ചെങ്ങന്നൂർ : ചെങ്ങന്നൂർ താലൂക്കിൽ ചെറിയനാട് പഞ്ചായത്തിൽ തെരുവ് നായയുടെ ആക്രമണത്തിൽ വീട്ടമ്മയ്ക്ക് ഗുരുതര പരിക്കേറ്റു. നാലാം വാർഡ് മാമ്പ്ര പ്ലാമൂട്ടിൽ കമലമ്മ (75)യ്ക്കാണ് നായയുടെ കടിയേറ്റത്. മുഖത്തും ചുണ്ടിലുമാണ് ഇവർക്ക് ഗുരുതരമായി പരിക്കേറ്റത്.
കഴിഞ്ഞ ദിവസം രാവിലെ തന്റെ വളർത്തു പൂച്ചയെ ആക്രമിക്കാൻ ശ്രമിച്ച നായയെ ഓടിക്കാൻ ശ്രമിക്കുന്നതിനിടെയാണ് കമലമ്മയ്ക്ക് നേരെ ആക്രമണമുണ്ടായത്. നായ ചാടി കമലമ്മയുടെ മുഖത്ത് കടിക്കുകയും ചുണ്ട് കടിച്ചു കീറുകയും ചെയ്തു. ആക്രമണത്തിൽ നിലത്തുവീണതിനെ തുടർന്ന് മറ്റ് പരിക്കുകളും പറ്റി.
തുടർന്ന് മാവേലിക്കര ജില്ലാ ആശുപത്രിയിൽ പ്രാഥമിക ചികിത്സ നൽകിയ ശേഷം കൂടുതൽ വിദഗ്ധ ചികിത്സയ്ക്കായി ആലപ്പുഴ മെഡിക്കൽ കോളേജ് ആശുപത്രിയിലേക്ക് മാറ്റി. കമലമ്മയെ ആക്രമിച്ച നായ ഇടമുറി പ്രദേശത്ത് മറ്റ് പലരേയും കടിച്ചിട്ടുണ്ട്.
കഴിഞ്ഞ ആറ് മാസത്തിനിടെ നാലാം വാർഡിൽ മാത്രം സ്കൂൾ വിദ്യാർത്ഥി ഉൾപ്പെടെ നാല് പേർക്ക് തെരുവ് നായ ആക്രമണത്തിൽ പരിക്കേറ്റിരുന്നു. തെരുവ് നായ ശല്യം രൂക്ഷമായിട്ടും പഞ്ചായത്തിൽ എബിസി (ആനിമൽ ബർത്ത് കൺട്രോൾ) പദ്ധതി നടപ്പാക്കിയിട്ടില്ലെന്നാണ് അധികൃതർ പറയുന്നത്.
തെരുവ് നായ ആക്രമണത്തിൽ നിന്നും ജനങ്ങളെ സംരക്ഷിക്കാൻ ഫലപ്രദമായ നടപടികൾ സ്വീകരിച്ചില്ലെങ്കിൽ ശക്തമായ പ്രതിഷേധ പരിപാടികളുമായി മുന്നോട്ട് പോകുമെന്ന് നാലാം വാർഡ് മെംമ്പർ ഒ.ടി. ജയമോഹൻ പറഞ്ഞു.
