ന്യൂഡൽഹി: ചെക്കിൽ വരുത്തിയിട്ടുള്ള തിരുത്തലുകളോ കൂട്ടിച്ചേർക്കലുകളോ ഒറ്റനോട്ടത്തിൽത്തന്നെ വ്യക്തമാണെങ്കിൽ, പ്രതി കുറ്റവിമുക്തനാകാൻ കയ്യക്ഷര വിദഗ്ധന്റെ  ശാസ്ത്രീയ പരിശോധനാ ഫലം ഹാജരാക്കേണ്ടതില്ലെന്ന് സുപ്രീം കോടതി. ചെക്ക് തിരിമറി വ്യക്തമായി കാണാമെങ്കിൽ, പ്രതികൾക്കെതിരെ നെഗോഷ്യബിൾ ഇൻസ്ട്രുമെന്റ്സ് (NI) ആക്ട് സെക്ഷൻ 138 പ്രകാരം കേസെടുക്കാനാവില്ലെന്നും കോടതി വ്യക്തമാക്കി.
​ജസ്റ്റിസ് സഞ്ജയ് കുമാർ, ജസ്റ്റിസ് സജീവ് സച്‌ദേവ എന്നിവരടങ്ങിയ ബെഞ്ചാണ് 'രാജാസാബ് വേഴ്സസ് ഹുലഗപ്പ' കേസിൽ സുപ്രധാന ഉത്തരവ് പുറപ്പെടുവിച്ചത്. 10,000 രൂപയുടെ ചെക്കിലെ തുക തിരുത്തി 1,10,000 രൂപയാക്കി മാറ്റി എന്ന് വ്യക്തമായ കേസിൽ കീഴ്ക്കോടതിയും കർണാടക ഹൈക്കോടതിയും നൽകിയ ശിക്ഷാവിധി സുപ്രീം കോടതി റദ്ദാക്കി.
​ ചെക്കിൽ ഒപ്പിട്ടത് പ്രതിയാണെന്ന് സമ്മതിച്ചതിനാൽ, സാമ്പത്തിക ബാധ്യത നിലനിൽക്കുന്നുണ്ടെന്ന നിയമപരമായ അനുമാനം (Section 139 Presumption) കണക്കിലെടുത്താണ് വിചാരണക്കോടതിയും ഹൈക്കോടതിയും പ്രതിയെ ശിക്ഷിച്ചത്. ചെക്കിൽ തിരുത്തൽ വരുത്തിയിട്ടുണ്ടെന്ന് തെളിയിക്കാൻ പ്രതി കയ്യക്ഷര വിദഗ്ധന്റെ പരിശോധന ആവശ്യപ്പെട്ടില്ലെന്നതും ശിക്ഷയ്ക്ക് കാരണമായി കീഴ്ക്കോടതികൾ ചൂണ്ടിക്കാട്ടിയിരുന്നു.
​എന്നാൽ, തുക എഴുതിയ ഭാഗത്ത് വ്യക്തമായ തിരുത്തലുകളോ എഴുതിച്ചേർക്കലുകളോ ഒറ്റനോട്ടത്തിൽത്തന്നെ ദൃശ്യമാണെങ്കിൽ അത് തെളിയിക്കാൻ ഫോറൻസിക് തെളിവുകളുടെ ആവശ്യമില്ലെന്ന് പരമോന്നത കോടതി വ്യക്തമാക്കി. വ്യക്തമായി കാണാവുന്ന ഒരു തെളിവ് തെളിയിക്കാൻ വീണ്ടും ശാസ്ത്രീയ പരിശോധന നടത്തിയില്ലെന്ന പേരിൽ പ്രതിയെ ശിക്ഷിക്കാനാകില്ല.
​ നെഗോഷ്യബിൾ ഇൻസ്ട്രുമെന്റ്സ് ആക്ട് സെക്ഷൻ 87 പ്രകാരം, ചെക്ക് നൽകിയയാളുടെ സമ്മതമില്ലാതെ അതിൽ വരുത്തുന്ന ഏതൊരു പ്രധാന മാറ്റവും (Material Alteration) ആ ചെക്കിന്റെ നിയമസാധുത പൂർണ്ണമായും ഇല്ലാതാക്കുന്നു.
​ഒപ്പ് ശരിയാണെന്ന് സമ്മതിച്ചു എന്ന ഒറ്റക്കാരണത്താൽ മാത്രം സാമ്പത്തിക തിരിമറി കേസിൽ നടപടി എടുക്കരുത് എന്നും, ചെക്കിൽ എന്തെങ്കിലും തരത്തിലുള്ള തിരുത്തലുകൾ വരുത്തിയിട്ടുണ്ടോ എന്ന് കോടതികൾ നേരിട്ട് പരിശോധിക്കണമെന്നും ഈ വിധി വ്യക്തമാക്കുന്നു. ചെക്ക് ബൗൺസ് കേസുകളിൽ വ്യാജ ആരോപണം നേരിടുന്നവർക്ക് വലിയ ആശ്വാസം നൽകുന്നതാണ് സുപ്രീം കോടതിയുടെ ഈ തീരുമാനം.