കൊച്ചി:  ബിസിനസ്, സാങ്കേതിക രംഗങ്ങളിൽ മുന്നേറുന്ന കൊച്ചിയുടെ വളർച്ചയ്ക്ക് കരുത്തേകി സൗത്ത് ഇന്ത്യൻ ബാങ്കിന്റെ പുതിയ സ്മാർട്ട് സിറ്റി കൊച്ചി ശാഖ ലുലു ഐടി ഇൻഫ്ര ബിൽഡിൽ പ്രവർത്തനം ആരംഭിച്ചു. ഐ.ബി.എസ് സോഫ്റ്റ്‌വെയർ സ്ഥാപകനും എക്സിക്യൂട്ടീവ് ചെയർമാനുമായ വി. കെ. മാത്യൂസ് ശാഖയുടെ ഉദ്ഘാടനം നിർവഹിച്ചു. ഉദ്ഘാടനത്തോടൊപ്പം ബാങ്കിന്റെ പുതിയ എഐ അധിഷ്ഠിത ഡിജിറ്റൽ അസിസ്റ്റന്റായ 'സോന' (SONA) അനാവരണം ചെയ്തു. ബാങ്കിങ് സേവനങ്ങളിൽ അത്യാധുനിക സാങ്കേതികവിദ്യ സംയോജിപ്പിക്കുന്നതിന്റെ ഭാഗമായാണ് ഈ നടപടി.

എടിഎം സർവീസിന്റെ ഉദ്ഘാടനം ​ജെയിന്‍ ഡീംഡ് ടു-ബി- യൂണിവേഴ്സിറ്റിയുടെ ന്യൂ ഇനീഷ്യേറ്റീവ്സ് ഡയറക്ടര്‍ ഡോ. ടോം എം. ജോസഫും, 'സോന'യുടെ അനാച്ഛാദനം ലുലു ഐടി പാർക്‌സ് കൊച്ചി ഡയറക്ടറും സി.ഇ.ഒയുമായ അഭിലാഷ് വലിയവളപ്പിലും നിർവഹിച്ചു. തൃക്കാക്കര നഗരസഭ ചെയർപേഴ്‌സൺ റാഷിദ് ഉള്ളംപിള്ളി ലോക്കർ സൗകര്യത്തിന്റെ ഉദ്ഘാടനം നിർവഹിച്ചു. ഇൻഫോപാർക്ക്സ് ആൻഡ് സൈബർപാർക്ക് കേരള സി.ഇ.ഒ സുശാന്ത് കുറുന്തിൽ, സൗത്ത് ഇന്ത്യൻ ബാങ്കിന്റെ മാനേജിംഗ് ഡയറക്ടറും ചീഫ് എക്സിക്യൂട്ടീവ് ഓഫീസറുമായ മഹേഷ് മുരളീധർ പൈ എന്നിവർ ചടങ്ങിൽ പങ്കെടുത്തു.

'സോന' (ഏജന്റിക് എഐ അസിസ്റ്റന്റ്) ഉപഭോക്താക്കളുമായി വിവിധ ഭാഷകളിൽ തത്സമയം സംസാരിച്ച് ആശയവിനിമയം നടത്തുന്നതിനോടൊപ്പം വായ്പകൾ, എൻആർഐ സേവനങ്ങൾ, അക്കൗണ്ടുകൾ, കാർഡുകൾ എന്നിവയെക്കുറിച്ചുള്ള വിവരങ്ങൾ നൽകുകയും ആവശ്യമായ ബാങ്കിങ് ഉൽപ്പന്നങ്ങൾ തിരഞ്ഞെടുക്കാൻ സഹായിക്കുകയും ചെയ്യും. മുതിർന്ന പൗരന്മാർക്കും ഡിജിറ്റൽ ബാങ്കിങ്ങിൽ മുൻപരിചയമില്ലാത്തവർക്കും ഒരുപോലെ പ്രയോജനകരമാണ് 'സോന'. 

ആധുനിക സാങ്കേതികവിദ്യയുടെ വേഗതയും ഡിജിറ്റൽ സേവനങ്ങളുടെ കാര്യക്ഷമതയും ബാങ്കിങ് രംഗത്തെ വിശ്വാസ്യതയുമായി സമന്വയിപ്പിക്കുകയാണ് സൗത്ത് ഇന്ത്യൻ ബാങ്ക് ഇതിലൂടെ ലക്ഷ്യമിടുന്നത്. 

Photo Courtesy - Google