​ദോഹ:  29-ാമത് പ്രവാസി ദോഹ ബഷീർ പുരസ്ക‌ാരത്തിന് പ്രശസ്ത ഏഷ്യൻ ഗെയിംസ് മെഡൽ ജേതാവും അത്ലറ്റിക്സ് പരിശീലകനുമായ ഒ.എൽ. തോമസിന്.കോഴിക്കോട് നടന്നവാർത്താ സമ്മേളനത്തിലാണ് അവാർഡ് ജേതാവിനെ പ്രഖ്യാപിച്ചത്.
തൃശൂർ പാവറട്ടി സ്വദേശിയായ ഒ.എൽ. തോമസ് 
 1968-1970 കാലഘട്ടത്തിൽ 'ഇന്ത്യയിലെ ഏറ്റവും വേഗമേറിയ മനുഷ്യൻ' എന്ന പദവി അലങ്കരിച്ചl കായികപ്രതിഭയാണ്. പ്രവാസി ദോഹ ബഷീർ പുരസ്കാര ചരിത്രത്തിൽ ആദ്യമായാണ് ഒരു കായികതാരം ഈ ബഹുമതിക്ക് അർഹനാകുന്നത്.
​വൈശാഖൻ (ജൂറി ചെയർമാൻ), പി. ഷംസുദ്ദീൻ, എം.എ. റഹ്മാൻ, കെ.കെ. സുധാകരൻ, സി.വി. റപ്പായി എന്നിവരായിരുന്നു 
 പുരസ്കാര നിർണ്ണയ സമിതിഅംഗങ്ങൾ.
​അരലക്ഷം രൂപയും പ്രശസ്ത ശില്പി നമ്പൂതിരി രൂപകൽപ്പന ചെയ്‌ത ശില്‌പവും പ്രശസ്‌തി പത്രവുമടങ്ങുന്നതാണ് അവാർഡ്. പുരസ്കാര ജേതാവിൻ്റെ നാട്ടിലെ  പഠിക്കാൻ മിടുക്കനായ ഒരു വിദ്യാർഥിക്ക് പ്രൊഫ. എം.എൻ. വിജയൻ സ്‌മാരക സ്കോളർഷിപ്പ് അവാർഡും ഇതോടൊപ്പം നൽകുമെന്ന് ഭാരവാഹികൾ അറിയിച്ചു.അത്ലറ്റിക്‌സിനെയും കായിക-ഫിറ്റ്നസ് മേഖലയെയും ആസ്‌പദമാക്കി 55 വർഷത്തിലേറെ നീളുന്ന അനുഭവസമ്പത്തുള്ള വ്യക്തിത്വമാണ് ഒ.എൽ. തോമസിന്റേതെന്ന് ജൂറി വിലയിരുത്തി. തുടക്കത്തിൽ ഫുട്ബോൾ ടീമിലെ ഏറ്റവും കൂടുതൽ ഗോൾ നേടിയ താരമായിരുന്നിട്ടും, ആ വിജയം ഉപേക്ഷിച്ച് അദ്ദേഹം തന്റെ സ്വന്തം തട്ടകമായ അത്ലറ്റിക്സിലേക്ക് മാറിയത് ഇന്ത്യയെ അന്താരാഷ്ട്ര തലത്തിൽ പ്രതിനിധീകരിക്കാനുള്ള വലിയ സൗഭാഗ്യമായി മാറി. ഈ മാറ്റമാണ് അദ്ദേഹത്തെ ലോകത്തിന്റെ നെറുകയിലെത്തിച്ചതെന്നും ജൂറി അഭിപ്രായപ്പെട്ടു.ആറാമത് ഏഷ്യൻ ഗെയിംസിൽ ഇന്ത്യയെ പ്രതിനിധീകരിച്ച് 4 x 100 മീറ്റർ റിലേയിൽ വെങ്കല മെഡൽ നേടിയിട്ടുണ്ട്.ഇന്ത്യക്കായി മത്സരിച്ച് ഇതേ ഇനത്തിൽ (4 x 100 മീറ്റർ റിലേ) ദേശീയ റെക്കോർഡോടെ വെങ്കല മെഡൽ സ്വന്തമാക്കി.അവാർഡ് ജേതാവിൻ്റെ സൗകര്യമനുസരിച്ച് മലപ്പുറം തിരൂർ തുഞ്ചൻപറമ്പിൽ വച്ച് പുരസ്കാര ദാന ചടങ്ങ് നടക്കും.  കെ.എസ്. വെങ്കിടാചലം, പുതുക്കുടി ബാലചന്ദ്രൻ, അനീസ് ബഷീർ,
എ വി എം ഉണ്ണി,എം ടി നിലമ്പൂർ, ആർ കെ റഷീദ്, ജലീൽ പി, റഫീഖ് മേച്ചേരി എന്നിവർ വാർത്താസമ്മേളനത്തിൽ പങ്കെടുത്തു.