​ദോഹ:വേനലവധിക്കാലം വെറുതെ വീട്ടിലിരുന്ന് സമയം കളയാനുള്ളതല്ല, മറിച്ച് പുതിയ കഴിവുകൾ സ്വായത്തമാക്കാനും ചിന്തകളെ വികസിപ്പിക്കാനുമുള്ള അവസരമാണെന്ന് തെളിയിക്കുകയാണ് ഖത്തറിലെ കുട്ടികൾ. കായിക-യുവജന മന്ത്രാലയത്തിന്റെ നേതൃത്വത്തിൽ രാജ്യത്തുടനീളം ആരംഭിച്ച 'സമ്മർ പ്ലാൻ 2026' പദ്ധതിക്ക് കീഴിൽ 550-ലധികം വിദ്യാഭ്യാസ, കായിക, സാംസ്കാരിക പരിപാടികളാണ് സംഘടിപ്പിച്ചിരിക്കുന്നത്.
​യൂത്ത് സെന്ററുകളും വിവിധ പങ്കാളിത്ത സ്ഥാപനങ്ങളും ചേർന്ന് നടപ്പിലാക്കുന്ന ഈ പദ്ധതി കുട്ടികളിലെ അക്കാദമിക-സർഗ്ഗാത്മക ശേഷികൾ വളർത്തുന്നതിനൊപ്പം സാമൂഹിക പ്രതിബദ്ധതയും വർദ്ധിപ്പിക്കുന്നു. പൗരബോധം വളർത്തുന്ന 142 പ്രവർത്തനങ്ങൾ, ഗവേഷണ-വിദ്യാഭ്യാസ മേഖലകളിലെ 125 പ്രോഗ്രാമുകൾ, കായിക-ആരോഗ്യ സംബന്ധിയായ 118 പ്രവർത്തനങ്ങൾ എന്നിവ ഇതിൽ ഉൾപ്പെടുന്നു. കൂടാതെ സംരംഭകത്വം, സാങ്കേതികവിദ്യ, പരിസ്ഥിതി സംരക്ഷണം എന്നിവയിലും പ്രത്യേക പരിശീലനങ്ങൾ നൽകുന്നുണ്ട്.
​കായിക പ്രേമികൾക്കായി ആസ്പയർ സോൺ, അൽ ഷഖബ്, ഖത്തർ ഇക്വസ്ട്രിയൻ ഫെഡറേഷൻ എന്നിവയുടെ ആഭിമുഖ്യത്തിൽ നീന്തൽ, ഫുട്ബോൾ, ജിംനാസ്റ്റിക്സ്, കുതിരസവാരി തുടങ്ങിയ ആധുനിക കായിക പരിശീലനങ്ങളും ഒരുക്കിയിട്ടുണ്ട്. സയൻസ്, ടെക്നോളജി, റോബോട്ടിക്സ്, ആർട്ട് എന്നിവ പരിചയപ്പെടുത്താൻ ഖത്തർ നാഷണൽ ലൈബ്രറിയും ഒലി ഒലി ചിൽഡ്രൻസ് മ്യൂസിയവും മുന്നിലുണ്ട്. പാരമ്പര്യ കലകളും അറബി ഭാഷയും നാടകവും അഭ്യസിപ്പിക്കാൻ കതാറ കൾച്ചറൽ വില്ലേജും ക്യാമ്പുകൾ സംഘടിപ്പിക്കുന്നു.
​ഭിന്നശേഷിക്കാരായ കുട്ടികൾക്കായി എജ്യുക്കേഷൻ സിറ്റിയുടെ നേതൃത്വത്തിൽ പ്രത്യേക 'എബിലിറ്റി ഫ്രണ്ട്‌ലി' ക്യാമ്പുകളും സജ്ജമാണ്. ഇത്തരം പ്രവർത്തനങ്ങൾ കുട്ടികളുടെ സ്ക്രീൻ ടൈം (Screen Time) കുറയ്ക്കാനും, ശാരീരിക സുഖവും സാമൂഹിക ഇടപെടലുകളും വർദ്ധിപ്പിക്കാനും സഹായിക്കുന്നതായി രക്ഷാകർത്താക്കൾ അഭിപ്രായപ്പെടുന്നു. ശാസ്ത്രീയ പഠനങ്ങൾ പ്രകാരം ഇത്തരം ക്യാമ്പുകളിൽ പങ്കെടുക്കുന്ന കുട്ടികളിൽ 92 ശതമാനം പേരും വ്യക്തിത്വ വികസനവും, 76 ശതമാനം പേർ പുതിയ പ്രായോഗിക നൈപുണ്യങ്ങളും നേടുന്നതായി വ്യക്തമാക്കുന്നു