ന്യൂഡൽഹി: ചില ഹൈക്കോടതി ജഡ്ജിമാരുടെ പ്രവർത്തനം നിരാശാജനകമാണെന്ന് സുപ്രീം കോടതി ജഡ്ജി ജസ്റ്റിസ് സൂര്യകാന്ത്. രാജ്യത്ത് പല ജഡ്ജിമാരും നീതിക്കായി രാവും പകലും കഠിനാധ്വാനം ചെയ്യുമ്പോൾ ചിലരുടെ ഭാഗത്തുനിന്ന് പ്രതിബദ്ധത കുറവുണ്ടാകുന്നത് നീതിന്യായ വ്യവസ്ഥയ്ക്ക് തന്നെ അപമാനമാണെന്ന് അദ്ദേഹം പറഞ്ഞു.
സുപ്രീം കോടതി ബാർ അസോസിയേഷൻ സംഘടിപ്പിച്ച 'എല്ലാവർക്കും നീതി' എന്ന വിഷയത്തിലുള്ള പ്രഭാഷണത്തിൽ സംസാരിക്കുകയായിരുന്നു ജസ്റ്റിസ് സൂര്യകാന്ത്. പൊതു പണം കൈപ്പറ്റുന്ന ജഡ്ജിമാർ സമൂഹത്തോടുള്ള തങ്ങളുടെ കടമ നിറവേറ്റുന്നുണ്ടോയെന്ന് ഓരോ ദിവസവും ഉറങ്ങാൻ പോകുന്നതിനു മുൻപ് സ്വയം ചോദിക്കണമെന്ന് അദ്ദേഹം ഓർമ്മിപ്പിച്ചു.
കേസുകൾ നീട്ടിവെക്കുന്നതും, തുടർച്ചയായ അവധികളും, വാദങ്ങൾ നീണ്ടുപോകുന്നതും കേസുകൾ കെട്ടിക്കിടക്കാൻ കാരണമാകുന്നുണ്ട്. നീതിക്കുവേണ്ടി കാത്തിരിക്കുന്ന ദശലക്ഷക്കണക്കിന് ആളുകളുണ്ടെന്നും കോടതികൾ ഇത് മറക്കരുതെന്നും അദ്ദേഹം കൂട്ടിച്ചേർത്തു.
സമ്പന്നർക്ക് മാത്രമായി നീതി പരിമിതപ്പെടുന്ന ഒരു അവസ്ഥ നിലവിലുണ്ടെന്നും, മുതിർന്ന അഭിഭാഷകർക്ക് ഉയർന്ന ഫീസ് നൽകാൻ കഴിയുന്നവർക്ക് മാത്രം നീതി ലഭിക്കുന്ന സാഹചര്യം നീതിന്യായ വ്യവസ്ഥയുടെ ലക്ഷ്യങ്ങൾക്ക് വിരുദ്ധമാണെന്നും അദ്ദേഹം ചൂണ്ടിക്കാട്ടി. ചീഫ് ജസ്റ്റിസ് ബി.ആർ. ഗവായിയും എസ്.സി.ബി.എ. പ്രസിഡൻ്റ് വികാസ് സിംഗും ചടങ്ങിൽ പങ്കെടുത്തു.
