ന്യൂഡൽഹി: നിരായുധരായി സമാധാനപരമായി പ്രതിഷേധിക്കുന്നവരെ അനധികൃതമായി തടങ്കലിൽ വെക്കരുതെന്ന് സുപ്രീംകോടതിയുടെ കർശന നിർദ്ദേശം. മുഖ്യ തിരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ട് നടക്കുന്ന സമരങ്ങളുടെ പശ്ചാത്തലത്തിൽ അസാധാരണമായി ഞായറാഴ്ച സിറ്റിംഗ് നടത്തിയാണ് ജസ്റ്റിസുമാരായ ജോയ്‌മല്യ ബാഗ്ചി, വി.മോഹന എന്നിവരടങ്ങിയ ബെഞ്ച് നിർണായക ഉത്തരവുകൾ പുറപ്പെടുവിച്ചത്.
​നിരോധനാജ്ഞ ബാധകമല്ലാത്ത മേഖലകളിൽ സമരം ചെയ്യുന്നവരെ യാതൊരു കാരണവശാലും നിയമവിരുദ്ധമായി കസ്റ്റഡിയിലെടുക്കരുതെന്ന് കോടതി വ്യക്തമാക്കി. സമരക്കാരെ അനധികൃതമായി കസ്റ്റഡിയിലെടുത്തിട്ടില്ലെന്ന കേന്ദ്രസർക്കാരിന്റെയും ഡൽഹി പൊലീസിന്റെയും വാദങ്ങൾ കോടതി തള്ളി. സംഭവത്തിൽ കേന്ദ്ര ആഭ്യന്തര സെക്രട്ടറി ഗോവിന്ദ് മോഹൻ, ഡൽഹി പൊലീസ് കമ്മീഷണർ അനുരാഗ് കുമാർ, ഡി.എം.ആർ.സി ചെയർപേഴ്സൺ ഡി.താര എന്നിവർക്ക് സുപ്രീംകോടതി കോടതിയലക്ഷ്യ നോട്ടീസ് അയച്ചു.
 പൊതുജനങ്ങളെ ബുദ്ധിമുട്ടിക്കുന്ന അനാവശ്യ നിയന്ത്രണങ്ങളും നഗരത്തിലെ ബാരിക്കേഡുകളും പുനഃപരിശോധിക്കണം. മെട്രോ, റെയിൽവേ സർവീസുകൾ സാധാരണനിലയിൽ പ്രവർത്തിക്കണം.
​ ഡൽഹിയിലെ ഇന്റർനെറ്റ് സേവനങ്ങൾ തടസ്സമില്ലാതെ തുടരണം. മാധ്യമപ്രവർത്തകർ, അഭിഭാഷകർ, മറ്റ് പ്രൊഫഷണലുകൾ എന്നിവരുടെ ജോടികൾക്ക് തടസ്സമുണ്ടാക്കരുത്.
​ സർക്കാരിന്റെ നിയന്ത്രണങ്ങൾക്കപ്പുറം സ്വതന്ത്രമായി നിയമവിരുദ്ധമായി പ്രവർത്തിക്കാൻ പൊലീസിന് അധികാരമില്ല.
​തുടരുന്ന സംഘർഷങ്ങൾ
​കോടതി ഉത്തരവുകൾ നിലനിൽക്കെത്തന്നെ, ജന്ദർമന്ദറിലേക്ക് മാർച്ച് നടത്തിയ എസ്.എഫ്.ഐ, ഐസ അടക്കമുള്ള വിദ്യാർത്ഥി സംഘടനകളുടെ പ്രവർത്തകരെ ഡൽഹി പൊലീസ് ബലപ്രയോഗത്തിലൂടെ കസ്റ്റഡിയിലെടുത്തു. എസ്‌.എഫ്.ഐ അഖിലേന്ത്യാ പ്രസിഡന്റ് ആദർശ് എം.സജി ഉൾപ്പെടെയുള്ള നേതാക്കൾക്ക് ലാത്തിച്ചാർജിൽ പരിക്കേറ്റു. ഡി.വൈ.എഫ്.ഐ നേതാവ് ജെയ്ക് സി. തോമസിനെ മർദ്ദിക്കുകയും എം.പി ജോൺ ബ്രിട്ടാസിന് ദേഹാസ്വാസ്ഥ്യം അനുഭവപ്പെടുകയും ചെയ്തത് സംഘർഷം കൂടുതൽ വഷളാക്കിയിട്ടുണ്ട്. കോൺഗ്രസ് നേതൃത്വത്തിലുള്ള 'ഇന്ത്യാ' മുന്നണിയുടെ പ്രതിഷേധങ്ങൾ ഇന്നും തുടരുന്നതിനാൽ ഡൽഹിയിൽ കൂടുതൽ സംഘർഷാവസ്ഥ നിലനിൽക്കുന്നു.