറ്റ് ബാർ കൗൺസിൽ അമിത ഫീസ് ഈടാക്കുന്നുണ്ടെന്ന് കോടതിയലക്ഷ്യ നടപടികളിൽ കണ്ടെത്തിയതിനെ തുടർന്നാണ് ബിസിഐ എല്ലാ സംസ്ഥാന ബാർ കൗൺസിലുകളിൽ നിന്നും എൻറോൾമെന്റ് ഫീസ് പിരിവുമായി ബന്ധപ്പെട്ട വിവരങ്ങൾ തേടിയത്.
മിക്ക സംസ്ഥാനങ്ങളും ഉത്തരവ് പാലിക്കുന്നുണ്ടെന്ന് അവകാശപ്പെട്ടെങ്കിലും ഹിമാചൽ പ്രദേശ്, കർണാടക, ജമ്മു & കശ്മീർ ബാർ കൗൺസിലുകൾ ഇപ്പോഴും നിയമപരമായ പരിധിക്ക് പുറത്തുള്ള തുകകൾ ഈടാക്കുന്നതായി കോടതി കണ്ടെത്തി. ഉദാഹരണത്തിന്, ഹിമാചൽ പ്രദേശ് ഒരു അധിക അഡ്വക്കേറ്റ്സ് വെൽഫെയർ ഫണ്ട് ഫീസ് ഈടാക്കിയിരുന്നു. ജമ്മു & കശ്മീർ ആകട്ടെ, ജനറൽ വിഭാഗത്തിൽ നിന്ന് ₹900 രൂപയും SC/ST വിഭാഗത്തിൽ നിന്ന് ₹450 രൂപയുമാണ് ഈടാക്കിയിരുന്നത് (നിയമപ്രകാരം യഥാക്രമം ₹750, ₹150 എന്നിങ്ങനെയാണ് ഫീസ്).

"കർണാടക സ്റ്റേറ്റ് ബാർ കൗൺസിൽ ഓപ്ഷണൽ എന്ന പേരിൽ ഏതെങ്കിലും തുക പിരിക്കുന്നുണ്ടെങ്കിൽ അത് നിർബന്ധമല്ലെങ്കിൽ പോലും നിർത്തണം," എന്നും കോടതി വ്യക്തമാക്കി. ഓപ്ഷണൽ അല്ലെങ്കിൽ നിയമപരമല്ലാത്ത യാതൊരു ഫീസും ചുമത്താൻ പാടില്ലെന്നും കോടതി ഊന്നിപ്പറഞ്ഞു.