ദോഹ ഖത്തറിലെ വിവിധ പ്രദേശങ്ങളിൽ ഞായറും തിങ്കളും (ജനുവരി 25, 26) ശക്തമായ വടക്കുപടിഞ്ഞാറൻ കാറ്റ് വീശുമെന്ന് ഖത്തർ കാലാവസ്ഥാ വകുപ്പ് (QMD) മുന്നറിയിപ്പ് നൽകി. വടക്കൻ അറേബ്യൻ ഉപദ്വീപിൽ നിന്ന് മുന്നേറുന്ന കാറ്റ് പുതുമയുള്ളതിൽ നിന്ന് അതിശക്തമായ നിലയിലേക്ക് മാറാനിടയുണ്ടെന്നും, ഇതോടൊപ്പം പല ഭാഗങ്ങളിലും പൊടിക്കാറ്റ് അനുഭവപ്പെടുമെന്നും വകുപ്പ് അറിയിച്ചു.
കാറ്റിന്റെ ശക്തി വർധിക്കുന്നതോടെ ചില സമയങ്ങളിൽ ദൃശ്യത ഗണ്യമായി കുറയാൻ സാധ്യതയുണ്ടെന്നും, വാഹനയാത്രക്കാർ ജാഗ്രത പാലിക്കണമെന്നും മുന്നറിയിപ്പിൽ പറയുന്നു. താപനിലയിൽ കൂടി കുറവ് അനുഭവപ്പെടുന്ന തിനാൽ തണുപ്പ് ശക്തമാകുമെന്നും കാലാവസ്ഥാ വകുപ്പ് വ്യക്തമാക്കി.
ഈ കാലയളവിൽ കടൽ മേഖലയിൽ മുന്നറിയിപ്പ് നിലനിൽക്കുമെന്നും, മത്സ്യത്തൊഴിലാളികളും കടൽയാത്രക്കാരും പ്രത്യേക ജാഗ്രത പാലിക്കണമെന്നും ഖത്തർ കാലാവസ്ഥാ വകുപ്പ് അഭ്യർത്ഥിച്ചു.
