ദോഹ: ഖത്തർ സ്‌പോർട്‌സ് ഫോർ ഓൾ ഫെഡറേഷൻ അസ്പയർ ഇൻഡോർ ട്രാക്കിൽ സംഘടിപ്പിച്ച "സമ്മർ ഓഫ് സ്‌പോർട്‌സ് ഫോർ ഓൾ 2026" റൺസ് സീരീസ് വിജയകരമായി സമാപിച്ചു. വിവിധ പ്രായക്കാരും രാജ്യക്കാരുമായ 1,362 ഓട്ടക്കാരാണ് ടൂർണമെന്റിൽ മാറ്റുരച്ചത്.
ഓപ്പൺ റണ്ണിൽ 676 പേരും വനിതകൾക്കായുള്ള പ്രത്യേക മത്സരത്തിൽ 686 പേരും പങ്കെടുത്തു. വനിതാ വിഭാഗത്തിൽ പങ്കെടുത്തവരിൽ 641 പേരും ഖത്തരി പൗരന്മാരായിരുന്നു എന്നത് ശ്രദ്ധേയമായി. വൻ ജനപങ്കാളിത്തം കൊണ്ട് ശ്രദ്ധേയമായ മത്സരങ്ങൾക്കൊടുവിൽ വിവിധ വിഭാഗങ്ങളിലെ വിജയികൾക്ക് സ്മരണിക മെഡലുകളും പ്രോത്സാഹന പുരസ്കാരങ്ങളും സമ്മാനിച്ചു.
വ്യത്യസ്ത പ്രായക്കാർക്കായി സമയബന്ധിത വെല്ലുവിളികളോടെയാണ് മത്സരങ്ങൾ നടത്തിയത്.സമൂഹത്തിൽ കായിക വിനോദത്തോടുള്ള താത്പര്യം വർദ്ധിച്ചുവരുന്നതിന്റെ തെളിവാണ് ഈ പങ്കാളിത്തമെന്ന് ഖത്തർ സ്‌പോർട്‌സ് ഫോർ ഓൾ ഫെഡറേഷൻ എക്‌സിക്യൂട്ടീവ് ഡയറക്ടർ അബ്ദുള്ള അൽ ദോസരി പറഞ്ഞു. കുട്ടികളിലും ചെറുപ്പക്കാരിലും കായിക അവബോധം വളർത്താൻ കുടുംബസമേതമുള്ള ഈ പങ്കാളിത്തം സഹായിക്കുമെന്നും അദ്ദേഹം കൂട്ടിച്ചേർത്തു.
വരുന്ന വെള്ളിയാഴ്ച വനിതകളുടെ നാലാമത്തെയും അവസാനത്തെയും റൗണ്ട് മത്സരങ്ങൾ നടക്കും. ഈ മാസാവസാനത്തോടെ "ഓട്ടം ഓഫ് സ്‌പോർട്‌സ് ഫോർ ഓൾ" റൺസ് സീരീസിന് തുടക്കമാകുമെന്നും സംഘാടകർ അറിയിച്ചു.
