തിരുവനന്തപുരം: സംസ്ഥാനത്തെ കീഴ്ക്കോടതി ജുഡീഷ്യൽ ഓഫീസർമാരുടെ വിരമിക്കൽ പ്രായം 60-ൽ നിന്ന് 62 വയസ്സായി ഉയർത്തണമെന്ന നീണ്ടകാലത്തെ ആവശ്യം സംസ്ഥാന സർക്കാർ ഔദ്യോഗികമായി തള്ളി. കേരള ജുഡീഷ്യൽ ഓഫീസേഴ്സ് അസോസിയേഷൻ സമർപ്പിച്ച നിവേദനത്തിലാണ് ആഭ്യന്തര വകുപ്പ് ഉത്തരവ് പുറപ്പെടുവിച്ചത്. സർക്കാരിന്റെ ഈ നിലപാട് ആയിരക്കണക്കിന് കീഴ്ക്കോടതി ഉദ്യോഗസ്ഥർക്ക് വലിയ തിരിച്ചടിയായിരിക്കുകയാണ്.
2025 ജൂണിൽ കെ.ജെ.ഒ.എ സമർപ്പിച്ച നിവേദനത്തിൽ ഏഴ് മാസത്തിലേറെയായി നടപടിയുണ്ടാകാത്തതിനെ തുടർന്ന് അസോസിയേഷൻ കേരള ഹൈക്കോടതിയെ സമീപിച്ചിരുന്നു. വിഷയത്തിൽ അടിയന്തരമായി തീരുമാനമെടുക്കാൻ 2025 നവംബർ 10-ലെ വിധിയിലൂടെ ഹൈക്കോടതി സർക്കാരിന് നിർദ്ദേശം നൽകിയിരുന്നു. ഇതിന് പിന്നാലെയാണ് ആവശ്യം നിരസിച്ചുകൊണ്ടുള്ള പുതിയ ഉത്തരവ്.
സർക്കാരിന്റെ തടസ്സവാദം:
സുപ്രീം കോടതി ജഡ്ജിമാരുടെ വിരമിക്കൽ പ്രായം 65-ഉം ഹൈക്കോടതി ജഡ്ജിമാരുടേത് 62-ഉം ആയിരിക്കെ, ഉന്നത നീതിപീഠങ്ങളിലെ വിരമിക്കൽ പ്രായം ഉയർത്താതെ കീഴ്ക്കോടതി ഓഫീസർമാരുടെ പ്രായപരിധി വർധിപ്പിക്കുന്നത് യുക്തിസഹമല്ലെന്നാണ് സർക്കാരിന്റെ വാദം.
എന്നാൽ ഈ വിഷയം അനിശ്ചിതമായി നീട്ടിക്കൊണ്ടുപോകാനുള്ള സാങ്കേതിക കാരണമായി സർക്കാർ ഇതിനെ ഉയർത്തിക്കാട്ടുകയാണെന്ന് വിമർശനമുണ്ട്. ഹൈക്കോടതി വിധിയെ അടിസ്ഥാനമാക്കിയുള്ള നിർദ്ദേശങ്ങൾ പാലിച്ചതായി ഉത്തരവിൽ പറയുന്നുണ്ടെങ്കിലും, നീതിയുക്തമായ ആശ്വാസം നിഷേധിക്കപ്പെട്ടതിൽ ജുഡീഷ്യൽ ഓഫീസർമാർക്കിടയിൽ വലിയ അമർഷവും നിരാശയും നിലനിൽക്കുന്നുണ്ട്.
