ന്യൂഡൽഹി: സ്ത്രീധന പീഡനക്കേസിൽ ഭർതൃപിതാവ്, ഭർതൃമാതാവ്, ഭർതൃസഹോദരി എന്നിവർക്കെതിരായ കേസ് സുപ്രീം കോടതി റദ്ദാക്കി. പരാതിയിലെ ആരോപണങ്ങൾ വ്യാജവും അവ്യക്തവുമാണെന്ന് ചൂണ്ടിക്കാട്ടിയാണ് സുപ്രീം കോടതിയുടെ ഈ നിർണ്ണായക വിധി.
സംഭവത്തിൽ ക്രൂരത നടത്തിയെന്ന് പരാതിക്കാരി ആരോപിച്ചെങ്കിലും, ഭർത്താവിനെതിരെ മാത്രമാണ് വ്യക്തമായ ആരോപണങ്ങളുള്ളതെന്നും ഭർതൃവീട്ടുകാർക്കെതിരെ പ്രത്യേകമായി കുറ്റങ്ങളൊന്നും പറഞ്ഞിട്ടില്ലെന്നും കോടതി കണ്ടെത്തി.
ഐപിസി 498-എ പ്രകാരം ഒരു കേസ് നിലനിൽക്കണമെങ്കിൽ, അത് ആത്മഹത്യയിലേക്ക് നയിക്കുകയോ ഗുരുതരമായ പരിക്കുകൾക്ക് കാരണമാകുകയോ ചെയ്യുന്ന തരത്തിലുള്ള ക്രൂരതയായിരിക്കണമെന്ന് കോടതി ചൂണ്ടിക്കാട്ടി. അത്തരം ഗുരുതരമായ ആരോപണങ്ങൾ ഈ കേസിൽ നിലനിൽക്കുന്നില്ലെന്ന് ജസ്റ്റിസ് ചന്ദുർക്കർ വിധിയിൽ വ്യക്തമാക്കി.
ഈ വിധിയിലൂടെ, പൊതുവായതും അവ്യക്തവുമായ ആരോപണങ്ങളുടെ പേരിൽ കുടുംബാംഗങ്ങളെ മൊത്തത്തിൽ പ്രതികളാക്കുന്ന പ്രവണത ശരിയല്ലെന്ന് സുപ്രീം കോടതി ഒരിക്കൽ കൂടി അടിവരയിട്ടു.
