ന്യൂഡൽഹി: ദാമ്പത്യ തർക്കത്തിനിടെ മുൻ ഭർത്താവിനും കുടുംബത്തിനും എതിരെ വ്യാജ ക്രിമിനൽ കേസുകൾ നൽകി ശാരീരികവും മാനസികവുമായ ബുദ്ധിമുട്ടുണ്ടാക്കിയതിന് ഐപിഎസ് ഉദ്യോഗസ്ഥയും മാതാപിതാക്കളും പരസ്യമായി നിരുപാധികം മാപ്പ് പറയണമെന്ന് സുപ്രീം കോടതി ഉത്തരവിട്ടു.
ഐപിഎസ് ഉദ്യോഗസ്ഥ നൽകിയ ഗുരുതരമായ ആരോപണങ്ങളെത്തുടർന്ന്, മുൻ ഭർത്താവ് 109 ദിവസവും അദ്ദേഹത്തിന്റെ പിതാവ് 103 ദിവസവും ജയിലിൽ കഴിഞ്ഞിരുന്നു. ഇന്ത്യൻ ശിക്ഷാ നിയമത്തിലെ 498A (ക്രൂരത), 307 (വധശ്രമം), 376 (ബലാത്സംഗം) വകുപ്പുകൾ പ്രകാരമുള്ള കുറ്റങ്ങളാണ് ഇവർക്കെതിരെ ചുമത്തിയിരുന്നത്."അവർ അനുഭവിച്ച ദുരിതങ്ങൾ ഒരു തരത്തിലും തിരികെ നൽകാനോ നഷ്ടപരിഹാരം നൽകാനോ കഴിയില്ല," എന്ന് നിരീക്ഷിച്ച ബെഞ്ച്, ധാർമ്മികമായ ഒരു പരിഹാരമെന്ന നിലയിൽ പരസ്യമായ മാപ്പ് അനിവാര്യമാണെന്നും ഊന്നിപ്പറഞ്ഞു.
ഐപിഎസ് ഉദ്യോഗസ്ഥ തന്റെ മുൻ ഭർത്താവിനും കുടുംബത്തിനും എതിരെ ആറ് ക്രിമിനൽ കേസുകളാണ് ഫയൽ ചെയ്തിരുന്നത്. ഇതിൽ രണ്ടെണ്ണം ക്രിമിനൽ വിശ്വാസ ലംഘനം (IPC 406) സംബന്ധിച്ചുള്ളതും മൂന്നെണ്ണം ഗാർഹിക പീഡന നിരോധന നിയമപ്രകാരമുള്ളതുമായിരുന്നു. ഇതുകൂടാതെ, കുടുംബ കോടതിയിൽ വിവാഹമോചനത്തിനും ജീവനാംശത്തിനും വേണ്ടിയുള്ള നടപടികളും അവർ തുടർന്നിരുന്നു.
ദാമ്പത്യ തർക്കങ്ങളിൽ ക്രിമിനൽ നിയമം ദുരുപയോഗം ചെയ്യുന്നതിനെതിരെയുള്ള ശക്തമായ മുന്നറിയിപ്പായിട്ടാണ് സുപ്രീം കോടതിയുടെ ഈ ഉത്തരവ് വിലയിരുത്തപ്പെടുന്നത്.
