തിരുവനന്തപുരം: സംസ്ഥാനത്തിന്റെ പേര് ഔദ്യോഗികമായി 'കേരളം' എന്നാക്കി മാറ്റുന്നതിനുള്ള നടപടികൾക്ക് വേഗം കൂടുന്നു. കേന്ദ്ര മന്ത്രിസഭയുടെ അംഗീകാരം ലഭിച്ചതോടെ, അടുത്ത പാർലമെന്റ് സമ്മേളനത്തിൽ ബിൽ അവതരിപ്പിച്ച് രാഷ്ട്രപതിയുടെ അനുമതിയോടെ പേരുമാറ്റം യാഥാർത്ഥ്യമാകും. ഇതോടെ ഭരണരംഗത്തും ഗതാഗത മേഖലയിലും വലിയ മാറ്റങ്ങൾക്കാണ് വഴിതെളിയുന്നത്.
പ്രധാന മാറ്റങ്ങൾ ഒറ്റനോട്ടത്തിൽ:
ഔദ്യോഗിക മുദ്രണങ്ങൾ: ഗവൺമെന്റ് ഓഫ് കേരള എന്നത് മാറി 'ഗവൺമെന്റ് ഓഫ് കേരളം' എന്നാകും. മന്ത്രിമാരുടെ വാഹനങ്ങൾ ഉൾപ്പെടെയുള്ളവയിൽ 'കേരളം സ്റ്റേറ്റ്' എന്നാകും ഇനി രേഖപ്പെടുത്തുക.
കേരളം എക്സ്പ്രസ്: രാജ്യത്തെ പ്രധാന ട്രെയിനുകളിലൊന്നായ കേരള എക്സ്പ്രസിന്റെ പേര് 'കേരളം എക്സ്പ്രസ്' എന്ന് പുനർനാമകരണം ചെയ്യണമെന്ന് സംസ്ഥാന സർക്കാർ റെയിൽവേ മന്ത്രാലയത്തോട് ആവശ്യപ്പെടും.
ഭാഷാപരമായ മാറ്റങ്ങൾ: 'കേരള സംസ്ഥാനം' എന്ന് ഉപയോഗിക്കുന്ന ഇടങ്ങളിലെല്ലാം 'കേരളം' എന്ന് ചേർക്കും. ചില സന്ദർഭങ്ങളിൽ 'കേരളം' എന്ന് ചേർക്കുന്നത് അഭംഗിയാണെങ്കിൽ ഉചിതമായ വാക്കുകൾ കണ്ടെത്താൻ വിദഗ്ദ്ധ സമിതിയെ നിയോഗിക്കും.
മാറ്റമില്ലാത്തവ:
ചില സ്ഥാപനങ്ങളുടെ പേരിൽ മാറ്റമുണ്ടാകാൻ സാധ്യതയില്ലെന്നാണ് റിപ്പോർട്ടുകൾ സൂചിപ്പിക്കുന്നത്:
കേരള ഹൈക്കോടതി: മദ്രാസ്, ബോംബെ ഹൈക്കോടതികളുടെ മാതൃകയിൽ ഹൈക്കോടതിയുടെ പേര് മാറ്റമില്ലാതെ തുടർന്നേക്കും.
കേരള യൂണിവേഴ്സിറ്റി: സർവകലാശാലയുടെ പേരിലും നിലവിലെ രീതി തുടരാനാണ് സാധ്യത.
"കേരളം എന്നു കേട്ടാലോ തിളയ്ക്കണം ചോര നമുക്ക് ഞരമ്പുകളിൽ" എന്ന വള്ളത്തോളിന്റെ വരികളെ അന്വർത്ഥമാക്കുന്ന രീതിയിലാണ് മലയാളത്തിന്റെ തനിമ നിലനിർത്തിക്കൊണ്ടുള്ള ഈ പേരുമാറ്റം.
അടുത്ത മന്ത്രിസഭായോഗത്തിൽ ഇത് സംബന്ധിച്ച കൂടുതൽ തീരുമാനങ്ങൾ ഉണ്ടാകും. തിരഞ്ഞെടുപ്പിന് മുമ്പ് തന്നെ പേരുമാറ്റം ഔദ്യോഗികമായി നിലവിൽ വരുമെന്നാണ് സൂചന.
