ലണ്ടൻ/ദോഹ: ഇറാൻ-ഇസ്രയേൽ യുദ്ധം മുറുകുന്ന പശ്ചാത്തലത്തിൽ ആഗോള എണ്ണ വിപണിയിൽ കടുത്ത അനിശ്ചിതത്വം. ഹോർമുസ് കടലിടുക്ക് വഴി ഇറാന്റെ തടസ്സപ്പെടുത്തലുകൾ ഉണ്ടായതോടെ ലോകത്തെ പ്രധാന എണ്ണക്കടത്ത് പാതകൾ നിശ്ചലമായി. സാഹചര്യം നേരിടാൻ ഒപെക് പ്ലസ് (OPEC+) ഉല്പാദനത്തിൽ നേരിയ വർദ്ധനവ് പ്രഖ്യാപിച്ചെങ്കിലും വിപണിയിലെ ആശങ്കയകറ്റാൻ ഇത് പര്യാപ്തമല്ലെന്നാണ് വിലയിരുത്തൽ.ലോകത്തിലെ എണ്ണ വ്യാപാരത്തിന്റെ 20 ശതമാനത്തിലേറെ കടന്നുപോകുന്ന ഏറ്റവും പ്രധാനപ്പെട്ട പാതയായ ഹോർമുസ് കടലിടുക്ക് (Strait of Hormuz) ഇറാൻ അടച്ചതോടെ ശനിയാഴ്ച മുതൽ ഇന്ധന നീക്കം പൂർണ്ണമായും നിലച്ചു.
നൂറുകണക്കിന് കപ്പലുകൾ നടുക്കടലിൽ നങ്കൂരമിട്ടിരിക്കുകയാണ്.
​മേഖലയിൽ പല കപ്പലുകൾക്കും നേരെ ആക്രമണമുണ്ടായതായും റിപ്പോർട്ടുകളുണ്ട്.
​ഗതാഗതം പുനഃസ്ഥാപിക്കുന്നത് വരെ സൗദി അറേബ്യയ്ക്കും യുഎഇയ്ക്കും പോലും എണ്ണ കയറ്റുമതി ചെയ്യുക വെല്ലുവിളിയാകും.വിപണിയിലെ ക്ഷാമം പരിഹരിക്കാനായി ഏപ്രിൽ മുതൽ പ്രതിദിനം 2,06,000 ബാരൽ അധികം ഉല്പാദിപ്പിക്കാൻ ഒപെക് പ്ലസ് രാജ്യങ്ങൾ തീരുമാനിച്ചു.മൂന്ന് മാസത്തെ ഇടവേളയ്ക്ക് ശേഷമാണ് ഉല്പാദനം വർദ്ധിപ്പിക്കുന്നത്.
​എന്നാൽ ഇത് ആഗോള വിതരണത്തിന്റെ 0.2 ശതമാനത്തിൽ താഴെ മാത്രമായതിനാൽ വിപണിയിൽ വലിയ മാറ്റം ഉണ്ടാക്കില്ലെന്ന് വിദഗ്ധർ ചൂണ്ടിക്കാട്ടുന്നു.
​സൗദിയും യുഎഇയും ഒഴികെയുള്ള രാജ്യങ്ങൾക്ക് ഉല്പാദനം വർദ്ധിപ്പിക്കാനുള്ള ശേഷി (Spare Capacity) നിലവിൽ കുറവാണെന്നതും പ്രതിസന്ധിയാണ്.യുദ്ധഭീതിയെത്തുടർന്ന് വെള്ളിയാഴ്ച ബ്രെന്റ് ക്രൂഡ് വില ബാരലിന് 73 ഡോളറിലെത്തിയിരുന്നു. എന്നാൽ ഞായറാഴ്ചയോടെ ഇത് 10 ശതമാനം വരെ വർദ്ധിച്ച് 80 ഡോളറിലെത്തി.സംഘർഷം തുടർന്നാൽ എണ്ണവില ബാരലിന് 100 ഡോളർ കടന്നേക്കുമെന്ന് പശ്ചിമേഷ്യൻ നേതാക്കളും സാമ്പത്തിക വിദഗ്ധരും മുന്നറിയിപ്പ് നൽകുന്നു.
​യുഎസ് ആക്രമണം മുൻകൂട്ടി കണ്ട് സൗദി അറേബ്യ കഴിഞ്ഞ ആഴ്ചകളിൽ ഉല്പാദനം പ്രതിദിനം 5 ലക്ഷം ബാരൽ വരെ വർദ്ധിപ്പിച്ചിരുന്നു.റഷ്യയും സൗദിയും ഉൾപ്പെടെ എട്ട് രാജ്യങ്ങളാണ് ഉല്പാദന വർദ്ധനവിന് നേതൃത്വം നൽകുന്നത്. എങ്കിലും യുദ്ധം കാരണം ഇവ വിപണിയിൽ എത്തിക്കുന്നത് പ്രായോഗികമായി പ്രയാസകരമാണ്.ഇന്ധനവില വർദ്ധിക്കുന്നത് ഇന്ത്യ ഉൾപ്പെടെയുള്ള ഇറക്കുമതി രാജ്യങ്ങളിൽ വൻ വിലക്കയറ്റത്തിന് കാരണമാകും.ഗൾഫ് മേഖലയിലെ കപ്പൽ ഗതാഗതം സാധാരണ നിലയിലാകാതെ ഒപെക്കിന്റെ ഉല്പാദന വർദ്ധനവ് വിപണിയെ ശാന്തമാക്കില്ലെന്ന് അനലിസ്റ്റുകൾ അഭിപ്രായപ്പെടുന്നു. വരും ദിവസങ്ങളിലെ യുദ്ധഗതിയാകും എണ്ണവില നിശ്ചയിക്കുക.