അതിജീവിതയുടെ നിലപാട് നിർണായകമായി
പോക്സോ കേസിൽ ശിക്ഷിക്കപ്പെട്ട യുവാവിന്റെ ശിക്ഷ സുപ്രീം കോടതി റദ്ദാക്കി. 14 വയസ്സുള്ള പെൺകുട്ടിയുമായി പ്രണയത്തിലായിരുന്ന 24 വയസ്സുകാരനാണ് കേസിൽ ഉൾപ്പെട്ടത്. പിന്നീട് ഇരുവരും പ്രായപൂർത്തിയായപ്പോൾ വിവാഹം കഴിക്കുകയും ഒരുമിച്ച് ജീവിക്കുകയും ചെയ്യുകയായിരുന്നു. അവർക്ക് ഒരു കുട്ടിയുമുണ്ട്.
അതിജീവിതയുടെ മൊഴിക്ക് പ്രാധാന്യം
കേസിൽ അതിജീവിതയായ യുവതി, പ്രതിയോടുള്ള തന്റെ സ്നേഹബന്ധം കോടതിയെ അറിയിക്കുകയും അദ്ദേഹത്തോടൊപ്പം ജീവിക്കാനുള്ള ആഗ്രഹം വ്യക്തമാക്കുകയും ചെയ്തു. ഇത് പരിഗണിച്ച് ജസ്റ്റിസ് അഭയ് എസ്. ഓക്, ജസ്റ്റിസ് ഉജ്ജൽ ഭൂയാൻ എന്നിവരടങ്ങിയ ബെഞ്ച് ശിക്ഷ റദ്ദാക്കുകയായിരുന്നു. നിയമപരമായി യുവാവിന്റെ പ്രവൃത്തി കുറ്റകരമാണെന്ന് കോടതി ചൂണ്ടിക്കാട്ടിയെങ്കിലും, അതിജീവിത അതിനെ അങ്ങനെ കാണുന്നില്ലെന്നും നിരീക്ഷിച്ചു.
സാമൂഹിക കാഴ്ചപ്പാടിന് വിമർശനം.
കേസിന്റെ മുൻ ഘട്ടങ്ങളിൽ അതിജീവിതയുടെ അഭിപ്രായം ആരായാത്തതിനെ സുപ്രീം കോടതി രൂക്ഷമായി വിമർശിച്ചു. സ്ത്രീകളുടെ നിലപാടുകൾ അന്ധമായി അവഗണിക്കപ്പെടുന്നത് ശരിയല്ലെന്നും, സാമൂഹിക വ്യവസ്ഥയും നിയമ രീതികളും അവരുടെ ദുരിതം മനസ്സിലാക്കുന്നതിൽ പരാജയപ്പെട്ടുവെന്നും കോടതി നിരീക്ഷിച്ചു.
കൂടുതൽ പഠനത്തിനായി ബംഗാൾ സർക്കാരിനോട് മാനസികാരോഗ്യ വിദഗ്ദ്ധരുടെ ഒരു സമിതി രൂപീകരിക്കാൻ കോടതി നിർദ്ദേശിച്ചു. കൂടാതെ, അതിജീവിതയ്ക്ക് വിദ്യാഭ്യാസ സഹായവും തൊഴിൽ പരിശീലനവും നൽകാനും നിർദ്ദേശിച്ചു.
